Read Biete JOBA 5 Bible Online

JOBA 5 - Biete bible

JOBA 5

¹Joba, hang isam ta, nang idon an om ngân im a? Vân angel a tu tak im ni pan rang a om ngân im?

²Mi intlo khah inuar pumin a thi a, Mi inmôl khah rizuk inei ṭiankan a thi ngai.

³Mi intlo vângsak inṭumhei ki mu a, Khanniseh, an omna khah vâni ki sâm zel a.

⁴An naihei kha zôkna mu tlak no ni a, Roirêlnaah khan tutên anni khah ithlopin san no nih.

⁵Voniṭâmhein mi intlo bubâl khah fah pêk an ta, Riling kâra ṭoihei ilua khom khah, Archongna khah mi kuatinkamhein rizuk an ti.

⁶Tuangna hi rinêng ata hong isuak ni mak a, Buaina khom hi nuai ata hong imông suak ni mak e.

⁷Meirisi chungtiang ai vuang mai ngai angkah hin, Miriamin ama chungah buaina a îthlun ngai a nit.

⁸Nangmah khah keimah lei nin lang chu, Pathian tiang ngat ki ta, A ziangah ki chungthu ki îthlun rang a nit.

⁹Ani chu thil roinpui tak riat phâk rualino hei, Thil rikhêl tep zoiloihei ithotu a nit.

¹⁰Rinêng chungah rua insûrin, Loihei chu tuiin â fa ngai.

¹¹A nit, Pathian khan ringaiichînhei a chôiinrisâng a, Mi beidonghei khah lômna a pêk ngai.

¹²Mi lêmsiahei thilphan khah lo ân sam ngai a, An thil thohei manchang a suak nona rangin.

¹³Mi vârhei khah an vârriletna ngirah an iôk a, Mi vâr vârriletna thil phanhei khah chanlamboi ân chang pêk ngai.

¹⁴An rangin sûn khovârah zân ân zîng pêk a, Sûn lâiah khom zân angkan an rimai zal ngai.

¹⁵Khannisela, Pathianin mi riangvâihei khah thina ata ân zôk ngai a, Mi risamhei khah sirdetu kut ata a sanisua ngai.

¹⁶Mi riangvâihei khah tûngna a pêk a, Mi sualhei kha chu an bâi a hup pêk ngai.

¹⁷Pathianin mi ai thunun chu a ham a ṭhat e, Khasikin, Tinrêngthotheia rilna kha ringainêp no roh.

¹⁸Pathianin â phop a, a tuam nôk ngai a, A kutin ân nat a, a kut ngirin a îndam nôk ngai a nit.

¹⁹Voi itam takkah buaina tong inla, nang inzôk a ti, Thil ṭha no khan nang tôn no nih.

²⁰Ṭâmpuiah khan thina ata nang inzôk a ta, Ridoinaah khom khandai ata nang inzôk a ti.

²¹Ṭong ikhâ ata nang ihoi a ta, Siat rimangna a zuang tlung khomin nang inzôk a ti.

²²Siatrimangna zuang tlung neh ṭâm tlâk lâiah khan inui ni ta, Ram sarânghei khom ṭi no tin e.

²³Ni loi thoah khan lunghei om no ni a, Ram sarânghei khomin nang tôn no nih.

²⁴Ni puan inah thlangam takkan om ni ta, Ni bera rikul ne thlo khomin rikip ino om no nih.

²⁵Richi suanpâr itam takkah nei ni ta, Phûla loisûl angkan ne rila râhei kha ringzun an ti.

²⁶Bu ât zoro tika fathlu an ichôi ngai angkan, Tar kûla damin ithlânah mualkhum ni ti.

²⁷Joba, ringaituan fel ta, iṭha takkan hang sût ta, Khaangkah tak khah a nit iti ei iriat a nit, Iṭha takkan ngaituan la, ni ṭhatna rangin ipom roh.