Read Biete LAPUI 106 Bible Online

LAPUI 106 - Biete bible

LAPUI 106

¹O PUMAPA chu inpâk rei, O PUMAPA ziangah lômthu ril rei; Ani chu a ṭhat a; A lungkhamlianna khom kumtluangin om mai a ti.

²Tûm PUMAPA sintho roinpui takhei chu â sîr thei rang? Tûm amah chu ân pâk itluk thei rang?

³A thupêk vong inṭhahei chu an ham a ṭhat e, Tiklâi khoma idik taka sintuhei chu.

⁴O PUMAPA, ni mihei ni ditsak tikin ne remai inla; Ni saninring tikin kei khom nen ṭang sa ngêt roh.

⁵Khanchu, ni mi rithlanghei vângsakna ki mu thei a, Nangma nam rithlanghei lômnaah ki lôm thei a, Nangma ta bîkhei neh nang kin song theina rangin.

⁶Kin chibulhei angkan thil kin thonsual tâk a, Thilsual kin sin a, isual takkan kin om tâk a.

⁷Kin chibulhei khan Aigupta rama ni sinrikhêl sinhei kha rethiam mak a; Ni lungkhamlianna inthûk tak kha remai khâi mak a, Ân chungtaka chungah Tuipui Sen rikamah khan an rihel tâk.

⁸Khangkah dôran khom ama riming sikin anni chu a saninzôk a, A sinthotheina roinpui tak chu a înlang a nit.

⁹Tuipui Sen chu thu a pêk a, a kang tâk a, Anni chu imuang inzena lônin varâl an kâi a.

¹⁰Anmani neltuhei kut ata a sanisua a; An irâlhei thuneina ata a sanisua tâk a.

¹¹Tuihei khan anmani doituhei chu a chîm zoi tâk a; Khatka lua idama suak om khâi mak.

¹²Khanchu, ama mihei khan a thuhei chu an iam a; Amah inpâknan lâ an sak a.

¹³Nikhomsela, a sinthohei chu an ringil nôk zel a; A roisak chu ngaisak nuam mak a.

¹⁴Ramchârah khan thil rizuknan an sip a; Ram iṭôlah khan Pathian chu an fia tâk a.

¹⁵An thil ngên chu a pêk a, Nikhomsela, an chungah khan ripui inrît tak khom a tir pêk sa a.

¹⁶An riabukah khan Mosia chu an narsa a, PUMAPA mi rithiang Arona neh khan.

¹⁷Rinêng chu a âng a, Dathana chu â lem a, Abirama neh a in mihei khom a del rikhû zoi tâk a.

¹⁸An inung izuituhei lâiah khan mei a zuang ṭum a; Mi siahei chu a kâng inrimang tâk a.

¹⁹Horeb tlângah khan serâtte rilim an siam a, Amakhah chubai an ûn a;

²⁰Pathian roinpui tak chu, Loisûl ifah ngai serât rilim paiin an thleng tâk a.

²¹Aigupta rama thil rikhêl tak takhei ithotu, An saninringtu Pathian chu an ringil tâk a.

²²Hama rama thil rikhêl tak takhei, Tuipui Sena thil inrît takhei ithotu chu an irngil tâk a nit.

²³Pathianin anni chu inrimang ki ti a ti lâiah khan; A ningthik iṭhuaia anni chu inrimang loi rangin, A mi rithlang Mosia chu Pathian makungah â ding ngai a.

²⁴A nit, ram rizuk iom tak khah iten be mak a, A ṭonginkung chu iam nuam mak a.

²⁵An puan inheia an riphun a, PUMAPA rôl chu ringai nuam mak a.

²⁶Khasikin, an tiang â bân a phar a, ṭong ikhir tak a pêk a, “Ramchârah inrimangin om nin ta,

²⁷Nam tin lâiah chekindarin om nin ta, Ram dangah nin richihei chu thîng an ti,” ai ti tâk a nit.

²⁸Peor munah khan Baal chubai ûnna tiang an kop a, Mirmil zianga thillanhei chu an fâk sa tâk a.[55]

²⁹An sinthohei khan PUMAPA ning an inthik a, An chungah ripui a zuang inlêng tâk a.

³⁰Nikhomsela, Finehasa chu â ding a, thonchâihei chungah kut a tlâk a, Khanchu, ripui khah inrikiangin a om tâk a.

³¹Amakhah a thil tho ṭhata be a nit a, Kumkhuaka suanpâr murdi dêna an riat mai rang a nit.

³²Meriba tui khomah PUMAPA ning an inthik a, Anmani sikin Mosia chungah ṭhano a tlung tâk a.

³³Ani chu a ning an inthik pêk a, Ngaitua zon loiin a ṭong duai tâk a.

³⁴Inrimang vang ranga PUMAPA thupêk lam angkan, Kha rama sanonghei chu inrimang nuam mak a.

³⁵Kha namhei neh khan an rinei ripol tâk a, An omdânhei chu an riseiin an lâk tâk a.

³⁶An mirmilhei chubai an ûn sa tâk a, Amakhah an ta rangin châng a hong nit tâk a.

³⁷A nit, ramrili ziangheia ribôl nan, An naipahei, an nainuhei an lan a.

³⁸Kha mi ningsiat sin ino naitehei thisen an isua a, Kanan mihei mirmil pathian ziangah thisen an lan a, An nainuhei, an naipahei thisen ngêi khan, Ram kha borinnimin a siam zoi tâk a.

³⁹An sintho sikah khan an inim zoi tâk a, An sintho ngaihei sikah khan an hong porinche tâk a.

⁴⁰A mihei chungah PUMAPA ning a thik a, Anni chu â tir tâk a.

⁴¹Nam danghei kutah a pêk a, Anmani neltuhei khan an chungah roi an rêl tâk a.

⁴²Anmani doituhei khan an sirde a, An thunuaiah intlômin an om tâk a.

⁴³Voi itam takkah PUMAPA khan a mihei chu a saninzôk a, Nikhomsela, an nuamlam isongin a chungah an rihel ngai a, An sualnaah khan an irnîk tâk a nit.

⁴⁴Khanniseh, lungzîngah an tlâkin chu a ngaisak ngai a, An ṭaphei a lei ringai pêk ngai.

⁴⁵Anmani sikin a thuthlung chu a riat mai a, A lungkhamlianna natinsat sikin â lung ân rilet nôk ngai a.

⁴⁶Suaka ṭhuitu murdihei khah, Anmani lunginkham rangin an lungril ân rinêm pêk ngai a.

⁴⁷O PUMAPA kin Pathian, ne saninzôk inla, Nam tin lâi ata ne ṭhui bûm nôk roh. Nangma riming rithiang chu inpâk kin ta, Nangma ziangah lômthu ril kin ti.

⁴⁸PUMAPA, Israelhei Pathian chu inpâkin om riseh. Kumtluang ata kumtluang idênin inpâk rei. Mi tin tinin, “Amen,” ti riseh. PUMAPA chu inpâk rei.