Read Biete JOBA 38 Bible Online

JOBA 38 - Biete bible

JOBA 38

¹Khanungchu, PUMAPA khan thlipuia rithokin Joba chu hingka hin a sâm a:

²Riatna inmôl neh a thu fûn iboi ṭonghei a, Ki vârna sêltu hih tûm nî nit?

³Atûnah hin pânsal takkan iding inla, Thu nang ki irdon rang a nit, ne sâm roh.

⁴Rinêng ringatna ki phûm lâiah khan taktiang im nî om? Hi thu hih nî riat titak a nitin chu ne ril roh.

⁵A lian rang dôr khah tu înrifûk manih ni riat im? Arzat rang dôr khah tu irkhî manih ni riat im?

⁶Rinêng khah îchunga ringat im ai nit? A kil lung iphûmtu khah tûm ai nit?

⁷Zîng kôlrisama ârsihei an fe dûl dûl a, Angelhei râifâna an ipâi lâi khah.

⁸Tuipui chu a omna ata, A hong luang zun zun lâiah khan tûm a lei idan inchât?

⁹Tuipui sûma rikhûtu neh, Izînga tuamtu khah keimah kêng kî nit.

¹⁰A chîm rang ten rî ki khang pêk a, Â danna neh khârna ranghei isiamin kî sia ngai a nit.

¹¹“Hi tenah bang hi hong dîl inla, khêl tlak no roh. Hi tenah hin ner fôn tharât chu ringam riseh,” ki ti a.

¹²Joba, ni suaka rithokin kôlrisam rangin thu ni pêk tâk ngai im? A vâr phutna mun rang ne ril tâk ngai im?

¹³Rinêng chungah khua invârin, An ribîkna ata mi sualhei khah nen lang pam ngai im?

¹⁴Sûn ivârah chu itlâng neh phâihei â lang infel riai a, Puan thlepna ritâl ngut angkan, Pilipok chunga risin idêng angkah dôran â lang infel ngai.

¹⁵Khua hong ivâr chu mi sualhei rangin a vâr ri-el rai a, Thil ṭhano zel tho ngam ngai mak.

¹⁶Tuipui inthûk taka tuinâr chu ni zu sir phâk tâk im? Tuikhanglian iṭuangah ni lôn vêl ngai tâk im?

¹⁷Mithi khua lûtna neh zîng inthim khup lûtna dâikot khah, Nî mu tâk ngai mani?

¹⁸Rammual hih itiaka lian im ai nit ni riat phâk im? Ni riatin chu ne ril roh.

¹⁹Ivâr hih tak ata zuang rithok manih ni riat im? Izîng richel hong rithokna teh nî riat mani?

²⁰An fena rang ten ni ṭhui thei im? Nungtiang ikhîr nôk thei ni tim?

²¹Thei ni ti ki riat hi te! Rammual siam lâiah khan ni lei om tâk a. Ni tar ok tâk hi te!

²²Ivur neh irial ki buk khômna inhei, Ni sir phâk tâk ngai im?

²³Buaina zoroa rang hei, ridoi neh risual sûn heia rangin, Khahei khah kî sia a nit.

²⁴Inî hong suakna mun ne thlo tâk ngai im? Sak ithli hong râng suakna mun ni lei sir tâk im?

²⁵Tuilua luangna rang tuikonghei tûm â siam pêk? Iṭêk lampui isâtpêktu chu tu mani?

²⁶Mi tute omnona ram neh ramchârheiah ruan sûrtu chu tu mani?

²⁷Loisûl iring an hong ṭoi theina ranga, Ram ichâr tuia ân dîltu chu tu mani?

²⁸Rua manih, rido manih khan pa an nei im?

²⁹Tu sûla rithokin im ivur tlin a hong isuak? Rivâna rithoka ivur zuang itla hih tu inei mani?

³⁰Tui inkhalhei kha lung angkan a hong khir a, Tuipui chunghei khom a kang inkhal a.

³¹Siruk khi nî khuap itêl theiin, Sizuchoi inrân khi nî sût iṭhêi thei rang mani?

³²Ârsihei khi a hun bi dik thapah ni însuak theiin, Koloiahei chu ni îruai thei mani?

³³Chungtiang rivân omdânhei khi ni riat im? Rinêngah hin an dânhei khah nî mang thei mani?

³⁴Nang inchôpchit rangin rua sângsari kha, Sûma rithokin nî koi insûr thei mani?

³⁵Khothlâr chu rilek rangin thu peh ngân inla, Ni ziangah izuangin, “Im ki sin rang?” nang ti pêk a tîm?

³⁶Tuiva-arngoi khan ingkan im tui lian rang ai riat? Ârkhong khomin rua chîn rang khah ingkan im ai riat?

³⁷Sûmhei khi itep thei rang khopa tûm vârna nei? Rivân tuipanghei chu ân bua thei rang a?

³⁸Pilvuthei chu hong inkhir a, Ipil kanghei hong inrilom hih tûm ai nit?

³⁹Sakeibakneihei fâk rang ni zong pêk ngai im a? A tehei fâk khop rang ifâk nî pêk thei mani?

⁴⁰An ipûkah an ribîk lâiin, Anitnole, sûlribukah an lei ngâk ṭian lâiah khan.

⁴¹Vaâkhei voniṭâma an vuang diai lâiin, An tehei fâk rang izonga ki tiang an ṭap lâiin, Tûm ifâk â peh ngai?