Read Biete LAPUI 102 Bible Online

LAPUI 102 - Biete bible

LAPUI 102

¹Dengthei ituangin arzal a, PUMAPA ziangah a lungzîng thu â sîrna. O PUMAPA, ki ṭongṭai hi ringai inla; Ṭangpui ingêna ke khêk rôl hi ni ziang hong tlung riseh.

²Ki lungzîng nî-ah hin ki ziang ata ni mâi thup no roh. Ki tiangah hin ne kuar sung inla; Nang ki koi lâiah hin ne sâm vak roh.

³Ki damsung sûnhei hi meikhû angkan arzâm rimang zoi a; Ki ruhei hi thingthu angkan a kâng a.

⁴Ke lung hi loisûl angkan em inchârin a om a, a thêm zoi tâk a; Bu khom ne thei khâi mang a.

⁵Lungzînga ke rung ke rung sikin, Ki ruhei khom hi vun bangin a tuam tâk a.

⁶Ramchâra tui-âr-ôn angkan ki nit tâk a; Khoram simbu angkah ki nit tâk.

⁷Ki meng ṭian a; Vasak inchung sîpa ama khât banga om angkah ki nit.

⁸Ne doituhei khan sûn isôtkah an ne sar a; Ne mumâkhei khan ker ming chu vânisâmnan an mang a.

⁹Rivut hi bu angkan ki rin a, Ki in rang lak ki mitrithli neh arpol zoi tâk a.

¹⁰Ni lunghoinona neh ni ningthikna sikin, Nangman ni ne dom a, ni ne pai iṭhul tâk a.

¹¹Ki damsung sûnhei hi kholoi rilîm iboi thiai angkah a nit a; Loisûl angkan ker zual tâk a.

¹²O PUMAPA, nang chu kumkhuakan rêngin iṭhung mai ni ta; Nangma riming chu suanpâr murdi dênin om a ti.

¹³Thoi ni ta, Zion chu lung inkham ni ta; Ani chu ditsak zoro a nit tâk a; Zoron kung chu a tlung tâk.

¹⁴Ni bôihei khan a lung banghei khah an inlut a; Ipil kâra â chim rem rum tâkhei khom an ringai innat a.

¹⁵PUMAPA riming chu nam tinin ṭîng an ta, Rinênga rêng murdîn ni roinpuina chu ṭîng an ti.

¹⁶PUMAPA khan Zion chu inding nôk a ta, A roinpuina rithlukin zuang ilang a ti.

¹⁷Mi chavaihei ṭongṭaina chu ringai a ta; An ngênna chu ensan no nih.

¹⁸Amahih rual ithar la hong iom maihei ta rangin riziak ni sela, Khanchu, mi a la suak ranghei khomin PUMAPA chu la hong inpâk thei an ti.

¹⁹Ani khan a mun rithiang risâng taka rithokin a zuk en a, PUMAPA khan rivâna rithoka khin nuai hi a zuk thlîr a.

²⁰Mi tânghei irung chu a riat a, Ithi ranga inkunghei chu a sanisua tâk a.

²¹Khanchu, Zionah PUMAPA riming inpuang unla, Jerusalemah khom ama inpâkna lâ sak rei.

²²Mi tin neh ram tin ribûm tâng an ta, Nam tinrêngin PUMAPA sin tho tâng an ti.

²³Ani khan lam lâiah hin ker tha â ṭhuai a, Ki damsung sûn hi ân tôi a.

²⁴“O ki Pathian, ki vânglâi sûnah hin ki ringnun ne lah pêk no roh, O PUMAPA, nang chu kumkhuakan ni om mai a” ki ti a.

²⁵Nangman rinêng hih tiana nî siam a nit a; Rivânhei khom khi nangma kut suak a nit.

²⁶Khahei kha chu la boi an ta, Nangmah chu kumkhuakan om mai ni ti; A nit, khahei murdi chu silbom angkan la lui an ta, Puan angkan thleng ni ta, la boi an ti.

²⁷Nang chu ni ngaingirin om ni ta, Ni kumhei chu hek nî rêng rêng om no nih.

²⁸Ni bôihei naihei chu izôkriam kan lêng an ta; An richihei chu nangma enkolna nuaiah indetin om an ti.