Read Biete JOBA 9 Bible Online

JOBA 9 - Biete bible

JOBA 9

¹Joba khan hingka hin a sâm a,

²Ni îsîrhei chu â dik iti ki riat, Khanniseh, Pathian mit mun miriam hi a îdik riai thei mani?

³Pathian kha tûm arsêlpui thei rang? A ṭongridon sângka lâia khatkah khom tutên sâm thei no nih.

⁴Pathian chu vârnaa sip, tinrêng ithothei a nit, Ama doiin tute iding thei ngai mak.

⁵An riat no kârin itlânghei ân rithîn a, A ningthikin anni chu ân rimang ngai.

⁶Pathianin ninupui a tir a, rinêng ân nîng a, Rinêng ringatna chopuihei kha â soi innîng ngai.

⁷Inî khah thu a pêk a, insuak khâi mak a, Ârsihei khom arkhû riai a.

⁸A khât bangin rivân khi a kâiphar a, Tuipui sarânghei khom a sirde a,

⁹Koloiahei, sizuchoi hei, siruk hei neh, Sim tianga ârsi lômhei khi ai siam a nit.

¹⁰A thil roinpui thohei khah sui sua phâk ni mak a, A sinrikhêl thohei khah tep zoi loi a nit.

¹¹Pathian kha ki kôlah a zuang a, mu mang a, Ki kôlah a thleng a, khanniseh, reh mang a,

¹²A nit, ai nuam murdi a lâk khomin tûm â dan ngam an om a, “Im nî tho?” a ziangah tutên ti ngam ngai mak.

¹³Pathianin a ningthik iṭhuai no nih, Rahab[3] isantu, â râlhei khah sirde a ti.

¹⁴Ingkan im, keimah hin ani khah ki sâm rang a, Ama sêlin îthu tak im ril thei ki ta?

¹⁵Idik ngân khom inlang ani khah sâm no ning, Ki chunga thuneitu kha lungkham ngên lem tâng ki ti.

¹⁶Ke sam a, aman a lei iriat a nit khomin, Ki thu a ne lei ringai pêk iam ual mang e.

¹⁷A bi om loiin a ne phop chit a, Thlipui imangin a ne nuai bit a.

¹⁸Rithuak lah man viat loiin a ne siam a, Dengthein ki sip tâk.

¹⁹Ritha mang rang ni sela ani khah tûm â nê thei rang a? Roirêlnaa risêl rang ni sela ani khah tûm a doi thei rang?

²⁰Mi fel riti man inlang, Ki ṭongbâi suakin thiamno a nen chang a, Demnaboi ni man inlang, Ke diknona mu ngir a ti.

²¹Sêlnaboi khom nin lang, inchungin ribe mang a, Ki ringnun hi ki îsit a nit.

²²Khasikin kêng, mi ṭha neh mi sia khom, Ri-ang natkan a inrimang rang kî ti a nit.

²³Thil ṭha non thina â thlun thut a, Mi dik inkhôk sik khah Pathianin â nui ngai.

²⁴Pathianin rammual hi mi sual kutah a pêk a, Roirêltuhei mit khom a îndel pêk a nit. Pathian itho ni no sela, tu ithôm a nit rang a?

²⁵Ki damsung sûnhei hi a vun rât a, Thil iṭha tong loiin a vun zoi ngai.

²⁶Rikuang irât tak angkan a fe thleng a, Mupui âr ibô angkana râtin.

²⁷Ki nuarna hi ringil ki ta, Ki beidongna ilîpin ki râi lei infân rong ki ti khomin;

²⁸Ki dengtheina murdi sikah hin ker thla a îvâi a nit. Pathianin thiamno a nen chang iti lak ki riat a.

²⁹Mi suala tep ki nit nungah hin, Îtho rang im chanlamboiin ki lai sôl kikêng rang hi?

³⁰Ivur tuiin[4] risil fâi man inlang, Ki kuthei chang-alin risuh man inlang,

³¹Pathianin nimnok khurah a ne pai a, Ki silbomhei ilua khomin an ne itir tâk a nit.

³²Pathian hih miriam ni sela chu sâm thei ki ti. Kin thubuai infel rangin roirêl munah fe thei kin ti.

³³Khannisela, kin ruaika kârvâna ding thei tute omak a, Pathian neh kin kâr thu tan thei tute omak e.

³⁴Pathian, kuttum ne tho khâi no roh! Ni ṭiomna khah ne khâi inrikiang pêk roh!

³⁵Ṭi mang e, kî ṭong rang a nit, Ki lungril chu keiman ki riat.