Read Biete JOBA 37 Bible Online

JOBA 37 - Biete bible

JOBA 37

¹Thlipui sikah khan ker lo ân thing a, Ke lung a înthing dup dup a nit.

²Nin rêngkan Pathian rôl hih ringai ta u, A bâi ata irî natinsat tak zuang isuak chu.

³Rivân nuai muntinah khothlâr ân rilek a, Kôlkomonga rithoka kiangtiang kôlkomong idênin.

⁴Â nung zelah khan a rôl irî vung vung irian a om a, A rôl irî inthang tak kha â rî vung vung a, Kha sungah khan khothlâr khah arlek zap zap mai a.

⁵Pathian thupêkin thil rikhêl tak takhei a hong om a, Ei iriatthiam phâk ino thil rikhêlhei chu.

⁶Rinêng chunga thla rangin ivur khah thu a pêk a; Khaangkan rinêng inzo chît rangin rua sângsari a zuk tir a.

⁷Miriamhei sintho chu ân ringam a, Ama sintho a nit iti mi murdi ân lang pêk a.

⁸Ramsahei khomin ribîkna an zong a, An omna ipûkheiah an ibok ṭian ngai a.

⁹Sim tianga rithokin phâivosimpui a hong râng a, Mâr tianga rithokin mi rêt ngai ithli dâi a hong râng a.

¹⁰Pathian rithuak khan ivur kang a siam a, Tuipui rizat tak khom ivur kang a închang ngai a nit.

¹¹Sûm isa tak khah tui ân pom a, Khothlâr chu sûm ata a zuang rilek a,

¹²Pathian thupêk angkan an rilek zap zap a. Rammual pumpuiah a thu angkan thil an tho mai ngai a.

¹³Miriamhei kuttum thonan manih, rinêng inṭhatnan manih, A ditsakna inlangnan manih, Pathianin rua a zuk tir a.

¹⁴Joba, hihei hih lei ringaitua ta; Pathian thil rikhêl sin murdi hih ngaitua roh.

¹⁵Pathianin sûm a thunun dân neh, Khothlâr ân rilek dân hi nî riat mani?

¹⁶Rivânah ingkam sûm â lêng dân nî riat mani? Pathian kutthiamna sintho rikhêl chu nî riat mani?

¹⁷Sim ithli lumin ram a hong inuai vêl a, Ni zakuahei chu ner thlânin a dui zoi ngai.

¹⁸Pathian chu rivân nî kâipharpui thei mani? Chik dôrka khirin ni în-om thei rang mani?

¹⁹Pathian zianga iti rua nen risei roh; Ngaitua rang dân reh khâi mang ung a; Iti rua khom kin inei khâi ino a nit.

²⁰Pathian neh risôn rangin ngên no ning; Îrang ngân im ne sehchit rangin zoron ṭum kî pêk rang?

²¹Atûnah hin rivâna inî chu ar-el zap a; A vâr nat sikin en ngam mang me a; Ithlîn rivân chu a sêm infâi liai tâk a.

²²Mâr tianga rithokin ri-el takkan a hong vâr a; Pathian chu roinpui rikhêl takkan a zuang a.

²³Pathian sinthotheina chu a roinpui sikin nâi ngam mang me a; Diknan roi a rêl a, thleibîk nei mak a, tute musit ngai mak.

²⁴Khasikin, mi tinin amah chu an ṭi a, Ivâra ribe mihei chu tute uksak ngai mak.