Read Biete LAPUI 104 Bible Online

LAPUI 104 - Biete bible

LAPUI 104

¹O ki ringna, PUMAPA chu inpâk roh. O PUMAPA, ki Pathian, nang chu ni roinpui vang na! Nang chu roinpuina neh inlalnan ner tluk a.

²Ivâr kha puan angkan ni sil a, Rivânhei khi puan in angkan ni kâi phar a.

³Ni inhei chu tui chungheiah[54] ni sin a, Sûmhei khi ni tâlin ni mang a, Ithli rithla chungah ni vuang a.

⁴Ithlihei hi ni palâiin ni mang a, Khothlâr rilek zap zap hi ni sinthotun ni mang a.

⁵Kumkhuaka â ning nona rangin, Rinêng ringatnahei chu ni phûm a.

⁶Rinêng chu puana tuam angkan tui inthûk takin ni tuam a, Tuihei khan itlânghei chu a chîm vang a.

⁷Tuihei chu ni ngo a, lâizâm an tho ngai a; Ni thupêk iring tak an riat kaneh an rotpat riai tâk a.

⁸Itlânghei neh phâiheiah an luang a, An ta ranga mun nî siam pêk tiang an luang liam tâk.

⁹An khêl loi rang ramrî ni khang pêk a, Rinêng hih a chîm rikhum nôk khâi nona rangin.

¹⁰Nangman phâiheiah khan tuinârhei ne sua a, Itlâng kârheiah khan vadung nen luang a.

¹¹Khahei khah ramsa tinrênghei khan an lei in a, Ram sakuartunghei khan an tui rihâl an inboi ngai.

¹²A kôla thingkungheiah khan chungavuang ivahein ribu an kâi ngai a. Â ṭangheiah khan an irâm ngai a.

¹³Nangman rivâna rithokin itlânghei chu ruatuiin ne fa a, Rinêng hih ni ṭhatvurnahein a sip ngai.

¹⁴Ramsahei rang loisûl nen ṭoi pêk a, Chimuhei chu miriamhei rang nen ṭoi pêk ngai, Rinêngah hin ifah rang fâknêk a hong om tâk a.

¹⁵Miriam lungril inlômna rang uain a vâng a, A takpum innâmna rang oliv riak a om a, Ritha neina rang ibai a nei tâk a.

¹⁶PUMAPA iphun thinghei chu tuiin a fa inkhop mai a, Lebanon tlânga thing ai phunhei ngêi chu.

¹⁷Amakhan ivahein ribu an zêl a; Vapualhei chu thingpuiheiah ribu an siam ngai.

¹⁸Itlâng risângheiah khan sarzahei an lêng a, Lungpui ikak kârheiah khan zupuihei an ribîk a.

¹⁹Nangman ithla khi zorobi riatna rangin ni siam a; Inî khom a zoro takah a tlâk ngai a.

²⁰Nangman izîng ni siam a, zân a hong nit a; Kha zoroah khan ramsa chi tinrêng an lêng suak a.

²¹Sakeibaknei vânglâihei khan an sa sê rang izongin an irâm a, Pathian ziang ata an fâk rang an zong ngai.

²²Inî a hong suak a, an ṭîn nôk riai a, An omna pûk chitah an kual nôk ngai a.

²³Miriamhei chu sinitho rangin an suak a, Kholoi idênin sin an tho a.

²⁴O PUMAPA, ni sinthohei chu a va tam vang na! Ivâr takka nî siam korong an nit a; Rinêng hi ni mîring siamhein an isip a nit.

²⁵Tuikhanglian a om a, a lianin a irzat a nit, Amakhan mîring â lian neh â chîn tep zoi loi an om a.

²⁶Amakhan rikuang a fe dûl dûl a, Nî siam Leviathan khom â lêng zun zun a.

²⁷Khahei murdi khan nang an ngâk ṭian a, A zoro takah ifah rang ni pêk mai ngai a.

²⁸An fâk rang ni pêk a, an fâk a; Ni kut ner sam a, thil iṭha tinrêngin an khop ngai.

²⁹Ni mâi ni thupin chu an lunginzîng ngai a; An rithuak ni lâk pêkin chu an thi a, Ipilah ngir an kîr nôk ngai.

³⁰Nangman ner thuak ni khum a, an hong ring ngai a; Rinêng chung khom hi ni siam inthar nôk ngai.

³¹PUMAPA roinpuina chu kumkhuakan om sela; PUMAPA chu a thil siamheiah lôm riseh.

³²Ani khan rinêng hih a en a, Rinêng chu ân thing ngai a; Itlânghei chu a tôn a, an khûk vung ngai a.

³³Ki damsung kârkah PUMAPA chôiinrisângin lâ sak ki ta; Ki ring kong kârkah ki Pathian inpâkin zâi ki ti.

³⁴Ki ngaituana hi a rang lôm inrup ni sela, PUMAPA-ah khan kî lôm a nit.

³⁵Mi sualhei chu rinênga rithokah hin inrimang sela; Mi siahei chu om khâi no riseh. O ki ringna, PUMAPA chu inpâk roh. PUMAPA chu inpâk rei.