Read Biete LAPUI 10 Bible Online

LAPUI 10 - Biete bible

LAPUI 10

¹O PUMAPA, îtho sika ilah takah nî ngîr mani? Îtho sika kin lungzîng lâiah hin ni irbîk mani?

²Mi siahei chu an ripâk a, Inrianghei an nuam an lo a; An thil isual ngaitua suakheiah khan anmani ngêi in-ôk roh.

³Mi sia khan a lungril rizukna sual khah a song a; Mi kuatinkam khan PUMAPA chu nung a song a, a musit ngai.

⁴Mi sia khan PUMAPA ngaisakna zel nei mak a; Ripâknan a sip a, “Pathian omak” a ti ngai.

⁵A lampui tinrêngah tiklâi khomin a hong inṭum a; Pathian roirêlna reh phâk ngai mak e, Ama doituhei murdi khom a phengsan ngai.

⁶A lungsungah, “Lôsam tlak no ning a, Tiklâi khomin lunginzîngin om no ning,” a ti ngai.

⁷A bâi chu vânisâmna hei, musitna hei, Milakna hei neh nuamlona hein a sip a; Ṭong ṭhano, musit ṭonghei a tho zel ngai.

⁸Kho tinah inrûkka ruangchuanna munheiah ribin, Mi îte ti nohei ithat rangin ruang a chuan ngai.

⁹Sakeibaknei angkan mun fianrialah ardîp a, Inrianghei iman rangin â ruang ṭian ngai a, Inrianghei chu a lênin a man a, a kâi inrimang ngai.

¹⁰Mi îte tho theiinohei khah ilîrin an om a; Mi râthei isirden an om ngai.

¹¹Mi sia khan a lungrilin, “Pathianin uksak mak a; A mâi a thup a, tiklâi khomin ne mu no nih!” a ti ngai.

¹²O PUMAPA, mi pualoihei chungah ni kut ilek inla; Mi rianginvâihei chu ringil no roh.

¹³Ingkan im mi pualoi khan Pathian imusitin, A lungsungah “Deng nen thei no nih,” ai ti?

¹⁴Nangmah lakin ni mu ṭian a; Dengtheina neh lungzîngna ni mu mai a, Ṭangpui rangin ni irsiam ṭian a nit. Îte tho theiino mihei khah ni chungah an ringat mai ngai a; Farahei ṭangpuitu ni nit mai ngai.

¹⁵Mi siahei neh mi sualhei thuneina inboi inla; An rilet mâkah chu an sualna sikah khan denginthei roh.

¹⁶PUMAPA chu kumkhuantluangkan rêng a nit a; Pathian dang chubai iûn murdihei chu a ram ata rimang an ti.

¹⁷O PUMAPA, lungrila ringai itlômhei ṭongṭaina ringai ni ta; An lungrilah ihâina pêng ni ti.

¹⁸Nuamlo tuanghei neh farahei ṭapnaah ne kuar sung ni ta; Khanchu, rinênga miriamhei lâiah, Risirdena a om nôk khâi nona rangin an chungah roirêl pêk ni ti.