Read Biete JOBA 40 Bible Online

JOBA 40 - Biete bible

JOBA 40

¹Joba, nangman Tinrêngthothei Pathian chu ner sêlpui a, Atûnah hin nî mong rang tâk im, ni lai sâm mai rang im? a ti a.

³Khanchu, Joba khan PUMAPA chu a sâm a: PUMAPA, intlo ṭongin ki lei iṭong tâk a nit. Ingkan im nang ki sâm thei rang a? A dang îte ti tum nei khâi mang e.

⁵Ki ṭong ban rang ki lei iṭong tâk a nit. Îte ti khâi no ning e.

⁶Khanchu, PUMAPA khan thlipuia rithokin Joba chu a sâm nôk a.

⁷Atûnah hin pânsal takkan iding inla, Ki ṭongridonhei hih ne sâm roh.

⁸Thon dik inon ni ne ibe rang mani? Nangmah thiam ichang a, keimah thiamno nen chang nî tum na?

⁹Keima angkah dôran nî rât mani? Ni rôl chu keima dôrah a îring mani?

¹⁰Khangkan a nitin teh ni mânritna neh ner songnaah khan iding inla; Enhoi tak neh roinpui takkan rithluk roh.

¹¹Mi lârripâkhei kha en inla; an chungah ni ningthik khah, Bun suak inla, anni chu intlôm roh.

¹²Mi lârripâkhei chu mît inla, kâi isim roh; Mi sualhei chu an om munah sir nâl chit roh.

¹³An rêngkan rinêngah phûm riai inla, Ithlânah an mâihei khah tuam pêk roh.

¹⁴Khanchu, nang inpâktu masa tak nîng ki ta, Nêna chu nangmah ngêiin nî chang a nit iti ipom ki ti.

¹⁵Sa ṭiom Behemot hih en ta, Nangma angkah ngira keima kutsuak a nit; Serât angkan loisûl a fâk ngai.

¹⁶Khan a rât tlia chu rithapui a nit a; Artharui kha ritha fîp tak a nit.

¹⁷Armei chu sidar thing angkan â ding khap a, A zapui ritharuihei khom a ru neh tak riman khap a nit.

¹⁸A ruhei chu sumsen dôra khir a nit a, A kehei chu thîr thluan angkah a nit.

¹⁹Ki thilsiamhei lâia sa rikhêl tak a nit a, Â siamtu bangin a înê thei a nit.

²⁰Ramsahei ridâina tlângheiah khan, A fâk rang loisûl a mông a.

²¹Rilingbuk nuaiheiah a zâl a, tuichira sûl kârheiah arbîk ngai.

²²Rilingbukhei neh tuipui lâiluanghei khan, An dâilîmah ngammun an pêk ngai.

²³Tui ilian zuang iluang zut zut kha ṭi mak a, Jordan tuiin a mâi a vur zut zut khomin a ning a beiriam ngai.

²⁴Tûm a mithei ituam pêka â man thei rang? Tûm a nârah â vit thei rang?