Read Biete JOBA 27 Bible Online

JOBA 27 - Biete bible

JOBA 27

¹Khanchu, Joba khan hingka hin a sâm a: Ke dikna ne heng pêk a, ki ringnun intak taka ne siamtu, Tinrêngthothei Pathian riming ichingin vâni ker sâm,

³Ki damsunga Pathian rithuak, Ki nârah a om sung chu,

⁴Ki bâiin thu ṭha no isîr no ni a, Ke lei khomin thuno ril tlak no nih.

⁵Nangmani khah thiam nangni inchang tlak no ning; Ki thi nî dênin ke dik iti kî sang khap rang a nit.

⁶Ke dikzia hih sang khap mai ki ta, Ki damsungin ki thu phial no ning e, Ki sia neh ṭha riatna ai fel vang a nit.

⁷Ne suk ne suan murdi chu mi sual angkan, Ne doitu chu mi dik ino angkan intuangin om riseh.

⁸Pathian ngaisak inohei ta rangin im itûng rang a om? 2 Pathianin a nôl a, a ringna ilah pêk a nitin te.

⁹Intaknan a hong chîmin, Pathianin an ṭapna â kuar lei sung pêk a tîm a?

¹⁰Tinrêngthotheia chungah lôm a tîm a? Pathian chu tiklâi khomin isam mai a tîm a?

¹¹Pathian sinthotheizia nangni inrisei ki ta, Tinrêngthothei Pathian roisak khah thup no ning e.

¹²Nangmani ngêi khomin hihei hih nin mu riai tâk a; Ithôm omzia boia nin iṭong mai hi?

¹³Pathianin mi pualoihei dongtum ranga a înkung neh, Tinrêngthotheian mi tôksolhei dong ranga a înkung chu hihei hih a nit:

¹⁴Nai itam takkah nei khom seh, Ridoinaah khandaiin thi vang an ti; An irila râ naihei khan fâk khop nei tlak no nih.

¹⁵An richi la ring isunhei khom ripuiin thîng an ta, An nupuihei khomin sûnna zoro nei no nih.

¹⁶Mi sualhei khan tep zoiloi tangkarua neh silbom bûm inpông khom seh,

¹⁷Silbom an ibûm inpông khah mi dikhein la sil an ta, An tangkarua khom mi ningsiat sin inohei khan lar sem an ti.

¹⁸An in sin khah âiomza zêl angkah pai a nit a, Loi rungna ranga iṭu angkah pai nîng a ti.

¹⁹Richong takkan an zâl a, an in kârin an sum armang vang a, An hang ṭhang tenan chu îte nei khâi mak.

²⁰Tuiilian angkan ṭina inrîtin ibô zut a ta; Zânah phâivosimpuiin sêm inrimang a ti.

²¹Sak ithlîn sêm inrimang pai a ta; An omna mun ata sêm invuang pai a ti.

²²Lungkhamna boiin inuai bit a ta, A sinthotheina maah khan lâizâm tho duai duai an ti.

²³Lâizâm an tho lâiin phâivosimpui khah irî vung vung a ta, Ân rimang theina rithaah khan iṭhi titak a ti.