Read Biete FESUAKNA 9 Bible Online

FESUAKNA 9 - Biete bible

FESUAKNA 9

¹PUMAPA khan Mosia ziangah, “Faroa ziangah fen la, a ziangah, ‘Amahih PUMAPA Hebraihei Pathianin ai ti a nit; ki sin an tho theina rangin ki mihei infe roh.

²Anni infe rangin ni phal noa ni la dan maiin chu,

³PUMAPA khan phûla ni ran ilêng, sakorhei, sakuartunghei, saringseihei, serâthei, berahei, kêlhei chungah ripui inrît tak iphûlrî ki înlêng rang a nit.

⁴Khannisela, PUMAPA khan Israelhei neh Aiguptahei savâi kârah ritleina siam a ta, Israelhei ta chu thi no nih.

⁵Keimah PUMAPA hin ki hunbi sia, naktûkah hi ramah hin hi thil hih kî tho rang a nit, a ti,’ itin iril roh,” a ti a.

⁶PUMAPA khan atûkah chu khangkah takah khan a tho tâk a, Aigupta mihei ranhei rêng rêng an thi riai tâk a; nikhomsela, Israelhei ran chu khatkah khom thi mak a.

⁷Faroa khan thil om dân va reh rangin mi a tir a, Israelhei ran chu khatka lua khom thi mak iti an mu a. Nikhomsela â lung ân khir a, mihei kha infe nuam ual mak a.

⁸PUMAPA khan Mosia neh Arona ziangah, “Lungthu kâra rivut va sôk unla, Faroa mitmuah Mosian rivân tiang hang rithe riseh.

⁹Ipildi angkan Aigupta ram pumpuiah indar a ta, Aigupta ram sunga miriam neh sahei chungah sakhuai rî lêng a ti,” a ti a.

¹⁰Khanchu, rivut khah an lâk a, Faroa maah khan an va ding a; Mosia khan rivân tiang a hang rithe tâk a. Miriam neh sa hei khan sakhuai rî an rivoi zit tâk a.

¹¹Kha sakhuai sikah khan dôithiamhei kha Mosia makungah ilang thei khâi mak a; anni khom Aigupta ram mi murdihei angkan sakhuai ituamin an iom a nit.

¹²Nikhomsela, PUMAPA khan Faroa lungril khah ân khir pêk a, Mosia zianga PUMAPA lei iti tâk angka khan an ṭong kha ringai ual mak a.

¹³PUMAPA khan Mosia ziangah, “Zîng takah thoi inla, Faroa makungah va ding inla, hingka hin va ti roh, ‘Hebraihei Pathian PUMAPA khan hingka hin a ti: Ki mihein ki sin an tho theina rangin infe ta roh.

¹⁴Vuaninta vêlah hin chu ni milianhei neh ni mipuihei bang ni loiin, nangmah ngêi khomin rammual pumpuiah keima angkana Pathian dang omak iti ni riatna rangin nang ki întuang rang a nit.

¹⁵Nangmah neh ni mihei chu ripui rivoi rangin ki kut lei ilek inlang chu inrimang pharin om tâng nin ti.

¹⁶Nikhomsela, ki sinthotheina nang in-en rangin neh rammual pumpuiah ker ming ân thangna rangin ni ringna ki lai zua a nit.

¹⁷Ni lar pâk mai a, ki mihei khom lâ sua nuam mak che a.

¹⁸Ringai roh, naktûk hingka tik hunah hin irial inrik ki însûr rang a nit; khangkana irial inrik khah Aigupta ramah tiklâi khomin a la om ngai ino a nit.

¹⁹Khasikin, atûn zel phûla ni ran vâihei neh ni thil nei murdihei khum riai ta roh; ni khum ṭhat non chu miriam khom ran khom irialin dêng a ta, an ithi rang a nit, a ti,’ ti roh,” a ti a.

²⁰Faroa milian ṭhenkah khan chu PUMAPA thu khah an ngaisak a, an bôihei neh an ranhei kha inah an inlût a;

²¹Ṭhenkah khan chu PUMAPA thu ngaisak mak a, an bôihei neh ranhei khah phûlah an in-om rak a.

²²PUMAPA khan Mosia ziangah, “Rivân tiang ni kut phar roh, khanchu, Aigupta ram pumpui chungah irial zuang ṭul a ta; miriam hei, ran hei neh loia chimu tinrêng dêng inrinôi a ti,” a ti a.

²³Khanchu, Mosia khan â rol kha rivân tiang â lek a; PUMAPA khan khuarî neh irial a zuk tir a, rinêngah iṭêkhei a tlâk tâk a.

²⁴Aigupta ramah khan irial khah a ṭul zut zut tâk a, khothlâr khom arlek zup zup a. Sûn nungtiang riat phâk tenah khangkana natinsat khah Aigupta ramah la om ngai mak e.

²⁵Rama om murdi, miriam khom ranhei khom a dêng a; loia chimu murdi khom a dêng a, thinghei khom a dêng ikhiak a.

²⁶Israel naihei omna ram, Gosen ramah khan chu irial khah ṭul viat mak a.

²⁷Faroa khan Mosia neh Arona kha ân koi a, an ziangah, “Atûna zoroah hin chu thil kî thonsual tâk a nit hih; PUMAPA chu mi fel a nit a, keimah neh ki mihei hih â sual chu kin nit.

²⁸Hi khuarî irî dur dur neh irial iṭul zut zut hih inmong rangin PUMAPA chu ngên rei; khanchu, nangni isuang ki ta, nangni ituh khâi no ning e,” a ti a.

²⁹Mosia khan a ziangah, “Khua ata hi ki suak kaneh PUMAPA ziangah ke bân phar ki ta, khuarîhei ringam a ta, irial khom sûr khâi no nih; khanchu, rinêng hih PUMAPA ta a nit, iti nî riat rang a nit.

³⁰Nikhomsela, nangmah neh ni milianhei hin PUMAPA la ṭi ngir no tin u iti kî riat a nit,” a ti a.

³¹Pat neh barli khah a dêng isiat riai a, barli khah a vui lâi a nit a, pat khom armuam lâi tak a nit.

³²Nikhomsela, huit neh fatun kha chu la vui mak a, ai siat ino a nit.

³³Mosia khan Faroa kha a mâk a, khopui ata a suak a, PUMAPA tiang â bân a phar a; khanchu, khuarî rîhei neh irial iṭulhei khah arngam tâk a, rua khom sûr khâi mak a.

³⁴Ruahei, khuarîhei neh irialhei an mong tâk iti Faroa khan a mun chu, a tuklul ân lian nôk a, amah neh a milianhei khan an lungril an inkhir nôk mai tâk a.

³⁵Mosia zianga PUMAPA lei iti tâk angka khan Faroa lungril khah a khir a, Israel naihei kha isua nuam ual mak a.