Read Biete JOBA 20 Bible Online

JOBA 20 - Biete bible

JOBA 20

¹Khanchu, Zofara, Namathi mi khan a sâm a: Joba, ke lung ni înnat a nit, Atûnah hin nang isâm khom kî ngâkmo a nit.

³Ni ṭongbâi suakhei khah rimusitna ṭong kêng ai nit, Khan khom nang sâm rang dân chu ki riat.

⁴Tianlâi rinêngah miriam an om tena rithoka, Atûn ten idênah hin hi thu hih nî riat ngai ni mak im a?

⁵Mi sual chu lôm sôt ngai mak a, Pathian ria nohei lômna chu mitkhap kârkah bang a nit.

⁶Arpâkna khan rivân sun khom sela, A lu khan sûm sik phâk khom sela,

⁷Vâivut angkan sêm inrimang nîng a ta; “Amah lei imu ngaihei khan takâm ai om tâk hi?” la tîng an ti.

⁸Rimang angkan boidip a ta, imu nôk ni khâi no ni a, Zân inlârna angkan rimang zel a ti.

⁹Mit ngêia mu ngaihei khan mu nôk khâi no nia, A omna ngai munah khan mu nôk khâi no nih.

¹⁰Inrianghei thil â rûk pêk a, A naihein kha mihei khah inlôm tum an ta, A sum lâk pêk khah pe khîr an ti.

¹¹A taksa khah a vângin a rât a, Khan sôt loiin ipil la chang a ti.

¹²Sual hih a bâi khan a tui ireh okin, Â lei nuaiah thup khap khom sela,

¹³Ilem phal loiin muam ngit khom sela,

¹⁴A thil fâk khan a phûng iseh pêk a ta, A phûng sungah khan irûl tûr ai chang tâk a nit.

¹⁵Mi sual khan richon a îlemhei kha â luak suak a; Pathianin a phûnga rithokin a înluak suak a nit.

¹⁶Mi sualin a îlem khah irûl tûr angkah a nit a; Irûl tûr irât tak khan ani chu a that ngai.

¹⁷Oliv riak iluanghei kha imu rangin ring khâi no ni a, Dût neh khuaituia luang vadunghei khom mu no nih.

¹⁸A sinsôlna râ khah fah loiin ichân vang a ta, Archon bûm khom khah lungringama fâk zoro mu no nih.

¹⁹Inrianghei a sirde a, lei uksak ngai mak a; Mahni in sin loiin mi in sin isai a sut ngai a.

²⁰A kuatinkamna khan ruptôk nei mak a; Khanniseh, archon khan inzôk thei no nih.

²¹A fâkin izua zel nei ngai mak a, A sum neh puan khan ai dum khâi ino a nit.

²²A vângsak inṭum lâi takin siatna sik a ta, Vânduaina tin khan del rikhû a ti.

²³A iduhei murdi fah ta riseh; Pathian ningthik natinsat tak khah a chungah ṭum a ta; Rua sûr angkan a chungah sûr a ti.

²⁴Thîr ifei ata izôk itumin lâizâm tho khom sela, Dâr thal khan la sun iver thal a ti.

²⁵A nit, thal rizum khan iver thal a ta, A môr rizum ritleah a thisen zuang izung chup chupin, A lungril chu sûtin a îbô tâk a nit.

²⁶A lei îtik bûm murdi a siatchit tâk a; Miriam kuta hâl nino mei khan amah neh a insungmihei a kâng riai tâk.

²⁷Rivân khin a pualoina inpuang a ta, Rinêng khomin thiamno inchang a ti.

²⁸Tui ilianin a in fen rimang a ta, Archon murdi chu Pathian ningthik tuiilian khan inrimang vang a ti.

²⁹Amakhah mi sualhei sik rang chu a nit a, Pathianin an sik ranga a lei înrifûk pêk chu a nit.