Read Biete JOBA 39 Bible Online

JOBA 39 - Biete bible

JOBA 39

¹Ramkêlhei intêt ngai zoro ni riat im? Sazuk intêt lâi tak ni mu tâk im?

²Idôra sôt im an tehei an ivong ngai ni riat im? An te zuang suak zoro khah ni riat thap im?

³Tikim an îbok a, naihân ai sê a, An tehei rammual ivârah an zuang inei suak ni riat im?

⁴Ram nuaiah an tehei ithuarin an rât a; An khâtin an lêng a, a puinuhei ziangah kîr nôk khâi ngai mak.

⁵Ram sakuartunghei khah tûm ramkâra â sua? Anni khah izôkriamka ân lêngtu chu tu mani?

⁶Ramchâr khah an omna rangin ki pêk a, Ichi phâiheiah khan anni chu ken om ngai.

⁷Khopui rihu lum ata ilah takah an om a, Tutên anni chu sin intho rangin isôi thei ngai mak.

⁸Mual tlânghei chu an lêngna a nit a, Sûl iring ipet rang an zongna mun a nit.

⁹Selechal khah sin ni întho rang mani? Ni sial inah riak nuam ngân a tîm a?

¹⁰Ruia thlungin âl inkâi thei ni tîm? Rinêng inricham rangin inkâi thei ni tîm?

¹¹Artha a rât ok sikin ni sin intakhei, Nang isin pêk rangin rinpuiin nî nei thei mani?

¹²Ni buhei ni înrithak thei rang mani? Ni rîzôlah bu ni înbûm thei rang mani?

¹³Osṭik khan an rithla zâp â rang tak tak a, Khan tuiva-arngoi angkan vuang thei mak.

¹⁴Osṭik khan artuihei rinêngah a phûm a, Pilvut ilum khan ân lum ngai.

¹⁵Mîn an sir ikhoi thei a, Ramsahein an sir iphuak thei iti zel ngaitua phâk mak.

¹⁶Kha rituihei khah ama ritui ni no angkan a be a, A sôlpuina khah môk chang khom seh ân khôk ti ngai mak.

¹⁷Intloa â siamtu khah keimah ki nit a; Vârna ki înnei ino a nit.

¹⁸Khan a hang itlâna a nitin chu, Sakor neh a chunga chuanghei khom îten ai be no a nit.

¹⁹Joba, sakorhei hi nangma înrât mani? A sêp ikâisûp hi nangma isiam pêk na ai nit?

²⁰Ikhâi angkana vuan irâtin nangma isiam mani? An irâm inrît hi nî siam mani?

²¹Phâizôlah zâl ithakin an keheia rinêng ithâi a, An ritha murdi mangin ridoina munah an itlân lût ngai.

²²Iṭi zel nei mak a, thâidôr omzia rêng rêng reh mak a, Khandai khomin nungkîr intho thei ngai mak.

²³A chunga chuanghei râlthluk chôi khah arsek ruk ruk a, Fei neh thalhei an ritlêk zap zap a.

²⁴Zâl ithaka châng sakorhei chu matiang an itlân a; Bekul iring khan a zâl ân ir a, ngir ṭian thei khâi ngai mak.

²⁵Bekul â ring fengin an nâr an không a; Ridoi rihu khah ilah taka rithok khomin an riat thei a. Ruaituhei thupêk rôl neh an huaizâm khah an riat a.

²⁶Vânlâizôla rimu vuanghei khi nangma înrisei mani? Sim tiang ingata an rithla an iphar hei khi?

²⁷Itlâng pangheia ribu kâi rangin, Mupuihei hin ni thupêk an ingâk ngai mani?

²⁸Lungpui risâng takheiah an om a, Lungpui ikakkâr mun inṭumheiah an riak ngai a.

²⁹Khantaka rithokah khan ifah rang an thlîr ṭian a, Ilah tak tak an imu thei a nit.

³⁰An tehei khomin thisen an idôk a, Saruak omnaah rimuhei chu an ribûm ngai.