Read Biete JOBA 2 Bible Online

JOBA 2 - Biete bible

JOBA 2

¹Vân mihei PUMAPA makunga an rilang ngai nî sûn a hong om nôk a, Soitana khom an lâiah a ṭang sa a.

²PUMAPA khan Soitana ziangah, “Taktianga rithoka hong im nî nit?” a ti a. Soitana khan PUMAPA kha a sâm a, “A suk a tunga rinêng chung ker fang vêlnaa rithokin,” a ti a.

³PUMAPA khan Soitana ziangah khan, “Ki bôi Joba hih ni mu infel im? Rinêngah hin ama angkana sêlna boi, mi dik, Pathian iṭi, thil ṭhano ata ridîn thei tute omak e. A bi om loia amah ne siat ki phal nung khomin a lai iamom ngit mai a nit,” a ti a.

⁴Soitana khan PUMAPA kha a sâm a, “Takpum ihoina rangin chu mîn îkhom an ihuam rang a nit.

⁵Atûnah hin, ni kut ilek inla, a ru neh a taksa ten zuk tôn innah ta, ni mâi kung zelah nang isîrinseh ngêt a ti.” a ti a.

⁶Khanchu, PUMAPA khan Soitana ziangah. “A ṭhat, ani chu ni kuta om a nit; khanniseh, a ringna chu zua roh,” a ti a.

⁷Khanungchu, Soitana kha PUMAPA makunga rithokah khan a suak a, Joba chu a kephaa rithoka a lusîp idênin pânsia ân rivoi a.

⁸Joba khah a fe a, rivut kârah â ṭhung a, rihuatna rangin bekorok lek a lâk a.

⁹A nupui khan a ziangah, “Ni lai iamom ngit mai rang mani? Pathian isîrinsian la, thi ta roh,” a ti a.

¹⁰Joba khan a nupui ziangah, “Nupang invêt ṭong angkan ithôm nî ṭong hih, Pathian ziang ata thil iṭha ei dong a, thil ṭhano khom ei idong ino rang im ai nit?” a ti a. Hihei murdiah hin Joba khan thu sia Pathian chungah ril mak a.

¹¹Joba mal pasal ithumkahei khan a chunga thil ṭhano tlung khah an lei riat a, ama mu rangin mahni mun chita rithokin an hong a. Kha mihei kha Teman kho mi Elifaza, Sahi ram mi Bildada, neh Naama ram mi Zofara hei an nit. Joba tuangpui neh thlangam isak rangin a zianga fe zoro an khit lam angkan an ihong a nit.

¹²Ilah taka rithokin Joba khah an hei mu a, khan infel thei mak a. An infel tenan chu an ṭap ngûi ngûi a, ngaisiatin an puanhei an potthlêr a, ipilhei an riphul a.

¹³Khanungchu, rinêngah sûn sarikah neh zân sarikah an iṭhungpui a; a tuangna kha a natinsat tak tak iti an mupui sikin tutên a ziangah ṭongbâikah khom an iti no a nit.