Read Biete JOBA 29 Bible Online

JOBA 29 - Biete bible

JOBA 29

¹Joba khan a thusîr izom nôkin hingka hin a ti a: Zoro thleng a lei ife tâkhei a, Pathianin a ne donsui sûnhei khah ker ngai vang e!

³Pathian khah ki ziangah a om mai ngai a, Izîng richel chit kârah ki lôn lâiin ivâr a ne pêk ngai a.

⁴Kha sûnhei khah vângisak takka ki om lâi a nit a, Pathianin ne pôl a ki insungkua a sunghual lâi a nit a,

⁵Tinrêngthothei Pathian khah ki zianga omin, Ki naihei khan an ner khîl tîng ngai a.

⁶Ki serât neh kêlhein dût an isua tam a, Lungchorot bil rinêngah khom ki oliv kunghei an thuar dur dur a.

⁷Kho ulianhei rimukhômna munah, An lâiah ṭhungmun ken rifûk lâiah khan,

⁸Tlangvâlhein an ne mu kaneh an rikiang a, Ulianhei khan marit ne thon an iding ngai a.

⁹Ruaituhei an ṭong lâi khom an ringam a; An kutin an bâi a hup a.

¹⁰Milianhei khom an dâi chup a, An ilei khah an idangah a kop khap a,

¹¹Ki thusîr iriahein an nen pâk a, Ne mutuhein an ne chôiinrisâng a,

¹²Mi riangvâi ṭangpui ringaia ṭaphei ki san isua a, Ṭangpuitu nei ino farahei khom khah ki ṭangpui ngai a.

¹³Thi rangto lunginzîng taka omhei khan ditsakna an ne lan a, Numeihei khom râiifân takkan ken om ngai a.

¹⁴Dikna khah silbomin ki mang a, Roirêlna dik khah ki zakorfual neh ki lukhum a nit.

¹⁵Mitdel rangin mit ki nit a, Kebâi rangin ke ki nit.

¹⁶Risamhei rangin pa ki nit a, Buaina tong ki mêlriatloihei thubuai khom ki ngaitua pêk ngai a.

¹⁷Mi nunterhei thuneina ken boi a, An întuanghei khom ki sanisua ngai.

¹⁸Ring dam isôt rangin ker sabei a, “Lungringam takkan ki insungah thîng ki ti,” ki ti a.

¹⁹Thing arzunghei tui îchia mai ngai angkah ki lei nit a, Â ṭanghei rido înrizil pêk mai ngai angkah ki nit a.

²⁰Mi tukhomin an nen pâk mai ngai a, Ker tha khah tiklâi khomin rizal tlak ngai mak a.

²¹Mihein sabei takkan ki tiang an ibeng an do a, Ki ṭongbâi suak ingâkin an dâi chup a.

²²Ki ṭong zoin chu îte ibôk rua nei khâi ngai mak a, Ki thusîr khah rua rimal itla angkan an ikuarah a lût a.

²³Mi tinin rua sûr masa an ingâk ngai angkan ki thu an ngâk a, Loi sinthotuhein rua nungkhôn an ilôm ngai angkan an lôm a,

²⁴An beidong lâiin râifân ki sak a, Ki râifân mêl khan anni chu ân har a.

²⁵An lampui rô rang ker thlang pêk a, an ruaitun ke ṭhung a, Sipai lôm lâiah rêng angkan anni chu ke ruai a, An lungzîng lâiin thlangam ki sak ngai.