Read Biete JOBA 24 Bible Online

JOBA 24 - Biete bible

JOBA 24

¹Tinrêngthothei Pathian khan ithôm roirêl nikhua a sia no? Îtho sik im ama sinithotuhein kha nikhua khah an mu no?

²Mi ṭhenkan an ram inrizatna rangin ramrî lungphun an thîn a, Mi bera an îrûkhei khah an ta angkan an bera lâiah an vâi a.

³Farahei sakuartung an lâk pêk a, Siakham rangin numeihei serâtchal an irên pêk ngai a.

⁴Inrianghei khah om rang dân reh loiin an siam a, Risamhei chu lâizâm ithoa ribi rangin an ûmrizûl a.

⁵Khasikah khan inrianghei chu ram sakuartunghei angkan, Ramchârah ifah rang izongin an rivâk an rivâk a, Takmun khomah an naihei rang fâk an muna rang omak.

⁶Mi loiheiah bu âtin an rilo a, Mi sualhei khomin an grep rimal rangin an inrilo ngai a.

⁷Puansil iboiin zân thluanin korongin an zâl ngai a, Dâi lâi taka rituam lumna rang îte an inei ino a nit.

⁸Itlânga ruapui isûr khan ân chôp chit a, Ribîkna zongin lungpui bul an ribêl a.

⁹Mi sualhei khan pa nei ino rinu nêk lâihei kha suakin an siam a. An lâkai ritâng inrihenpuina rangin mi inriang naihei an lâk pêk a.

¹⁰Silbom an risam a, puansil iboiin an rivâk vêl a, Bu ât lâiin voniṭâm pumin fathlu an pêl a.

¹¹Oliv rikulah riak an iher a, uain khurah grep an sôm a, Khanniseh, tui rihâl dang ichârin sin an itho ngai a nit.

¹²Khopuiheiah mi itam takkah popliama ithi rang dôrkan an irung a, Khan Pathian lakin ngaisak mak a.

¹³Mi ṭhenkan chu ivâr an nel a, ivârah fe nuam mak a, Rammual ivârah khom an iom nuam ino a nit.

¹⁴Kôl risamin mi thattu chu a thoi a, Mi rianginvâihei ithat rangin a fe suak a, Zânah khom inru angkan ai châng ngai a nit.

¹⁵Inrê mi khan zân zîng a ngâk a; Mi tutên ne mu thei khâi no nih itin a mâi arkhû ngai.

¹⁶Kha mihei khan zânah in iphepin inrûkkan an lût a, Khan sûnah chu an ribîk a, ivârah om nuam ngai mak e.

¹⁷Sûn khovâr hih an ṭi a, Zîng richel khah an ta rangin iṭi ai om pêk ino a nit.

¹⁸Mi sualhei chu tuilianin a fen pai a, An ram nei khah Pathian vânisâm nuaiah a om a; An grep bilah sinitho rang tute fe khâi ngai mak.

¹⁹Khokang nîsâ lumah ivur ai zôi vang ngai angkan, Mi sualhei khom ithlânah an rimang vang ngai.

²⁰An nu tena lua khomin remai khâi mak a; Rilunghei rang bu tui tak chang an ti. Mi sualhei chu iremai ni khâi no nia, Thing ikiak angkan monchit tâng an ti.

²¹Â ching nai nei thei inohei khah dengthei takkan sin an intho a, Numeihei khom lung an inkham no sikin khahei khah ai tlung a nit.

²²Pathianin a sinthotheinan mi râthei a khâi inrikiang a; Pathianin sin a thon chu mi sualhei an thi ngai.

²³Pathianin izôkriama ringin in-om a ti, Khanniseh, zoro tin an chungah a mit a fûk mai ngai.

²⁴Zoro sôt inote rangin mi sualhei chu chung an tuar a, Loisûl angkan an thêm nôk zel ngai a, Buvui ichun tâk angkah an nit ngai.

²⁵Hingkan thil tlung ngai mak tûm â ti thei? Ki ṭonghei idik mak, â ti thei rang tûm â om?