Read Biete JOBA 35 Bible Online

JOBA 35 - Biete bible

JOBA 35

¹Elihua khan a la sîr mai a, Pathian mitmuah mi dik ki nit, nî ti hih, Joba, nî tîn dik ino a nit.

³“Thilsual ki tho manih, ki tho no manih hin, Îm ni ta rangin ân khôkna ai om a, Ki ta rang khomin im rifena ai om,” nî ti mani?

⁴Nangmah neh ni malhei khom kî sâm rang a nit.

⁵Rivân tiang khih hang en ta, sûmhei khih an risâng vang na!

⁶Ne sual mai mai khomin Pathian ta rangin im ân khôkna a om? Vêl izâkah thil dikino ni tho khomin amah chu ân buai ngai im a?

⁷Mi fel tak ni nit khomin Pathian ni ṭangpui ngai im a? Nangma ziang ata Pathianin im ai dong a om a?

⁸Ni sualna sika â tuang chu ni miriam champui bang an nit a, Ni ṭhatna khom miriam ta rang bang a nit.

⁹Nuamlona a natinsatin chu mi an irung ngai a, Anni ṭangpui rangin mi dang an isam ngai.

¹⁰Anmani siamtu Pathian tiang chu ngat ngai mak a, An lunginzîng lâia sabeina peh ngaitu tiang ngat ngai mak.

¹¹Ramsahei nêka riatna inthûk ual ne petu, Chungavuang iva nêka ivâr uala ne siamtu Pathian tiang ngat ngai mak.

¹²Ṭangpuina zongin an ṭap a, khan Pathianin sâm mak a, Lârripâk neh mi sual tak an nit sikah khan.

¹³An iṭap suak khah â tlong a nit a; Tinrêngthothei Pathian khan anni chu en no nia, ringai no nih.

¹⁴Joba, Pathian mu thei mang ni ti a, Khan lei ngâk ngêi ngêi roh, Ni chung thu chu a makunga om a nit.

¹⁵Pathianin ningthikin kuttum a tho zel no sikin neh, Sualna khah a theimâk zel no sikin,

¹⁶Joba hin nî ṭong pipai a nit; Îte reh loiin nî ṭong a nit iti ai fel a nit.