Read Biete JOBA 15 Bible Online

JOBA 15 - Biete bible

JOBA 15

¹Khante, Elifaza khan hingka hin a sâm a: Mangmunboi ṭong a nit, Joba, mangmunboi ṭong a nit.

³Mi vâr tute chanlamboi irilin ṭong no ni a, Omzia boi ṭonghei khah tho mai no nih.

⁴A nit, Pathian ṭina zel nei mak che a, A zianga rilan khom nuam mak che,

⁵Ni puanozia ni ṭongbâi suakah hin â lang a, Ni vârrilet ṭonghei inunga ribi tum ni nit.

⁶Thiamno nang inchang keima rangin nang mak; Ni ṭongbâi suak tin khan thiamno nang an închang a nit.

⁷Miriam insiang masa taka ni irbe mani? Itlânghei Pathianin a siam lâiah khan ni lei om tâk im?

⁸Pathian roisak lâi khah ni lei iriat phâk mani? Miriam vârna hih ni ta bîk im ai nit?

⁹Kin iriat ino im nî riat? Kin imu no im nî mu bîk?

¹⁰Kin vârna hih mi bâ ṭuakhei ata kin irsei a nit, Ni pa maton viaia lei isuak mihei khah.

¹¹Pathianin thlangamna nang ai lan a nit; Ithôm ni lei inôl mai hi? Arthûlin ṭong idam neh rinêmin kin iti a nit.

¹²Khanniseh, ni zâl nen thak a, Ningthikin ni ne mît a.

¹³Pathian chungah ning nen thik a, ni heng a.

¹⁴Miriam hih a irthiang tak tak thei mani? Nupanga inzir hih Pathian maah ai ṭhat tak tak thei mani?

¹⁵Pathian khan a vântirtônhei ilua ai iam tôk ino kêng; Anni tena lua a mitmuah an irthiang ino a nit.

¹⁶Miriam sual neh porinche a sip, Tui iin angkana sual iintu chu a iam no rang tlia na!

¹⁷Joba, ki thil riat chu atûnah hin ringai roh. Kî mu chu ki îsîr rang a nit.

¹⁸Mi vârhei khan an pipuhei ata an idong, Thurithup îte thup loiin an ne lei iril a nit.

¹⁹An ramah khan ram dang mi omak a, Pathian ziang ata â ṭhui inrimang rang tute omak.

²⁰Mi nunter, mi danghei isirdêtu chu, A dam sungkah intak isikin om a ti.

²¹Rilônthingna khêk irîhei â kuarah iring a ta, Izôkriama arbe lâiin inruhein doi an ti.

²²Izîng ata zôk rangin tûngna reng nei mak a, A thina rang khandaiin a lei ingâk ṭian a nit a.

²³A ruak ifah rangin vasatelhein an ingâk chak a nit, A sûn maton chu â zîng a nit iti a riat a.

²⁴Rêng irât tak angkan vânduaina lian khan, Rikhû rangin a lei ngâk ṭian a.

²⁵Hihei hih miriam sik rang chu a nit, Pathian idoia a kuttum ilek a, Tinrêngthotheia êsêl ngaitu chu.

²⁶Kha miriam khah ripâk neh rihel tak a nit a, Tuklul ilian takkan â pho a lâng a, Pathian idoi rangin irât takkan a pun a.

²⁸Kha mi khah a nit khopuihei ila a, A chongpu lâizâm ithohei in iluatu chu. Khanniseh, ridoinah khan kha khopuihei neh inhei kha la sehchit a ti.

²⁹Richong sôt khâi no ni a; Archon lâmtual hei om sôt no nih. Arlîm tena khom rimang dip tâng a ta,

³⁰Izîng ata khah zôk thei no nih. Thingkung, â ṭanghei meiin ai kâng pêk, A pârhei phâivuan ai sêm invuang pêk angka takin, Ani chu nîng a ti.

³¹Mahni rilêmin, chanlamboiah ringat no riseh, Îte mu suak ual no nih.

³²A zoro a hek man thêm a ta, Thingkung angkana thêmin, don vôr khâi no nih.

³³Grep â râtebop iṭul vang angkan nîng a ta, Oliv kung a pâr iṭul angkah nîng a ti.

³⁴Pathian ngaisak ino mihei chu richi rizang nei no ni a, Leprûk sum imanga in an isinhei chu meiin kâng vang a ti.

³⁵Hi miriamhei hih an nit buaina phana sual isin ngai; An lungril chu zoro tin rilêmnan ai sip ngai a nit.