Read Biete JOBA 16 Bible Online

JOBA 16 - Biete bible

JOBA 16

¹Joba khan hingka hin a sâm a; Khangkana ṭonghei kha chu ki lei riat tâk ngai; Nin rêngkah hin mi lungngam sak thiam ino tak nin nit.

³Nî chiar ngit mai rang tâk im ai nit? A ṭong nung ita tak ngêt ichang nin itum rang mani?

⁴Ki dingmunah hin iding unla chu, Nin ṭong lam angkah hin kei khom ṭong thei ok ki ti, Ki lu nangni heipêk vak ki ta, Nangni râng khum ki ti.

⁵Khanniseh, nangni thor inrât lem ki ta, Thlangam nangni sakin kî ṭong rang a nit.

⁶Ṭong mai khom inlang ki natna rivuai ual no nia, Idâireka kî om khom hin ki natna inzâng ual mak.

⁷O Pathian, isôl nengkan ni ne siam a, Ki insung ni nen ram pêk tâk a.

⁸Ki vun izûr hin deng ni nen thei zia ân lang a, Ki ruhei hih vun bangin a tuamna hin ki natzia chu a înlang a nit. Mihein amakhah ki thonchâina râa an ibe a nit.

⁹Ningmurin Pathianin a ne sân phor a, Ne nelin a ne imît ving a nit.

¹⁰Mihein an ne phengsan a, Riamsa takkan ki mâiah an ne ben a, Ne doi rangin ki kôlah an ribûm a.

¹¹Pathianin amah ngaisak inotuhei kutah a ne lan tâk a, Mi sualhei kutah a ne pêk tâk.

¹²Rithlaringam takkan ki lei om ngai a, Khan Pathianin ki ringah a ne man a, A ne tôk inrinôi a, a ne nôi chit tâk. Pathianin kut ridîn en nan a ne mang tâk a,

¹³A thal kâptuhein an ne hual khap a, Lungkhamna boi riai kan an ne kâp iphop a, Ki mît khah nuaiah an inluang a.

¹⁴Vêl izâkah a ne phop a, Sipai nelna sip angkan a ne doi a.

¹⁵Ke rung a, borapuan ki sil a, Mualinphoi takkan ipilah ke ṭhung a.

¹⁶Ki ṭapna sikin ki mâi a sen khap tâk a, Ki mithei khom â vung ngit tâk.

¹⁷Khan îte zâlrât imanga sual isin ni mang a, Pathian zianga ki ṭongṭaina chu a tak a nit.

¹⁸O Leilung, ki chunga ṭhano isina omhei thup no roh; Rêlna dik ranga ki îkhêk hih dâipui rêk no roh.

¹⁹Atûnah hin ki thuretu rivânah a om, Ker thûla dinga ne thlop rang ai om a nit.

²⁰Ki malhein ne nuiso khom seh; Ki mitrithli pumin Pathian tiang ngat ki ti.

²¹Miriamin a mal ta ranga ai ngên pêk ngai angkah hin, Ker thûla Pathian zianga ne ngên pêk rang mi kî nuam a nit.

²²Ki kumhei chu a hek lôk lôk tâk a, Kîr khâi ngai nona lampui chu kî ro tâk a nit.