Read Biete JOBA 32 Bible Online

JOBA 32 - Biete bible

JOBA 32

¹Joba khah ṭha arti ngit sikin a mal ithumkahei khan sâm zel khâi mak a.

²Khan a lei ringaiṭiantu Elihua kha Joba chungah a ning a thik tak tak a, a san chu Joba khan thiam archang a, Pathian mo an pêl sikah khan a nit. Elihua khah Barakela naipa, Buz richi, Rama panama mi a nit.

³Joba mal ithumkahei chungah khom a ning a thik a, anni khan Joba sâm rang dân reh mak a, an sâm theinona khan Pathian khah dik ino angkana ân lang tâk sikah khan.

⁴Elihua kha naipang tak a nit sikah khan mi danghei an ṭong zoi riai mâkah ai ngâk ṭian a nit.

⁵Khanchu, hi mi ithumkahei hin Joba khah sâm thei mak iti a mu tenan chu Elihua chu a ning a thik tak tak a.

⁶Elihua khan hingka hin a sâm tâk a: Kei chu naiinpang ki nit a, nangni chu nin ûnlian a, Kî riat khom hih nin ziangah ril ngam mang a.

⁷Ulianhei ṭong sela, Chalrichang ualhein thusîr riseh ki ti a.

⁸A nit, Tinrêngthothei Pathian rithla khah kêng, Miriam zianga zuanga vârna peh ngai.

⁹Kum itam murdi vâr ual mak a, Ulian murdîn thil dik reh riai ual mak.

¹⁰Khasikin, atûnah hin ki ngaidân isîr ki ta, Ne lei ringai pêk rangin nangni kî ngên a nit.

¹¹Nin ṭong sungkah idiar takkan ki lei ringai ṭian a, Ṭong ulian isîr rang nin ngaitua sung khah ki lei ingâk ṭian a nit.

¹²Iṭha takkan nin thusîr ki lei ringai a, Nin lâiah tute khomin Joba dikno zia inlang thei mak chei a, Tutên a thu sâm indong thei mak chei.

¹³Vârna chu imusuakin ingkam nin irbe thei? Nangmani lo nin sam tâk sikin, Joba chu Pathianin a sâm ngêt ai nang tâk a nit.

¹⁴Joba khan nangmani nangni arsônpui a, Keimah neh chu larsôn mang ung e, Khan nin isâm angkah khan chu kî sâm ino rang a nit.

¹⁵Joba, anni chu an ṭong thiam khomin dum khâi mak e; Nang sâmna rang ṭongbâikah khom an inei khâi ino a nit.

¹⁶An dâirek a, iti rang nei loia an iding ṭian sung hih, Kî ngâk ṭian rang im ai nit?

¹⁷Ngâk ṭian no ning, atûnah hin nang kî sâm rang a nit, Ker ngaidân chu nang iril tâng ki ti.

¹⁸Iṭong rangin ngâk thei khâi mang a, Ṭonghei chu idan thei khâi mang.

¹⁹Iṭong rangin zoron ṭum ki mu non chu, Uain ithara sip savun peng angkan kî puak koi rang a nit.

²⁰Ki ti tum hih ki ti bak non chu ki sôl dam mak a, Ki bâi âng ki ta, nang la hang sâm rong.

²¹Hi thu-ah hin ithlop bîk inei tum mang a; A tukhom inpâk ual bîk no ning e.

²²Sâidâr inpâk thiam ngai mang a, khangkah khan tho tan lang, Ne Siamtun a ne ilâk inrimang zel rang a nit.