Read Biete JOBA 8 Bible Online

JOBA 8 - Biete bible

JOBA 8

¹Bildada, Sahi mi khan hingka hin â sîr tâk a;

²Itena sôt im hingka hin ni îsîr rang? Ni ṭong inrum bâk bâk a?

³Pathianin rêlna dik indanglam ngai mak a, Dikna sin iṭhûl tlak ngai mak.

⁴Ni naihei kha Pathian chungah an isual a, Khasikah khan an sual man an ituang a nit.

⁵Khasikin, rilet inla, Tinrêngthothei Pathian kha ngên roh,

⁶Rithiang neh idik tak ni nitin chu, Pathian izuangin nang zuang san a ta, Ni lomanin ni insungkua chu inngîr suak nôk a ti.

⁷Richon ni îchân tâk kha ni sûn matiang a, Pathianin nang a la pêk rang neh inrichakin chu îte ni mak e.

⁸Tianlâi vârna kha hang sui kîr inla, Ei pipuhei thil riathei khah ngaitua ta,

⁹Ei ringnun hih â tôi a nit, Îte lak reh mang me a, Ei nuai ringnun hi rilîm itlân angkah a nit.

¹⁰Khasikin, tianlâi mi vârhei khan nang inrisei sela, An thil riathei nang an iril khah ringai roh.

¹¹“Tuichir ninoah lingchir ṭoi ngai mak, Tui om nonaah korbang ṭoi ngai mak e.

¹²Isât a nit ma a la ring mai lâi khomin tui a kang pêkin chu, Loisûl danghei nêkan a thêm imat ngai.

¹³Pathian ngaisak inohei chu khangkan an om ngai a, Pathian ringiltuhei tûngna chu a boi ngai.

¹⁴An ringatna chu a derindêp a, Âiom zâ angkah pai a nit.

¹⁵Amakhah rinêl sela idiar a tîm a? Ituh ngân sela inding thei a tîm a?”

¹⁶Mi sual chu rikul sunga loikung nîsa mu ṭha, Indon nuang neh ithuar dût dût angkah hi an nit.

¹⁷An rizunghei khan lunghei khah a tuam a, Lunghei khah idet takkan a man khap a,

¹⁸Khanniseh, iphâi paih an nit nungin chu, Tutên an omna zel reh khâi ngai mak.

¹⁹A nit, amahih mi sual râifânna omsun chu a nit zel; Mi dangin a mun an hong ilua rang a nit.

²⁰Ringai ta, Pathianin mi ṭha heng tlak no ni a, Thilisual ithotuhei kha saninding tlak no nih.

²¹Râifân takkan nang innui nôk a ta, Ilôm takkan om nôk ni ti.

²²Nang ineltuhei chungah mualphoina ithlun a ta, Mi siahei omna inhei chu rimang a ti.