Read Biete JOBA 13 Bible Online

JOBA 13 - Biete bible

JOBA 13

¹Khahei murdi khah nîn tin ki mu a, Ikuarin ki riat a, ki riatthiam vang; Nin riat dôrah khah kî riat a nit. Nangmani nêka duai ual ni mang e.

³Ki thubuai hih Pathian neh a nit a, nangmani neh ni mak, Ki chungchâng hih Pathian neh munka risôn kî nuam a nit.

⁴Nin inmôlna khah mînlaknahein nin rikhû a; Mi indam thei ino dâktorhei angkah nin nit.

⁵Dâirek unla, mi vâra nangni be khom om duai an ti.

⁶Ki roi ken rilang sungkah lei ringai ṭian rei.

⁷Irang ngân im milak nin itho? Nin mînlakna khan Pathian lei rifepui rangin nin ibe mani?

⁸Ama thlopin thleibîk inei nin itum mani? Roirêlna munah a thubuai nin ithlop rang im ai nit?

⁹Nangni enfia sela, Pathianin thil iṭha mu ngân a tîm? Miriamhei nin ilêm angkan Pathian khom ilêm thei rangin nin irtûng mani?

¹⁰Arûka ditsakbîkna nin neiin chu nangni lar kôk a ta,

¹¹A sinthotheina khan rilônthingnan nangni insip a ti.

¹²Nin ṭong ulianhei khom mei rivâm angka pai a nit a, Nin ṭanfunghei khom ipil ipok angkah pai a nit.

¹³Lei dâirek unla, la ṭong hi ki ti, Â tlung tlung la tlung ta riseh.

¹⁴Ki ringna ten ichân kî huam a nit.

¹⁵Tûngna reng nei khâi mang a; Pathianin ne that khom sela im ân khôkna a om? Ki thubuai chu a ziangah ki înrilang mai rang a nit.

¹⁶Tu mi sual khom Pathian mâi sik ngam ngai mak a, Kei chu ker ngampamna hin a nen zôk duai khom a nit thei.

¹⁷Ki rilfiana ṭonghei hih lei ringai ving unla, Ki thusîr hih ringai rei.

¹⁸Ki idik a nit iti ki riat sikah hin, Ki thubuai inlang rangin ker siam diam tâk.

¹⁹O Pathian, thiamno nen chang rangin nî zuang mani? A nitin chu idâireka thi rangin ki lei irfo ṭian a nit.

²⁰Thil inikah zong ki ta; ne phal pêk roh, Khanchu, ni ziang ata ribi no ning e:

²¹Kuttum nê tho mong inla, Rilônthingin nen om khâi no roh.

²²O Pathian, ṭong bak inla, sâm ki ti, Anitnole, keimah chu ṭong bak ki ta ne sâm roh.

²³Ki thonchâina neh sualnahei hi idôra tam im ai nit? Ki thonchâina neh sualnahei ne ril roh.

²⁴Ithôm nung ni ne isong? Ithôm irâl angkana ni ne irngai tâk?

²⁵Phâivua isêm inlêng thingnâ hih dûk nî tho rang mani? Farsi châr khah ni irzûl diai rang im?

²⁶Ki chungchâng ṭha no tak takkan ner ziak a, Ki thuarbap inmôl sual mo ni nen pêl a.

²⁷Zingziri ki keah nen kol a; Ki kalchôi tin ni en chak a, Ki ke nunghei ten nî sui nek ngai.

²⁸Thil imona boi zel rang neh, Silbom ithim ifâk angkah pai ki nit pum khomin.