Read Biete JOBA 42 Bible Online

JOBA 42 - Biete bible

JOBA 42

¹Khanungchu, Joba khan PUMAPA khah a sâm a:

²“PUMAPA, tinrêng itho thei ni nit. Nî tum chu idan thei rual ni mak iti ki riat.

³Îte reh loiin ingkan im ni roisakhei hi ki lei isêl tâk na! Kî riatthiam inohei kha ki lei îsîr a nit, Kî riatthiam phâk ino, ki ta rang thil rikhêl tak takhei kha.

⁴Ni ṭong ringai rang neh Ni ṭongridonhei isâm rangin ni ne ti a.

⁵Zoro thlengah khan chu mi îsîra rithok bangin nang ki lei riat a, Khan atûn chu ki mit ngêiin nang kî mu tâk a nit.

⁶Khasik takah khan keimah neh keimah khom hih ker tir a, Ipil kâr neh rivuta ṭhungin ki irlet tâk a nit,” a ti a.

⁷PUMAPA khan Joba ziangah thu â sîr zoiin chu Elifaza ziangah, “Nangmah neh ni mal inikahei chungah ki ning ai thik a nit. Ke som Joba angkan ki thurchi idik takkan isîr mak chei a.

⁸Atûnah hin serâtchal sarikah neh berachal sarikah kâi unla, ke som Joba ziangah fe unla, nin ta rangin hâlrivâm thillan va lan rei. Khante, ke som Joba khan nangni ṭongṭai pêk a ta, a ṭongṭaina lei sâm ki ta, nin invêt lam angkah takin nangni thung no ning e. Ke som Joba angkan ki chungchâng thu idik takkan isîr mak chei u,” a ti a.

⁹Khanchu, Elifaza, Teman mi hei; Bildada, Sahi mi hei; Zofara, Naama mi hei kha an fe a, PUMAPA thupêk angkah takin an tho tâk a. Khante, PUMAPA khan Joba ṭongṭaina khah a lei sâm tâk a.

¹⁰Joban a malhei a ṭongṭai pêk zoiin chu PUMAPA khan Joba chu vângsak inṭumin a siam nôk a, matona ai nei bâk inikah a pêk nôk tâk a.

¹¹Joba urêng ipahei neh a farnuhei, matona a rualchim iluihei murdi kha a ziangah an hong a; a inah ruaiṭhe an rikhîl tlâng a. PUMAPA khan a chunga inkhôk a îthlun pêk murdi sika an ilung khamzia thuhei an iril a, ani khah thlangam an sak a. Mimal tinin sumhei neh rângkachak kutsabithei khah ani chu an hong pêk a.

¹²PUMAPA khan Joba dam sung hun nungkhôn tiangah hin a zoro masa lei ife tâk nêkan ṭhat a vur ual a. Joba khan bera sînglei sângilikah, saringsei sângirukkah, serât sânginikah, sakuartung sângkah ai nei a nit.

¹³Naiipa sarikah neh nai nupang ithumkah a nei a.

¹⁴A nai nupang ulian tak riming khah Jemimai a sak a, â nikna riming khah Keziai, a naipang tak khah Keren Hapuki[7] ai sak a nit.

¹⁵Rammual pumpuiah Joba nainuhei angkana mêl iṭha nupang zel an iom ino a nit. An pa khan an ṭahei neh khan richon lua rangtum a pêk chit a.

¹⁶Joba chu hi nungah hin kum rizalei sômilikah a la dam a, a tuhei neh tu nôkhei khom ai mu phâk a nit.

¹⁷Khanungchu Joba kha tar kûla damin a thi tâk a.