Read Biete JOBA 31 Bible Online

JOBA 31 - Biete bible

JOBA 31

¹Taksa rizukna lungril inei puma, Nungâk irîm tlak loi rangin ṭong ken kung a.

²Tinrêngthothei Pathianin im ei rang sin ai tho? Miriam sinthohei chu ingkam ai thung?

³Mi sualhei rang siatna neh, Thilsual thotuhei rang vânduaina thlun pêk ni mak im a?

⁴Ki thiltho tin Pathianin a riat khai a, Ki kalchôi tin ai mu riai a nit.

⁵Pualoi takkan sin lei tho ngai mang ki ti ngam a, Tute khom ilêm rang lei tum ngai mang e.

⁶Pathianin var mun idik takin ne var sela, Ke dikzia hih mûng a ti.

⁷Lampui dika rithokin ki pêt rimang a, Ki mitin sualah a ne ṭhui a, Ki kut hih sual ikop an nitin chu,

⁸Ki bu invâng khah mi danghein ne sela, Ki chimuhei khom ipot inrimang vang riseh.

⁹Ki bungtualbômhei nupui ke dit a, A inkot bula ribin ki lei iruang ngaiin chu,

¹⁰Ki nupui khan mi dang bu er sela, Mi dangin zâlpui riseh.

¹¹Khangkana thonsualna kha chu sualna lian tak, Roirêltu khan thina ten ân tuang rang a nit.

¹²Khangkana sual khah kâng inrimang vang thei mei a nit a, Ki thilnei murdi kâng infâi riai a ti.

¹³Ke somnuhei, ke sompahei khan ki chunga an nuarna thu, Lei ringaiin an chungah idik takkan ki ngaitua pêk non chu,

¹⁴Ingkam Pathian a zuang tikin ki tong ngam rang? Ne rêl ranga a zuang tikin im ki ti rang tâk?

¹⁵Keima ne siamtu Pathian khah ke som isiamtu ngir a nit a, A kut suak korong kin nit.

¹⁶Inrianghei iṭangpui rangin ki tik inseh ngai mang a; Numeihei lunginzîngin siam tlak ngai mang e.

¹⁷Ki khâta bu ki nêk lâi khomin, Farahei khah voniṭâmin inroh ngai mang e.

¹⁸Anni chu an naipang lâi ata pa angkan ki enkol a, An tesen lâi ata kî donsui ngai a nit.

¹⁹Tukhom silbom nei loia vâi manih, Ihâk rang nei loia lêngivâi manih ki mu zoron,

²⁰Ki bera mul ngêia siam silbomhein ki tuam inlum ngai a, Khanchu, ani khan a lungril murdin a nen pâk ngai a.

²¹Roirêlnaah inê ngêt ki ti iti ireh saiin, Farahei ki lei lêm ngaia a nitin chu,

²²Ke bânhei hih a bulah kiak sela, Ki dârhei hih rikhêng pai riseh.

²³Pathian kuttum intuang rang ki ṭi sikin neh; A roinpui tak tak sikin khangkana thil khah kî tho ngam ino a nit.

²⁴Richongnaah hin lei ringat tlak ngai mang a,

²⁵Ker chonheiah khom lei risong tlak ngai mang e.

²⁶Inî chu a vâr ri-el sikah khan chubai lei ûn tlak ngai mang a, Ithla khom â enhoina sik khomin chubai ûn ngai mang e.

²⁷Anmani chôiinrisângin ṭhui invâiin lei om tlak ngai mang a, Anmani marit ithon ki kut khom fôp ngai mang e.

²⁸Khangkah taka sualna chu thina ten idêna kuttum itho rang a nit, Tinrêngthothei Pathianin ai phial a nit.

²⁹Ke râlhei an tuang zoron râi lei infân tlak ngai mang a, Vânduaina an sik khomin lei lôm ngai mang e.

³⁰Thi riseh itia vâni sâmnan ki bâi mang phal ngai mang a.

³¹Mi ki ompuihei murdîn khualmihei ki lei lômlût mai ngai iti an riat.

³²Khualzin mihei ki inah ki koi lût a, Tolâi dungheiah inriak tlak ngai mang e.

³³Mi danghein an sualhei ithup an tum ngai a, Keimah rêkin chu ki lei ithup tlak ngai ino a nit.

³⁴Mihei ne ti rang iṭin lei om ngai mang a; An ne ngo rang iṭin idâirekkan insungah ribi ṭian ngai mang.

³⁵Ki thu ringaitu rang khatka lua an iom ino rang mani? Ki ṭongbâi tin hih â dik a nit ki ti ngam. Tinrêngthothei Pathian hin ne sâm riseh. Ki tep rangin ne sêltuhei sêlna ṭong hih, Riziak suak riai ni seh ki ti vang na!

³⁶Risong khapkan ki dârah târ ki ta, Rênglukhum angkan ki lu-ah khum ki ti.

³⁷Ki lei isin tâk murdi Pathian iril ki ta, Ingam takkan Amah pan ki ti.

³⁸Ki loi nei lâi hih ki îrûk a nit a, Â neitu diktak ziang ata kî sut pai a nitin chu,

³⁹Manboia â râ bang ki lei ifâk a nit a, Â sintuhei dangindaa kî siam a nitin chu,

⁴⁰Bu neh barli rithûlin, Loi neh rilinghei mông riseh. Joba thusîr chu an mong tâk.