Read Biete JOBA 19 Bible Online

JOBA 19 - Biete bible

JOBA 19

¹Joba khan hingka hin a sâm a: Idôra sôt im inah tak takkan nin ne iṭong khum rang hi?

³Voi sômkah reng nin ne ngo tâk a, Izak nachâng zel reh viat loiin nin ner kôk a.

⁴Thil ki lei ithonchâi ngân khom ni sela, Ingkan im amakhan nangmani nangni a înnat?

⁵Keima nêka ṭha ual nin risôn a, Ki buaina hih ki thonchâina râa nin ibe a nit.

⁶Hi sintu chu Pathian a nit iti nin iriat thei ino mani? A lênin a ne irkhû tâk a nit.

⁷“Kuttum a ne tho tâk,” itia ke khêk khomin sâmna îte mu mang a; Ṭangpui ringaia ke khêk khomin ne ngaisaktu zel omak.

⁸Pathianin ki lampui â dan sikin fe thleng thei khâi mang, Ki lampui chu izîngah a ne thup pêk tâk.

⁹Ki roinpuina a ne lîp pêk a, Ki rênglukhum khom a ne lîp pêk tâk.

¹⁰Kil tinah a ne tôk a, îte chang khâi mang, Thing angkan ki tûngna a phâi pai a, Ithêma thi rangin a ne mâk rak tâk.

¹¹A ningmur chu ki chungah a chok a; Â râlhei lâiah a ne tep sa tâk.

¹²A sipaihei, ne doi rangin a hong tir a, Ṭangmun khur an choih a, ki puan in an hual khap tâk.

¹³Pathianin ki urênghei chu ne maraktun a siam a; Ki malhei ta rang khomin khualmi angkah ki nit tâk.

¹⁴Ki suapuihei neh ki malhei an rot tâk a, Ki rualṭhahei khomin an ner ngil zoi tâk.

¹⁵Ki ina mikhual ichang ngaihei khan an ner ngil tâk a; Ke som nupanghei khomin khualmi neh ram dang min an ner ngai tâk.

¹⁶Ke som khom ke samin, ihuai nuam khâi mak a, Ne ṭangpui ranga ki ngên ilua khomin ṭong ithlum imang a nang tâk.

¹⁷Ki nupui khan ker thuak inam diar khâi mak a, Ken zirpui ipahei ngêi khom ki kôlah hong nuam khâi mak.

¹⁸Naipanghei tena khomin an ne musit a, An ne mu kipah an ne lei nuiso ngai a.

¹⁹Ki mal ṭhahei murdi khan an ne tir a; Ki lungthlung takhei khomin nung an ne song tâk.

²⁰Vun neh ru khât bang ki nit tâk a; Ker thuak a la irzom den den bang hih a nit tâk.

²¹Ki malhei kêng nin init, lung nen kham ta u! Pathian kut ngêiin a ne innat tâk a nit.

²²Pathian angkan ithôm nangmani khomin deng nin ne înthei hi? Ki tuangna hih inrup nin lai ti no mani?

²³O, ki thuhei hih riziak ni sela, Lekhabuah riziakin inchuang ni sela ki ti vang chu!

²⁴Lunghêma holin ki thuhei hih lungah riziak ni sela, Kumkhuaka rangin lungpuiah riziakin om sela chu o!

²⁵Ner Tlantu chu a ring iti ki riat, A nungkhôn takah chu nê thlop rangin rinêngah hin zuang iding a ti.

²⁶Natnân ki vunhei hih â siatrip nung khomin, Ki takpumin Pathian ki lai mu rang a nit.

²⁷Keimah ngêiin amah chu mûng ki ta, Keima mit ngêiin amah chu ki lai mu rang a nit. Ki lungril hin arngai vang chu!

²⁸“Ingkan im ani hih ei intuang rang tâk” nin ti sikin, Ne doina rang a bi nin izong a nit hih.

²⁹Khan atûnah hin khandai chu ṭi rei, Khandaia tuangna hih Pathian ningthik inlangna a nit, Khanchu, roirêltu a om iti reh tâng nin ti.