Read Biete JOBA 36 Bible Online

JOBA 36 - Biete bible

JOBA 36

¹Elihua khan a la sîr mai a, Tuang diar ual inla, la hang ringai nôk hi roh, Pathian rimingin iti rang ki lai nei mai a nit.

³Ki riatna chu arzat a; kî riat chu mang ki ti. Pathian, ne siamtu dikzia ki înlang rang a nit.

⁴Ki thusîr hih thu no ni mak iti reh roh, Ni matonah hin mi vâr dik chu ai om a nit.

⁵Pathian chu a rât rai a, tute musit ngai mak a, Tinrêng ai riat riai a nit.

⁶Mi pualoihei zua ngai mak a, Mi riangvâihei idik takkan roi a rêl pêk ngai.

⁷Mi felhei chu a sunghual a; Rênghei angkan rêngṭhungmunah ân ṭhung a, Chôiinrisângin a în-om mai ngai a nit.

⁸Khanniseh, mi zingziria khitin an om a, An sintho sika an tuangin chu,

⁹Pathian khan an sualhei neh an ripâknahei a înriat ngai a nit.

¹⁰A rilna ṭong ringai rangin a ti a, An sual rilet rangin thu a pêk ngai.

¹¹Pathian thu zôma a sin an thon chu, An damsunghei khah thlangam neh vângisakin an mang inhek ngai.

¹²Khanniseh, he ringai loia an omin chu, Khandaiin ithat nîng an ta, tute riat loiin mithi khua tiang mual khum an ti.

¹³Pathian nei ino mihei chu ningmurin an om mai a, Deng ân thei khomin ṭangpuina zongin ṭongṭai ngai mak.

¹⁴An vânglâi takin an thi a, Mualinphoi takkan an rimang ngai.

¹⁵Tuangna mangin Pathianin mi ân risei a, Intakna mangin an mit ân vâr pêk ngai.

¹⁶Pathianin buaina ata nang a kêl isua a, Zôk riamna munah rithuak rizang takkan nang ân om a; Ni docham chu fâk itui murdi a însip tâk a nit.

¹⁷Khanniseh, atûn chu ni sual man ni tuang tâk a, Idik takkan roi irêl pêk ni nit tâk.

¹⁸Richong rizuknan nang ṭhui inrimang no seh, Leprûkna tam tak sikin ilêmin om no roh.

¹⁹Ner chongna neh ner thaneina murdi khan, Ni buaina a înrikiang rang tâk nî sôn mani?

²⁰Zân hong itlung rang khah ngâkmo no roh, Mihei an omna muna an rimang ngai zoro a nit.

²¹Sual tiang ri-ôn loi rangin ridîn roh. Thilsual ni tho nona rangin intak nî tuang a nit.

²²Pathian ritha roinpui zia chu remai inla, Minriseitu roinpui tak a nit.

²³Pathianin a sin rang khah tûm â ril thei rang? Thondik mak che, tûm â ti thei rang a?

²⁴A sintho roinpuihei khah remai inla, Mihein inpâkna lan an ichôiinrisâng ngai a nit.

²⁵Mi tinin a sintho khah an mu tâk a; Khan ilah taka rithok bangin an ithlîr ngai a nit.

²⁶Pathian roinpuizia hi ei iriat zoi thei ino a nit, Ingka dôra ûnlian im ai nit sui sua phâk ni mak.

²⁷Rinêng ata tui ilatu chu Pathian a nit a; Tui rihu khah rua rimal rithiang a închang ngai a nit.

²⁸Rivâna sûmhei ata rua ân sûr a, Miriamhei ta rang ruaputin ân sûr ngai a.

²⁹Sûm risem dânhei hih miriamin an riat thei im a? Pathian omna rivân rifanga khuarî ân rît dur dur dânhei hih?

³⁰Khothlâr rivân isua pharkan ân rilek a, Khan tuipui inthûkhei chu a zîng khap mai a.

³¹Hingka hih namhei roi a sak pêk dân chu a nit, Fâk itamkah ai pêk a nit.

³²Iṭêk khah â fûn ngit a, Ai tum tak dêng ifuh rangin â tlâk ngai.

³³Khuarî irî dur dur khan rua neh phâivua tho rang a lei inpuang a, Ranhei khomin a zuang nâi tâkzia an iriat a nit.