Read Biete JOBA 41 Bible Online

JOBA 41 - Biete bible

JOBA 41

¹Rikuaiin Leviathan nî man thei mani? Ruiirualin â lei nî khit thei mani?

²A nârah rui ni irthil thal thei mani? Thîrkuaikimin arkhaah ni irthil thei mani?

³Inzôk rangin nang ai ngên rang mani? Lunginkham rangin nang riphat a tîm?

⁴Dam sunga ni sin itho ranga ṭonginkungin, Thu nang rithlungpui a tîm?

⁵Iva angkan vâi ngam ni tîm? Ni nai nungâkhei ridâipui rangin ruiin thlung thei ni tîm?

⁶Inga mantuhein rivai thonan dôr tho an tîm? Rivai mihei khan izuar rangin richan chit an tîm?

⁷A vunah feirikît imangin idôt thei ni tîm? A lu-ah cheppara mangin ikhô thei ni tîm?

⁸A chungah kut hang iṭhum ngân ta, iṭiomzia riang ni ta; Tho nôk tlak khâi ngai no tin.

⁹Leviathan imu kangân chu, An ilung ân chur a, nuaiah an idal paih ngai.

¹⁰Amah isarai rangin tute â hâi tak tak omak a; Tute a makunga ding ngam khom om ngai mak.

¹¹Tu ngân im amah idoia, a la dam mai rang â om? Rivân nuaiah tute zelin thei no nih.

¹²Leviathan kehei thurchi nang iril ki ta, A ruak ṭhatzia neh a râtzia nang lei isîr pêk rong.

¹³Tu ngân im a vun chungita khah â lâi thei rang? Tu ngân im a vun â suniphop thei rang?

¹⁴Tu ngân im arkamhei in âng a, A ha ritlâng bung inrît tak khah â tôn ngam rang?

¹⁵Â ruangah a lip a rân rânin a om a, An ritôn dût a, lung angkana khir a nit.

¹⁶An rithua phui khap sikin, Ithli tena khom a kârah ai thleng thei ino a nit.

¹⁷An rêngkan idet khapkan an riman zit a, Îte khomin iṭhen thei ni mak.

¹⁸Â sim zoron ivâr arlek a, Inî suak angkan a mithei chu ar-el a.

¹⁹A bâia rithokin meichok a suak a, Meirisi lom â det uai uai ngai.

²⁰A nâra rithokin meikhû a hong suak zut zut a, Bêl nuaia loisûl ikâng khûhei angkan a khûk vung vung ngai.

²¹Arthuakin mei ân chok a, A bâia rithokin meichok a hong isuak zut zut a nit.

²²A ring ritha a rât tak tak a, Artongpui murdi iṭin an inthing ngai.

²³A vun rinêmna mun zel omak a, Thîr angkana khir a nit a, sun iphop thei zel ni mak.

²⁴A lungril chu thîr angkana khir a nit a, Bunôilung nuaiitah ual angkana khir a nit.

²⁵A hang thoiin chu mi hâitakhei khom an inthing a, Iṭin an rithla a bâr vîk ngai.

²⁶Khandaia sât khomin iphop thei ni mak a; Ifei hei, thal hei, tangsi rizum khomin sun iphop thei ni mak.

²⁷Thîr khah bupôl angkana thlepin a be a, Chik khom thing imon angkah a nit pêk.

²⁸Thal iṭin lâizâm tho ngai mak a; Sâilia sâi khom vâidi rithe angkah a nit.

²⁹Tôkmol khah bupôl angkah a nit pêk a, Mihein ifeia an îkho khom â thak ilua nem pêk mak a.

³⁰A phûng liphei kha bepil korok rizum var angkah a nit a, Âlkâina môiin[6] rinêng ipok a îrît angkan dialdôkah arbual ngai.

³¹Tuipui inthûk tak kha bêla tui angkan ân ritlok nguan nguan a, Siriak bêla lum angkan ân phûl bur bur ngai a.

³²A fena chu arvân zun zun a, Tuipui chu a huan ribang lungkan a siam a.

³³Rinêng chungah hin amah neh inrichak thei îte omak a; Îte iṭi nei ino sarâng a nit.

³⁴Ramsa risong tak takhei khom îte ben be mak a; Ani chu ramsa hâi tak takhei chunga lêng a nit.