Read Biete JOBA 6 Bible Online

JOBA 6 - Biete bible

JOBA 6

¹Khante, Joba khan a sâm a,

²Ki lungzîngna neh vânduaina hih ivar thei ni sela,

³Tuipuia ṭiai nêkan rik ual a ti, Khasikin, ki thu hih a înrum a nit.

⁴Tinrêngthotheia thal khan a ne sun a, A tûr khan ki takpum arfang suak a.

⁵Pathianin a ṭiomna khah keima tiang isongin ân ritlâng tâk, Sakuartung kha loisûl â pet lâiin â râm ngai im a? Serât khan bupôl a fâk lâiin â râm ngai im a?

⁶Inikna nei ino khah ichi pol loiin ifah thei a nit im a? Ârtui bungoi hin im inikna ai nei?

⁷Khaangkan bu rizukna zel nei mang a, Ki ta rangin luaksuak iom a nit.

⁸O ki thil ngên khah mu thei inlang, Pathianin ki lungdo khah ne peh sela chu o.

⁹Pathianin ne nuai rip inuamin, A kut inchângin ne that sela chu o!

¹⁰Khangkan thông a ti iti rian lang chu, Ki natna inrik ok khom sela râifânin ritôp ki ti. Pathian chu arthiang a nit iti ki riat a; Tiklâi khomin a thupêkhei phial ngai mang.

¹¹Ring maina rang ritha im ki la nei a? Sabei rang ual nei khâi loiin ithôm ki lai ring mai hi?

¹²Lung angkana siam im kî nit? Ki taksa khom dârthîr im ai nit tâk?

¹³Mahni risan theina rang ritha nei khâi mang e, Ṭangpui muna rang khom nei khâi mang.

¹⁴Hingkana lungzîng lâiah hin malṭha kî nang a nit; Pathian ki lei iphial a nit le khom, Ki lei iphial a nitno le khom.

¹⁵Khannisela, nangmani ki malhei, Vadungte ṭhâla kang rip ngai angkan nin ne lêm a.

¹⁶Vadunghei, ivur tuia dum zun, Ivur kang riphûm ngut a,

¹⁷Khua a hong luma zôi rimang a, A kuanghei ichâr vang ngai angkah hi nin nit.

¹⁸Khualzinhein kha tui izongin an rivâk kual an rivâk kual a, Ramchârah khan rivâk rivâkin an thi ngai.

¹⁹Tema neh Seba ata khualzinhei khan an zong a,

²⁰An sabeina kha vadung ichâr vang takah khan a mong ngai.

²¹Ki chungah khangkana vadunghei angkah kha nin nit, Ki dengthei tuang nin mu a, Nin rilo a înthing a nit.

²²Thilpêk nangni ngênin, Nin sum neh puan â tlongin ne peh ta u, kî ti mani?

²³Irâl kut ata nen zôk rangin nangni kî ngên mani?

²⁴A ṭhat, nen risei ta u, ke diknona ne ril ta u, Dâirek ki ta, nin ṭong chu ringai ṭian ki ti.

²⁵Thudik hin mi â nê ngai a, Khanniseh, nin ne sêlna hih riderrât thu chanlamboi a nit.

²⁶Rider irât rêng rêng nin ne isôn mani? Lungzîng taka ki thusîr hih chanlamboi ṭong ithoa nin ne ibe mani?

²⁷Farahei kha nin lilâm nuam a, Nin mal ṭhahei ilua khom nin zuar nuam ngai.

²⁸Atûnah hin ne hang en ta u, Nin mâi kungah milak tho no ning e.

²⁹Nungkîr tho unla, thil dik ino tho no rei, Thiamno nen chang no rei, ki thu hi â dik a nit.

³⁰Ki thu sîrah hin im â dik ino â om, Thil dikino khah ki îthlei thei ino nin isôn mani?