Read Biete LAPUI 105 Bible Online

LAPUI 105 - Biete bible

LAPUI 105

¹O PUMAPA ziangah lômthu ril unla, Arming chu rilam rei; Mi tin lâiah khan a sinthohei chu ril rei.

²Amah chôiinrisângin lâ sak unla, Amah inpâkin zâi rei; A sinrikhêl sin murdi thu chu ril rei.

³Arming rithiang chu song unla; PUMAPA zongtuhei lungril chu lôm riseh.

⁴PUMAPA neh a râtna chu zong unla; A mêl chu zong mai rei.

⁵O, a bôi Abrahama richihei; Jakoba richi, a irthlanghei; A sinrikhêl neh a roirêlnahei chu remai rei.

⁷Ani chu PUMAPA ei Pathian chu a nit a; Rammual pumpuia roirêltu a nit.

⁸A thuthlung chu kumkhuakan a vong mai a, Rikhûk sâng idênin a thupêk khom a riat mai.

⁹Abrahama zianga a thuthlung neh, Isaka zianga a ṭonginkung chu ai riat mai a nit.

¹⁰Kha ngir khah thuthlung rangin Jakoba ziangah ân det a, Israelhei kumkho thuthlung rangin.

¹¹Ani khan, “Kanan ram hi nangni pêng ki ta, Nin dongtumin luang nin ti” a ti a.

¹²Pathian mihei khah iroichekah bang an nit a, Kanan ramah khan mikhual an la nit nôk a.

¹³Nam dang dang ziangah an fe lôr an fe lôr a, Ram dang dangah an rithon an rithon a.

¹⁴Tutên an ngêpsia rang kha Pathianin phal mak a; Anmani sikin rênghei khom a ngo a.

¹⁵“Ki siriak inrithuhei tôn no unla; Ki zânthlahei ningsiat rêng rêng khom sin no rei” itin.

¹⁶Kha ramah khan PUMAPA khan iṭâm a tir a, Ifah rang rêng rêng om khâi mak a.

¹⁷An matona fe rangin mi khatkah a tir a, Bôia an izuar Josefa khah.

¹⁸A keheiah khan kolbun an inbun a, A ringah thîrkol an inli a,

¹⁹A ṭong tihei murdi a tlung idik mâkah chu. PUMAPA thu khan â dikzia chu ân lang a.

²⁰Aigupta rêng khan â sua tâk a; Kha nam roirêltu ngêi khan â sua tâk a.

²¹Ani khan a ram chunga ruaitun a phun a, Ai nei murdi chunga thuneitun a siam tâk a,

²²A milianhei chunga thuneina neh, A ulianhei vârna inrisei rangin ai siam tâk a nit.

²³Khanchu, Jakoba chu Aigupta ramah a zu fe a; Kha ramah khan a om tâk a.

²⁴PUMAPA khan a mihei chu iṭha takkan ân pung a, Anmani doituhei nêkan ân rât ual tâk a.

²⁵A mihei inel rangin Aigupta mihei chu an lungril ân danglam pêk a, A bôihei chu vârrilet takkan an nuam an lo tâk a.

²⁶Khanungchu, a bôi Mosia kha a tir a, A mi rithiang Arona neh khan.

²⁷Anni khan ama risinsianahei an in-en a, Aigupta ramah khan sinrikhêlhei an tho a.

²⁸Pathian khan izîng a tir a, ram pumpui chu a zîng tâk a, Nikhomseh, a thuhei chu zôm nuam mak a.

²⁹An tuihei chu thisen ân chang pêk a, An ingahei chu a that pêk riai a.

³⁰An ram sungah uṭok ân tâm pêk a, An rênghei chontan tena khom uṭok ân sip pêk a.

³¹Ani khan thu a pêk a, Khanchu, an ram sungah khan ithoi ân tâm tâk a, Sêtemek khom an ram sung murdiah itam takka an hong om tâk a.

³²Rua rithûlin irial ân sûr pêk a, An ram pumpuiah iṭêk â ṭhul pêk a.

³³An grep ruihei, an theipui kunghei â siat pêk a, An rama thinghei chu â khiak pêk zit a.

³⁴Thu a pêk a, ikhâihei an hong intâm a, Tep zoi loi khâiphâr lôm an hong om tâk a.

³⁵An ram sunga chimu tinrênghei an fâk isiat a; An ram sunga loisûl tinrêng khom an fâk zoi riai a.

³⁶An rama nai lutîr iom murdi a that a, An rât lâi nai masatakhei chu.

³⁷Khanungchu, Israelhei kha a ṭhui isua tâk a, Tangka neh rângkachak an hong chôi a, An lâiah khan mi rât ino khatkah khom omak a.

³⁸Aigupta mihei khan an ṭi a, An isuak pêk tâk khah an lôm tak tak a.

³⁹Pathian khan a mihei rikhû rangin sûm ân zîng pêk a, Zâna ân vâr rangin mei a pêk a.

⁴⁰An ngên lam angkan vamîm a hong ṭhui pêk a; Rivân Manna-ah khan anni chu ân khop a.

⁴¹Lungpui ân kak a, tui a zuang pûtsuak a, Ramchârah khan tuidung angkan a luang tâk a.

⁴²A bôi Abrahama zianga, Â ṭonginkung rithiang khah a riat mai a.

⁴³Khanchu, a mihei kha â ruai isua a, A mi rithlanghei chu lâ sak pumin an suak tâk a.

⁴⁴Khante, nam danghei ram chu a mihei a pêk a, Anni khan mi danghei sin sôl irâ kha an lua tâk a.

⁴⁵A thupêkhei chu an zôm thei a, A dânhei chu an vong inṭhat theina rangin. PUMAPA chu inpâk rei.