Read Biete JOBA 1 Bible Online

JOBA 1 - Biete bible

JOBA 1

¹Uz ramah mi khatkah a om a, arming kha Joba a nit. Kha mi khah sêlna boi, Pathian ngaisak tak, thilṭha no ata ridîn thei mi a nit.

²Naipa sarikah neh nainu ithumkah a nei a.

³Archong dân chu bera sângsarikah neh saringsei sângithumkah, serâtchal bop rizarngakah, sakuartungpui rizarngakah neh isom itam takkah ai nei a nit. Khosak mihei lâiah khan mi richong tak a nit.

⁴Joba naipahei khan mahni in chitah ruai an iṭhe risak ngai a, an far ithumkahei khah an zianga khalai rikhîl rangin an ifial ngai a nit.

⁵Khaangkana an ruaiṭhehei an zoiin chu Joba khan anni khah a koi a, a thâr ngai a, zîngah a thoi a, an riming rikipin hâlrivâm thillan ai lan ngai a nit. Joba khan, “Ki naihei hin thilisual ithon Pathian an lei isîrinsiat tâk duaiin,” ai ti a nit. Joba khan hingka hin a tho mai ngai a.

⁶Khante, vân mihei PUMAPA makungah an rilang ngai nî a hong tlung a. Soitana khom kha an lâiah a hong ṭang sa a.

⁷PUMAPA khan Soitana ziangah, “Taktianga rithoka hong im nî nit?” a ti a. Soitana khan, “A suk a tunga rammual ker fang vêlnaa rithokin,” a ti a.

⁸PUMAPA khan Soitana ziangah, “Ki bôi Joba hih ni riatinfel im? Rinêng chungah hin ama angkana sêlna boi, mi dik, Pathian iṭi mi, thil ṭhano ata ridîn thei tute omak e,” a ti a.

⁹Soitana khan PUMAPA khah a sâm a, “Joba khan a bi boiin nang ngaisak a tîm a?

¹⁰Ani khah a in neh ai nei murdi neh kil tinah ni sunghual khap ngai sika a nit. A kut sintho ṭhat ni vur a, a ran rualhei chu rampum ai sip tâk a nit.

¹¹Atûnah hin ni kut ilek inla, ai nei murdi lah pêk riai ta, ni mâi kungah nang sîrinseh ngêt a ti,” a ti a.

¹²PUMAPA khan Soitana ziangah, “A ṭhat ai nei murdi kha ni kuta om a nit, khan amah tak chu tôn no roh,” a ti a. Khanchu, Soitana kha PUMAPA makunga rithokah khan a suak tâk a.

¹³Sûnkah chu Joba naihein an ulianpa tak inah ruai an iṭhe lâiah khan,

¹⁴Joba ziangah thangkoi a hong tlung a, “Serâtchalhein âl an kâi a, sakuartunghei a kôl itlângah an lêng lâiin,

¹⁵Seba mihein an ne hong doi thut a, isomhei khah khandaiin an that a, sialhei khah an ne sut riai a, keimah bang hi nang iril ranga hong izôk thei ki nit,” a ti a.

¹⁶A la sîr mai lâiin mi dang a hong itlân nôk a, “Rivâna rithokin Pathian mei a zuang ṭul a, berahei neh isomhei a kâng vang a, keimah bang hi nang iril ranga hong izôk thei ki nit,” a ti a.

¹⁷A la sîr mai lâiin mi dang a hong itlân nôk a, “Kaldaihei pôl ithumkah risiamin an ne hong doi a, saringseihei kha an lâk riai a, isomhei khom khandaiin an that a, keimah bang hi nang iril ranga hong izôk thei ki nit,” a ti a.

¹⁸A la sîr mai lâiin mi dang a hong itlân nôk a, “Ni naihein an ulianpa tak inah ruai an iṭhe lâiin,

¹⁹ramchâr ata thlipui a hong râng a, in khah kil tinah a hong nam inlîr a, an rêngkan a del that riai tâk a. Keimah bang hi nang iril ranga hong izôk thei ki nit,” a ti a.

²⁰Khanungchu, Joba khah a thoi a, ngaisiatin a zakorfual â potthlêr a. A lu a voi inkol a, rinêngah lingisikin Pathian â sôn a,

²¹“Ki nu sung ata korongboin ki zuang suak a, korongboi ngirin kî kîr nôk rang a nit. PUMAPA khan a pêk a, PUMAPA khan ai lâk nôk tâk a nit hih. PUMAPA riming chu inpâkin om riseh,” a ti a.

²²Hihei murdiah hin Joba kha Pathian isîrinsian isual mak a.