Read Biete JOBA 14 Bible Online

JOBA 14 - Biete bible

JOBA 14

¹Nupanga inzir miriam chu, Sûn sôt inote sung buaina tina sipa oma thi zel rang a nit.

²Pâr angkan a hong pâr a, a ṭuai nôk zel ngai a; Rilîm itlân angkan om sôt ngai mak e.

³Khangkana mi chungah khan ni mit ni înfûk mani? A roi irêl pêk rangin ani khah ni ziangah ni hong iṭhui rang mani?

⁴Miriam inim tak ata kha, Thil rithiang zel hong suak thei no nih.

⁵A dam sung sei rang dôr khah lei irêl thlâm a nit a, A ring rang dôr thlahei khom nangman ni lei rêl thlâm a, A khêl thei loi rang ramrî ne rît pêk a.

⁶Nung song inla, a khâtin in-om roh; A ringnun intak khah a thei ngânin chu ihoiin mang riseh.

⁷Iphûra om thing rangah khan chu isabei rua a la om a; Hong icher nôkin don ithar a lâk ngai.

⁸Arzunghei tar ta khom seh, A kungmuihei rinêngmuamah thi man sela,

⁹Tuiin â chian chu thingtuai angkan don ithar vôr nôk a ti.

¹⁰Nikhomsela, miriam chu a thi a, an phûm a, Amakhah a mongna chu a nit a; A nit arthuak arngam a, takâm ai om tâk?

¹¹Tuidung iluang ai kang angkan, Dîl a hong ichâr angkah khan,

¹²Mihei chu an thi a, thoinôk tlak khâi loi rangin, Rivân a boi mâkah chu miriamhei har nôk khâi no nih. An iin ata khah châng tlak khâi no nih.

¹³O, Seolah ne thup inla ki nuam vang chu! Ni ningthik arkiang mâkah chu nen ribin la, Ni ne riat suak nôk rang hun nei ngêt roh.

¹⁴Mi a thi nungin a hong iring nôk thei rang im? Kei chu zoro ṭhahei ngâk ki ta; Hi buaina zoro hih a hek mâkah chu.

¹⁵Khanchu, nangman ne koi ni ta, nang sâm ki ta, Ni thilsiam hih ne lôm ni ti.

¹⁶Khanchu, ki kalchôi tin en chak ni ta, Ki sual sin rêk chu sui khâi no tin.

¹⁷Ne ngaidamin inboi vang ni ta; Ki thonchâinahei tin rûnfâi vang ni ti.

¹⁸Mualhei a zuang chim a, Ikhoi idethei artol a.

¹⁹Tuihein lungpuihei kha sep a ta, Tui ilian khan rinêng a fen ihek ngai a, Khangkah khan miriamhei tûngna khah ni înboi pêk ngai a nit.

²⁰Ani chu kumkhuaka rang nen tlôm a, Ni ûmrizûl tâk a; Thinaah khan a mêl nen siat pêk tâk a.

²¹A naipahei chôiinrisâng an nit khomin reh khâi mak a, An mualinphoi khomin ngaisak khâi mak a.

²²Ama taksa natna bang khah a riat a, Amah lung a irkham ngai a nit.