Read Biete JOBA 34 Bible Online

JOBA 34 - Biete bible

JOBA 34

¹Khanchu, Elihua khan â sîr mai a, Nangni mi vârhei o, ki ṭong ringai rei, Nangni mi thiamhei o, nin ikuar lei sung rei.

³Nin bâia nin ritemin bu tui chu nin riat thei a, Khan vârna ṭonghei chu nin ringai khomin reh thei mak chei.

⁴Â dik chu rithlang ei ta, Thil iṭha chu munkan lei ringaitua tlâng rei.

⁵Joba hin, “Mi ṭha ki nit a, Khanniseh, Pathian khan ke dikna a ne nôl pêk a.

⁶Ke dik pum khomin milakin a ne be a, Thonchâi ino pumin ithipui rang dôran a ne iphop a nit,” a ti a.

⁷Joba angkana miriam hih nin mu ngai tâk im? Pathian khom marit tho tlak ino a nit.

⁸Mi pualoihei neh inlôm a nuam a, Mi sualhei neh rizui ngai mi a nit.

⁹“Pathian lungdo sin hih miriam rangin, Rifena îte om tlak mak,” a ti a.

¹⁰Nangmani â rethiam mihei khan ner ngai pêk rei; Thil dikino chu Tinrêngthothei Pathianin sin a tîm a?

¹¹Mihei chu an sintho lam angkah takin loman a pêk ngai a, An nit lam angkah takin anni khah a thung ngai.

¹²Tinrêngthothei Pathian chu sual sin tlak ngai mak a; Tu chungah khom dik ino takkan roirêl ngai mak.

¹³Pathian khan a sinthotheina kha mi dang ata ai dong mani? Tu miriam manin rammual irâktun ai siam mani?

¹⁴Pathianin ringna rithuak chu lah kîr nôk selan chu,

¹⁵Mi murdi hih thi riai tâng an ta, Miriam chu ipilah kîr nôk tâng an ti.

¹⁶Mi vâr ni nitin chu amahih ringai inla, Ki thusîrah hin ne kuar sung roh.

¹⁷Pathian ifel khah thiamno ni închang mani? Dikna hih a nel ngaiin nî be mani?

¹⁸Pathianin rênghei neh roirêltuhei khah an isual a, Mangmunboi an changin chu thiamno ân chang ngai.

¹⁹Ruaituhei tiang ṭang ual mak a, Inrianghei ihengin richonghei ditsak ual ngai mak. Mi tin ama kutsuak korong an nit.

²⁰Mi tukhom zânka thlâkin ei ithi thei zel a nit. Pathianin kut a zuk iṭhum a, an rimang tâk a; Mi rât tak khom ritha sua nang loiin a that ngai a.

²¹Miriamhei omdân a mu riai a, An kalchôina tin ai en chak ngai a nit.

²²Pathian ata mi sual ithup thei rang, Izîng richel khap zel omak.

²³Miriam chunga a roirêl rang zoro, Pathianin tute ai khit pêk omak.

²⁴Ruaituhei a khâi pai a, an rithûlin mi dang a sia a, A ta rangin an thurchi lei isui bak nang pêk mak e.

²⁵An sintho chu a riat a; Zânah anni chu a pai iṭhul a, â nuaibit ngai.

²⁶Mi sualhei chu mi tin mitmuah kuttum a tho a,

²⁷Amah zui khâi loia, A thupêk îten an be khâi no sikah khan.

²⁸Inrianghei chu Pathian tianga ṭap irung rangin an siam a, Iṭangpui ranga an koina rôl khah a lei riat tâk a.

²⁹Pathian chu a om ṭian khomin tûm â dem thei rang? A mêl a thup lâiin tûm a mu thei?

³⁰Pathian ngaisak inohei an chungah an inlal nona rangin, Namhei khan îte tho thei nei mak e.

³¹Joba, ni sualhei Pathian ziangah inrilangin, Isual nôk khâi loi rangin ṭong nen kung tâk im?

³²Ni thonsualhei nang inmu rangin Pathian ingênin, Thil isualhei tho khâi loi rangin ni lei inkung tâk ngai im?

³³Pathian sintho isêl ṭiankan, Nî nuam khah nang isin pêk rangin nî tûng mani? Thuthlûkna khah nangma siam rang a nit, keimah ni mang; Atûnah hin im ner ngai dân ne ril roh.

³⁴Riatna nei neh mi vâr murdin chu, Ki thusîr hih an riatin ne pompui an ti.

³⁵Joba hin îte riatna boia ai ṭong pipai a nit, Ai ti murdi hih omzia boi a nit ne tipui an ti.

³⁶Joba thusîr rêng rêng hih ngaitua riai unla, Mi sual angkah taka ṭong a nit iti reh thei nin ti.

³⁷A sualhei ibôksan arhel a; Ei rêngka maah musit takkan Pathian khah kut a înṭâk a nit.