Read Biete JOBA 7 Bible Online

JOBA 7 - Biete bible

JOBA 7

¹Rinênga miriam ringnun hi sin intak tak isin rang a nit a, A damsung kha rilofa angkana sin rang a nit.

²Suak, kholoi inî dâi ngâkmo tak neh, Rilofa, a lo rang ithlîr ṭian angkah hi a nit.

³A thla têlin ki bei a dong tîr tîr a, Zân tin ngaisiatin a ne idel a nit.

⁴Ki hang zâl a, zân a sôt tak tak a, Zân thluanin ker hêl ker hêl a, Khovâr ki ngâkmo tak tak a.

⁵Ki taksa a pumin â pân rilungin a sip a, Pân khirin a tuam a, ipân sabe ata a nâi a zung chup chup tâk a.

⁶Ki damsung sûnhei chu puan khôngtu khôving nêkan a vun rât a, Sabei rang nei loiin ai vun a nit.

⁷O Pathian, ki ringna hi phâivua angkah pai a nit remai inla, Ki mit hin thil iṭha mu nôk khâi no nih.

⁸Atûna ne mutu hin ne mu tlak khâi no nih, Ne zong khom seh, imuh rang om khâi no ning.

⁹Sûm arkiang a, ai boi ngai angkah hin, Thlâna lût tâk chu an ikîr nôk khâi ngai ino angkah hin.

¹⁰An in tiang kîr nôk khâi ngai mak a, A mêlriathei murdîn an iriatmai khâi ngai ino angkah hin.

¹¹Khasikin, ki bâi itik loiin ṭong ki ta, Lunghoi ino takkan chiar ki ta, Lungril inah takkan riphun ki ti.

¹²Tuipui sarâng[2] im kî nit, Ne rung khap rang nî sia hi?

¹³Zâlmuna zâlin sôlringam inlang, Ki natna khom arvuai ual lôi im ki ti lakin,

¹⁴Nangman rimang inrît tak tak ni nen phan a, Thil inrît tak tak ni nen mu a.

¹⁵Hingkana natna tuanga dam mai nêkan chu, Irâk that ten ki irthlang ual a nit.

¹⁶Iring hih ki chang a dong tak tak a, Ring sôt nuam khâi mang, Ki khâtin ne mah riai rei, mumal nei khâi mang e.

¹⁷Miriam hi im a nit a, ni irngai inlut a, Ni uksak tak tak hi?

¹⁸Zîng tin ne thlo a, Tiklâi khomin nî fia ngai hi?

¹⁹Rammual dang ngat viat loiin, Ichil ilem sung kârka lua khom ne en loiin ni om ngai im a?

²⁰Nangmah, miriamhei irungtu, Ki îsual a nit khoma im ni chungah ki thonsual a, Ni thal kâptin taka ni ne imang? Ni ta ranga phurik tak kî nit mani?

²¹Ki sualna ni ne îzâ thei tlak ino mani? Ki siatna nî lâk inrimang thei ino mani? Kei chu thlân khurah lût zel tâng ki ta, Ne zong khom inla, om khâi no ning e.