Read Biete JOBA 33 Bible Online

JOBA 33 - Biete bible

JOBA 33

¹Atûnah hin Joba, ki thu hi ringai inla, Ki îsîr murdi hi iṭha takkan ringai roh.

²Ringai roh, ki bâi âng ki ta, Ke leia chuang chak ṭong chu kî ti rang a nit.

³Lungril idik tak riputa kî ti a nit, Ki thil riat khah idik takkan ki îsîr rang a nit.

⁴Pathian Rithla khan a ne siam a, Tinrêngthotheia rithuak khan ringna a ne ipêk a nit.

⁵Ni theiin chu ne sâm roh, Sirbi lan la, ner derpui roh.

⁶Pathian mitmuah nangma angkah ngir ki nit a, Kei khom ipil ngira siam kêng kî nit.

⁷Khasikah khan ni ne ṭi rang ni mak a, Kei khomin nang nor rai bâk no ning.

⁸Ni thusîr khah ki riat a, Ni ṭongbâi suak ngêi khah kî riat a nit.

⁹“Sualna zel nei mang a, ki irthiang a nit; Sêlnaboi ki nit a, thonchâi îte nei mang e.

¹⁰Khan Pathianin ne demna rang a zong a, Â râlin a ne be tâk a,

¹¹Ki keah kolbun a nen bun a; Ki chângna tinrêng a ne en chak a,” ni ti a.

¹²Ringai roh, Joba, hi thilah hin ni îdik ino a nit, Pathian chu miriam nêka roinpui ual a nit.

¹³Bâikah khoma nang a sâm no sikin, Ithôm Pathian chu ni irderpui hi.

¹⁴Pathianin lam dang dangin thu â sîr a, Khanniseh, tutên a ṭong khah ringai ngai mak a.

¹⁵Zâlmunah an zâl a, inrimu nik takka an in lâiin, Rimangheiah neh inlârnahein an ziangah thu â sîr ngai.

¹⁶A ṭong ringai ngêt rangin an ikuar â ong a, A rilna ṭonghei sikah khan an rilo ân thing ngai.

¹⁷An sual sin mai ngai inringam rangin Pathian chu a ṭong a, Lârripâkna ata ân zôk ngai.

¹⁸Anni chu inrimanga an om rang phal ngai mak a; Thina ata anni chu a înzôk ngai a nit.

¹⁹Pathianin natna mangin miriam â sôi ngai a, A takpum chu natna ân tuam pêk ngai.

²⁰Fâk rizukna rêng rêng nei ngai mak a, Fâk itui tak tak khom luaksuak iomin â lang ngai.

²¹An taksa chu a kông tîr tîr a, Ru khorong bangin an om ngai.

²²Mithi khua an nâi thiai mai tâk a, An ringna khah ai boi lôk lôk tâk a nit.

²³Pathian Angel sâng itamka lâia khatka lua, Anmani ṭangpuia miriam tho rang idik tak iriltu om sela chu o!

²⁴Anmani lunginkhamin, “Anni chu mithi khuaah infe no roh, Anmani ritlanna man ki mu tâk e,” ti seh.

²⁵An taksa chu hong vâng inthar nôk sela; An vânglâi sûnhei chu hong riher kîr nôk riseh.

²⁶Pathian ziangah ṭongṭai an ta, lei ditsak a ti; Pathian mêl chu râifân takkan mûng an ta; An ta rangin Pathianin thilhei rêl inṭha pêk nôk a ti.

²⁷Vântlâng lâiah mimal tinin, “Ki lei îsual tâk a nit. Thil idik lei sin ngai mang a, khan Pathianin a ne lai zua a nit.

²⁸Mithihei khuaah fe loiin a nen om a, Ki lai ring mai a nit,” la tîng an ti.

²⁹Pathianin hi thilhei murdi hih a sin mai mai ngai a;

³⁰Thlân bâia rithokin miriam ringna kha ân zôk a, Ringnun fânna a înnei ngai a nit.

³¹Atûnah hin Joba, iṭha takkan ki ṭong hih lei ringai roh; Dâirek inla, ki lai ṭong mai rang a nit.

³²Ti tum nî nei a om duaiin chu ti roh, lei ringai bak ki ti; Îte thup no roh, ne dikzia â ria kî nuam a nit.

³³Ti tum ni nei non chu dâirek inla ki ṭong ringai roh, Vârna nang inrisei ki ti.