Read Biete JOBA 30 Bible Online

JOBA 30 - Biete bible

JOBA 30

¹Khan atûn chu ki nêka naipang ualhei khan an ne nui a; An pahei khom ki bera lôm enkoltu mangmunboi, Ki uihei risanpui rang tak ilua kî nuam inohei an nit.

²Ritha ṭuai tâk miriam lôm an nit a, An ibân ritha ṭuai tâk khah mangmun ki la înnei rang mani?

³Risam neh voniṭâmin thing rizung an ifêp a, Ram ril mun inthimheiah khan an rivâk vêl ngai.

⁴Ramchâra sûlhei ipotin an fâk a, Inikna nei ino Junipar rizunghei tena an fâk ngai.

⁵Mi lâia rithokin ûm rizûl an nit a, Inru angkan an iuai pêk ngai.

⁶Ipûkheiah an om a, ṭênkhuruk kâr neh lungpui ribeiheiah khan, An iom ngai a nit.

⁷Mun inthim loisûl nuaiheiah ramsahei angkan an irung a, Sûlribuk nuaiheiah khan an ribuk ngut ngai a.

⁸Mi chanlamboi neh mangmunboi, Miriama tep inrup khom ni mak e. Ram sunga rithoka ûmisua an nit.

⁹Atûn chu ihongin an ne nuiso a, An thuzer thona bang ken rup chak tâk.

¹⁰Mumâkin an ne nei a, Ki ranga ṭha okin an ribe a, Ki mâia ne hong ichil ten khom an nuam tâk a.

¹¹Pathian khan ki râtna a ne lâk pêk a, Khasikin, ningmur ritêlin an ne idoi tâk a nit.

¹²Ke matiang mipuiin an ne doi a, lâizâm an nen tho a, Ki siatna ranga ridoipui isua rangin an irsiam a nit.

¹³Ke tlân suakna rang an idan khap a, Nen rimang an tum a, tute â khap rang lak omak a.

¹⁴Ki lei rirungna kulpui ichimheiah an zuang lût dûl dûl a, Ki lu chung takah an ne zuk del a.

¹⁵Ṭi lâinan ki sip tâk a, Ki maritomna khah phâivua râng angkan a vun pat a, Ki hamṭhatna khom sûm angkan arkiang zoi tâk.

¹⁶Atûn kî thi rang tâk a nit hih; Ki tuangna lak zâng ual khâi mak a.

¹⁷Zân thluanin ki ruhei a nat ngut ngut a; Ne sê ngut ngut lak ringam tik nei mak a.

¹⁸Pathianin ki zakua ringah a ne man khap a, Ki puanhei â her inrikon chit a.

¹⁹Dialdôkah a ne pai iṭhul a; Pilvut nêka ki ṭhat ualna om khâi mak.

²⁰O Pathian, nang ke sam a, Khan ne sâm viat mak che a; Ki ṭongṭai khomin ner ngai pêk mak che a.

²¹Nun iseh takkan ni ne tôn a, Idîn viat loiin ni nuam ni ne lo a.

²²Phâivosimpui ni nen sêm inlêng a, Rua neh phâivua rât tak ni nen sêm inlêng a.

²³Nangman ki thina rang mun tiang ni ne ṭhui a, Mi murdi ranga mun inkungah khan Ne ṭhui ni ti iti ki riat.

²⁴Dengtheina irkhû hih îtho rang im kut nî tlâk mai a, Îte chang thei ino, lungkham ingêntu chungah hin?

²⁵Mi buaina tonghei rang ṭap mang im a? Ṭangpui ringaihei ṭangpui ngai mang im a?

²⁶Thil iṭha ki tûng lâiin thil ṭhano a zuang tlung a, Ivâr ki ngâk a, buaina zîngrichel a zuang tlung tâk a.

²⁷Lungkângna neh natna isân phorin ki om a, Sûn tin tin dengtheinan a ne idel tâk a nit.

²⁸Inî em sik ni loiin ki mêl a nûm chit tâk a, Mipui ribûmnaah iding pumin ṭangpuina ki zong a.

²⁹Ki rôl irî chu sihalhei, osṭikhei irâm angkan, Beidong ngaisiat â ruai ngiai a.

³⁰Ki vun a kângindak tâk a, arkhok a, Ki taksa khom ai lum vung vung a nit.

³¹Râifânna irîhoi ki lei ringaina ngai munah khan, Atûn chu beidonga ṭap irung bang ki riat tâk.