Read Biete JOBA 28 Bible Online

JOBA 28 - Biete bible

JOBA 28

¹[5] Tangkarua choisuakna khur a om a, Rângkachak rithîtna mun khom a om a,

²Thîr chu rinêng ata choih suak a nit a, Sumsen chu lung ata hâl inzôi a nit.

³Mihein izîng inthûk munhei an rifang a, Rinêng mun inthûkhei an lût a, Izîng richel khapa lung iomhei an ichoi suak ngai a nit.

⁴Mihei om nonaah khur an choih a, Miriam la sir ngai nona munah. Thil lâk suakna rangin khur a lingin an choih a, Mi riat loiin an khâtin ruia ritûlin sin an itho ngai a nit.

⁵Rinênga rithokah hin fâknêk a vâng a, Kha rinêng ngir khah a ril tiang chu mei angkah a nit.

⁶Rinêng rila lungheiah khan safir lungilu arphûm a, A lungzitah khan rângkachak a om a.

⁷Kha thil choisuakna khur lampui khah rimu khomin mu mak a, Vasatel khom a chungah va lêng ngai mak.

⁸Ramsa hâihei khomin ithlo ngai mak a, Sakeibaknei khom fe ngai mak e.

⁹Mihei khan lungfîmhei an choih a, Mualhei khah a bul zelah an choih ngai.

¹⁰Lungpuihei khom an iver thal a, Lung ilutak takhei an mu suak ngai a.

¹¹Vadung nârhei an choih a, Thil rithuphei chu an inlang suak ngai a.

¹²Khanniseh, vârna rêk chu takâm imu ai nit rang? Riatna khah takâm ai om rang?

¹³Miriamhei lâiah vârna khah imu rang omak a; A lutna dik tak khah tutên an iriat ino a nit.

¹⁴Tuikhanglian neh tuipui inthûk khan, “Vârna khah ki ziangah omak,” an ti a.

¹⁵Rângkachaka richoh thei ni mak a, A man rangin tangkarua ivar suak thei chi ni mak e.

¹⁶Rângkachak rithît liai khan tluk thei mak a, Oniks neh safir lungiluhei khomin a lutna ritlukpui thei mak.

¹⁷Rângkachak neh lungfîm khomin hen thei mak a, Rângkachak kuri ṭha khomin hen thei ual mak.

¹⁸Beril neh Krustal lungiluhei neh khom inrichak rual ni mak a, A nit, vârna man chu lungilu man nêkan khom ai tam ual a nit.

¹⁹Ethiopia ram lungilu topaz khomin tluk mak a, Rângkachak rithît infâi liai nêkan khom vârna chu a lut ual.

²⁰A nitin teh, vârna khah taka rithoka suak mani? Riatna khah taka om mani?

²¹Thil iring khatka lua khomin an mu thei nona rangah ithup a nit a, Chungavuang ivahei ata ithup khap a nit.

²²Thina neh rimangripna khan, “Â rî chu kin ibengin a riat,” an ti a.

²³Pathian bangin a lampui khah a riat a, Amah bang a nit, vârna omna mun khom â ria.

²⁴Rinêng mongna ten a mu thei a, Rivân nuaia thil tinrêng hih ai mu riai a nit.

²⁵Pathianin phâivua ritha a pêk lâi neh, Tuikhanglian rizat rang dôr a khang lâiah khan;

²⁶Pathianin ruatui sûr rang dân a rêl infel lâi neh, Khuarî neh khothlâr lampui a siam lâiah khan;

²⁷Kha zoro takah khan vârna khah a mu a, ân puang indar a; Ân det a, a sui suak a.

²⁸Pathianin miriam ziangah khan, “Ringai roh, PUMAPA ṭi hi vârna a nit, Thil ṭha no nung isong hi riatthiamna chu a nit,” a ti a.