Read Biete LAPUI 103 Bible Online

LAPUI 103 - Biete bible

LAPUI 103

¹Davida Inpâkna lâ O ki ringna, PUMAPA chu inpâk roh; O ki takpuma om murdihei, Arming rithiang chu inpâk rei.

²O ki ringna, PUMAPA chu inpâk inla; A ṭhatnahei murdi chu ringil no roh.

³Ani khan ni siatna murdi nang â zâ a, Ni natna murdihei ân dam ngai a.

⁴Rimangna ata ni ringna chu artlan ngai a, Lungkhamlianna neh ṭhatna nang ân khum ngai.

⁵Ni ringna chu thil iṭha murdin ân khop a, Ni vânglâi nitna chu mupui angkan siam intharin a om nôk ngai.[52]

⁶PUMAPA khan ngêpsia tuang murdihei rang, Thilifel itho pêkin roihei a rêl pêk ngai.

⁷A lampuihei chu Mosia ân riat a, A sinthotheizia Israelhei ân mu ngai.

⁸PUMAPA chu ṭhatnaa sip, mi lunginkham thei tak, Lungrivuai tak neh lungkhamliannaa sip a nit.

⁹Ani khan ngo mai no ni a; A ningthikna chu vong kumkhua ual no nih.

¹⁰Ei sualnahei angkan ei chungah tho mak a, Ei siatnahei angkan ne thung ual mak e.

¹¹Rinêng nêkan rivân a irsâng angkan, Ama ṭituhei chunga a lungkhamlianna chu ai lian a nit.

¹²Sak neh thlang a irlat angkah hin, Ei siatna chu ei ziang ata a khâi vit tâk a.

¹³Pan a naihei lung a înkham angkah hin, PUMAPA khan ama ṭituhei chu lung ân kham ngai.

¹⁴Ei takpum risiam dân hi a riat a; Ipil pai ei nit iti[53] hi ai riat mai a nit.

¹⁵Miriam chu a ringlâi sûnhei hi loisûl angkah a nit a; Phûl pâr angkan a ṭoia a pâr a.

¹⁶Ithlîn a hong sêm a, a vuangpai ngai a, Tutên mu nôk khâi ngai mak e.

¹⁷Nikhomsela, PUMAPA lungkhamlianna chu, Ama ṭituhei chungah khan kumtluang ata kumtluang idênin a om ngai a, A felna khom an tu neh tehei idênin a om ngai.

¹⁸A thuthlung ivong maituhei neh, A thupêk izôm maihei chungah khan.

¹⁹PUMAPA khan a rêngṭhungmun chu rivânah khin ân det a; Tinrêng chungah roi a rêl a.

²⁰A thu ringai a, a thupêkhei izôm ngai, O vântirtôn irât neh roinpuihei, PUMAPA chu inpâk rei.

²¹A lungdo sin a, a sin itho ngai, Vân mihei o, PUMAPA chu inpâk rei.

²²A thunuaia om murdi neh a thilsiam murdihei, PUMAPA chu inpâk rei. O ki ringna, PUMAPA chu inpâk roh.