Read Biete JOBA 12 Bible Online

JOBA 12 - Biete bible

JOBA 12

¹Joba khan hingka hin a ti nôk a;

²A nit na, mi vâr chu nin nit hi te! Thi duai ta unla chu, mi vâr an iom khâi ino rang a nit hi te!

³Khanniseh, nangmani angkan riatna ki nei a, Nin nêkan duai ual bîk mang, Tu ngân im hi thilhei hih â ria no bîk a?

⁴Pathian ke samin ne lei sâm ngai khom sela, Ki malhei nuizabûr ki chang chak tâk, Mi fel neh demnaboi hih nuizabûr ki nit tâk.

⁵Mi ominhoihei khan mi vânduai an musit a, Mi â ba rang khah an lar sui nôk ngai.

⁶Inruhei neh Pathian nei inohei chu ningbeiin an om a, An pathian neisun kha an râtna a nit pum khomin.

⁷Ramsahei ridon roh, nang inrisei an ti; Chunga vuang ivahei khom ridon inla, nang iril an ti.

⁸Rinêng khom isôn inla, nang inrisei a ti, Tuikhanglian ingahei khomin nang iril thei an ti.

⁹An rêngkan PUMAPA kutsuak an nit iti tûm â riano an om?

¹⁰A thilsiamhei ringna â zêktu chu Pathian a nit a; Mi tin ringna chu a kuta om a nit.

¹¹Ne leiin fâk itui ai riat angkah takin, Ne kuarhei khan thu ringaiihoi an riat ngai.

¹²Mi chalrichanghei khan vârna an nei a, Pathian rêkin chu vârna neh sinthotheina ai nei a nit. Mi chalrichanghei khan thlîr thiamna an nei a; Pathian rêkin chu vat thiamna neh isin ranga theina ai nei a nit.

¹⁴Pathianin a ṭhet tenan tûm â sininding nôk thei a? Miriam Pathianin a întâng khah tutên isua thei no nih.

¹⁵Pathianin rua ân sûr non chu khua a kang a; Rua an sûr tenan ram a dîl isiat zit ngai.

¹⁶Râtna neh nêna chu a ta a nit a, Ilêma om neh â lêmtu khah a kuta om rim an nit.

¹⁷Roisaktuhei roisakthiamna a lâk pai a, Ruaituhei chu intlo angkan sin a întho a nit.

¹⁸Rênghei thuneina a sut pai a, mi tângin a siam a,

¹⁹Thiampuhei kutkorongin ân fe a, Thuneituhei a întlôm a nit.

²⁰Ringatna taka mi ineihei khah ân dâi a, Ulianhei vârna khah a lâk pêk ngai.

²¹Thuneina neihei chu mualphoiin a siam a, Roirêltuhei tharâtna chu ân mong pêk ngai.

²²Zîng richela thil inthûkhei a sap inlang a, Izîng richel tak khom ân vâr ngai.

²³Namhei ilianin a siam a, anni chu â siat nôk a; Namhei ipungin a siam a, â thekindar nôk ngai.

²⁴An ruaituhei chu intlo takin a siam pêk a, Ramtui khomualah a înrivâk vêl ngai a nit.

²⁵Izîng nuaiah an rimai zal a, zûnrui angkan an pêm diai ngai a.