Read Biete JOBA 11 Bible Online

JOBA 11 - Biete bible

JOBA 11

¹Zofara, Hamathi mi khan hingka hin a hong ril suak a;

²Hingka dôra thu hih sâm ino thei ai nit rang mani? Ṭong tam sikin mîn thiam ai chang rang mani?

³Joba, nang sâm thei mang ung nî sôn mani? Ni ṭong chanlamboihei khan a ne îndâirek rang nî sôn mani?

⁴Ni thuril murdi â diktak rongin ni be a, Pathian mitmuah rithiangin ner be a.

⁵Pathianin nang sâm sela chu ki ti vang na!

⁶Khanchu, vârna rithup nang inriang a ta, Vârna dik, miriam riat phâk ban khah. Reh roh ba na! Ni siatnan ai phû nêka roiin, Pathianin kuttum nang ai tho a nit.

⁷Pathian roinpuizia nî riat suak zoi riai mani? A sinthotheizia kha nî riat riai thei mani?

⁸Rivân nêka risâng a nit, ni riat phâk rual ni mak. Seol nêka inthûk a nit, ni mu phâk rual ni mak.

⁹Pathian roinpuina chu rinêng neh tuikhanglian nêka rizat a nit.

¹⁰Pathian chu izuangin nang man sela, Ni chungthu rêl ta sela, tûm â dan thei rang?

¹¹Pathianin tuhei hîm mi sualhei khah a riat a, An siatnahei ai mu riai a nit.

¹²Ram sakuartunghei isôi inzongzan zel thei ai nit ino angkah hin, Mi intlo khom vâr zel thei mak.

¹³Joba, ni lungril riput dân indik inla, Pathian tiang ni kut phar roh.

¹⁴Ni kuta siatna om a nitin chu pai inrimang inla, Ni inah sualna om phal no roh.

¹⁵Khanchu, ingam takkan lêngvêl thei ni ta, Ni dingmun det a ta, iṭi rang nei no tin.

¹⁶Khanchu, ni dengtheina ringil ni ta, Tui iluang angkan reh mai khâi no tin.

¹⁷Ni ringnun kha sûn ivâr nêkan vâr ual a ta, A zîng lâi tak khom kôlrisam angkan vâr a ti.

¹⁸Sabeina sip neh izôkriamkan lêng ni ta, Pathianin nang donsui a ta, ningibei riamkan ringam ni ti.

¹⁹Zâl ni ta, tutên nang inbuai ngam no nih, Mi itam takkan sanna nang ngên an ti.

²⁰Mi sualhei chu lunginzîngin om an ta, Itlân suakna lampui zel mu no nih. An ingâk tak chu thina nîng a ti.