Read Biete JOBA 4 Bible Online

JOBA 4 - Biete bible

JOBA 4

¹Elifaza, Teman kho mi khan hingkan a ti a;

²Joba, ni ziangah ṭongbâikah tin lang theimâk ni tîm? Idâirek mai thei lak ni maka na!

³Ringai ta, mi itam takah ni lei inrisei a, Kut rât inohei ni lei inrât tâk a.

⁴Mi rizal, â sôl, â lîrhei kha ni ṭongbâi suakin ân ngîr nôk ngai a.

⁵Dengtheina ni chungah a zuang tlung a, Ner zal neng tâk a, Ni buai chit tâk a.

⁶Pathian iṭi mi ni nitna a hin, Ni ringnun sêlna boi a nit a; Khasikah khan thlangamna neh tûngna ni nei rang ni mak im a?

⁷Ringaitua vang vang ta, Mi ningsiat sin ino tu ngân im inkhôkna sik a, Taktiang im mi ṭha iheng an init nî riat?

⁸Ki lei mu ngai dânin chu, Mihein sualna khah an irît a, Chi angkan siatna khah an tu a, Anni khan siatna neh pualoina khah an iât ngai a nit.

⁹Phâivosimpui angkan Pathianin, A ningthikna thlipuiah khan anni kha ân rimang ngai.

¹⁰Mi siahei kha sakeibakneihei angkan an irungin an ihuk ngai a, Khannisela, Pathianin ân dâirek a, An hâhei â tling pêk ngai.

¹¹Sakeibaknei, ithat rang neh ifah rang nei ino angkan anni kha an thi a, An naihei kha an indar chit tâk a.

¹²Idâirekkan ki ziangah thu a zuang tlung a, Ke kuar bulah a hong chiar sat sat a,

¹³Amakhah inrimu nik zoro lâi takin rimangin ki lei phan a.

¹⁴Iṭin a nen thing a, Ki takril khom ân thing riai a.

¹⁵Rithlân ki mâi a hong huai vut a, Ki chungmul a thoi sup sup a,

¹⁶Pên viatah â ding ṭian ki mu a, Ki en ngit a, khanniseh, im ai nit chu reh thei mang e. Khanungchu, inthim val ata khah rôl ki riat a.

¹⁷“Miriam hih Pathian mitmun mi fel ai nit thei mani? Â siamtu makungah arthiang ai nit thei mani?

¹⁸Pathianin a vântirtônhei khom iam zoi mak a, A vân angelhei chunga lua an felnona ai mu ngai a nit.

¹⁹Rinênga lênghei vânga khah iam zoi a tim a? Ipila siam an nit a. Phelep angkana â rôp nôk zel ranghei vâng khah, Iam zoi a ti nî sôn mani?

²⁰Miriam khah zîng tiang dam vang a ta, Kholoi tiang chu tutên ngaisak loiin an ifam ngai a nit.

²¹A thil nei murdi mîn an lâk pêk riai a, Vârna risam pumin an ithi ngai a nit,” a ti a.