Read Biete JOBA 21 Bible Online

JOBA 21 - Biete bible

JOBA 21

¹Khanchu, Joba khan a sâm a: Ki thusîr hih iṭha takkan ringai rei; Kha bang khah thlangamna nin zianga kî zong chu ni riseh.

³Ṭongna zoro ne peh unla, Ki ṭong zoi tenan, nin nuam chu ne la nui rei.

⁴Famlên miriam neh rikhal ni mang e, Ilung dil zoinona rang a bi ṭha kî nei a nit.

⁵Ne en unla, nin ringai rikhêl a ta, Nin bâi hup nin ti.

⁶Ki chunga thil itlung ki ngaituan ke lung a zîng a, Rilônthingin ki takpum khom a înthing a nit.

⁷Îtho sik im Pathianin mi sualhei ringdamin ân om a? Tar kûla damin vângsakna ai pêk?

⁸Tu neh tehei ân nei a, An hong ithuar imu rangin ân dam a.

⁹Pathianin an insungkua vânduaina ithlun pêk mak a, Rilônthinga om rang phal tlak mak a.

¹⁰An serâtchalhei chi a ṭhat a, An serâtpuihein naisia pai ngai mak a.

¹¹An naihei chu beratehei angkan an ridâi a, Râifân takkan tualah an ridâi ngai a.

¹²Seranda neh theilehei imangin an zâi ngai a, Dârribuhei isukin râiifân takkan an irî vung vung ngai.

¹³A ringkong kârkah ihoi takkan vâng a sak a, Thlangam takkan mual a khum ngai.

¹⁴Mi sualhei khan, “Ne mah roh, Ni lampui iria nuam mang ung e,

¹⁵Tinrêngthotheiah chu tûm ai nit, A sin kin itho pêk rang khah? A ziangah kin ṭongṭaiin im rifena kin mu rang?” an ti a.

¹⁶An sum neh puan khah an itho suak ni mak a, Mi sualhei roisaknaah khan kî ṭang nuam ino a nit.

¹⁷Mi sual meiser khah a thi mai ngai a, Vânduaina khom an chungah a tlung mai ngai, Pathian ningthikna khan siatna a îthlun pêk ngai ni mak im a?

¹⁸Bupôl phâivuan ai sêm inlêng angkah an nit a, Thlipuiin farsi ai sêm inrimang ngai angkah hi an nit.

¹⁹A pa sual sikin Pathianin a naihei kuttum a tho ngai nin ti a, Ni mak, Pathian khan mi sualhei khah kuttum a tho a, An sual sika kuttum ai tho a nit iti anni khah inreh riseh.

²⁰A mit ngêiin a chunga inkhôkna zuang itlung khah mu sela, Tinrêngthothei Pathian ningmur chu ritem riseh.

²¹A damsung nikhuahei a hek tikin, Ai mâk tâk a insungkuahei a la ngaitua ngai im a?

²²Chungtiang rivâna thil iomhei irêltu Pathian khah, Tûm riatna ân risei thei ranga?

²³Mi ṭhenkah chu an thi nî sûn idêna risêl an om a, Ilôm tak neh idam riamkan an thi a, An taksahei chu vâi intak mut a nit.

²⁵Mi ṭhenkah chu lôm nikhua reng nei mak a; Lungril isôl neh intak taka ringin an thi ngai.

²⁶Khan an rêngkan ri-angnatkan ipilah iphûm an nit a, An rêngkan rilung ituamin an om ngai.

²⁷Nin ngaituanahei khah ki riat, Nin lunginṭonga nin isiahei khom khah ki riat.

²⁸“Mi roinpui in khah takâm ai om tâk, Mi sualhei omna puan in khom khah takâm ai om tâk?” nin iti a nit.

²⁹Khual inzin mihei nin irdon ngai ino mani? Thuthang an hong îthlunhei khah nin iriat ino mani?

³⁰Mi sual chu vânduaina nikhuaa rangin izua a nit a, Pathian ningthikna nikhuaah khan iṭhui suak a nit.

³¹Mi sual siatna phôk rang tute omak a, A sintho murdi rita rang khom tute omak.

³²Ani khah ithlânah an phûm a, Iṭha takkan â thlân khah an irung ngai a nit.

³³Iphûm ranga an infeah khan mi sâng têlin an zui a, Rinêng ipil khom khan iṭha takkan a taksa khah a irkhû ngai a nit.

³⁴Ingka takin im nangmanin milakin thlangam nin ne isak thei rang? Nin iti murdi khah chanlamboi ṭong a nit.