Read Biete LAPUI 107 Bible Online

LAPUI 107 - Biete bible

LAPUI 107

¹O PUMAPA ziangah lômthu ril rei, Ani chu a ṭhat a; A lungkhamlianna chu kumkhuakan om mai a ti.

²PUMAPA mi rithlanghei khan khaangkah khan ti riseh. Irâlhei kut ata artlan suak tâk a.

³Ram tin ata a ṭhui bûm a, Sak neh thlang, sim neh mâr ata ai bûm a nit.

⁴Ṭhenkah chu ramchâr inkhôkah khan an ivâi a, Miriam omna khua lampui rêng rêng mu zoi khâi mak a.

⁵Vonṭâm neh tui rihâlin, An ringna chu an sungah a hong rizal tâk a.

⁶Lungzîngna an tongin PUMAPA chu an isam a, Ani khan an lungzîngna ata chu a sanisua a.

⁷An omna rang khua an tlung theina rangin, Lampui itlûn takah a ṭhui tâk a.

⁸PUMAPA chu a lungkhamlianna sikin inpâk sela; An chunga a sinrikhêl sinhei sikah khan inpâk riseh.

⁹Ani khan tui rihâlhei chu ân khop a, Voniṭâmhei chu thil iṭhahein ân khop ngai a.

¹⁰Ṭhenkah chu izîng nuaiah neh thina dâilîmah an iṭhung a, Dengthei ituangin thîrkol an bun a.

¹¹Pathian thupêk chungah an rihel sik neh, Ân chungtaka roisak chu an ringainêp sikin.

¹²An lungril chu sinsôlnan arzual zoi tâk a; An ilîr khomin â ṭangpuitu rang rêng rêng om khâi mak a.

¹³Lungzîngna an tongin PUMAPA chu an isam a, Ani khan an lungzîngna ata chu a sanisua tâk a.

¹⁴Izîng nuai ata neh thina dâilîm ata chu a ṭhui isua a, An khuapna zingzirihei chu â sat pêk tâk a.

¹⁵PUMAPA chu a lungkhamlianna sik neh, Miriam naihei chunga a sinrikhêl sinhei sikah hin inpâk riseh.

¹⁶Ani khan thîr inkhârhei chu â siat a, Â kalna thîr thluanhei chu â khiak tâk a.

¹⁷Mi intlo ṭhenkah chu an sualna sikin neh, An siatna sikin dengthei an tuang ngai a.

¹⁸An ringna khan ifarua tinrêng â tir a, Thina dâikothei chu an nâi ngai.

¹⁹Lungzîngna an tongin PUMAPA chu an isam a, Ani khan an lungzîngna ata a sanisua ngai a.

²⁰A thupêkin anni chu ân dam a, An rimangna rang ata chu a saninzôk ngai.

²¹PUMAPA chu a lungkhamlianna sik neh, Miriam naihei chunga a sinrikhêl sinhei sikah hin inpâk riseh.

²²A ziangah khan lômthu sîr ribôlnahei chu lan sela, A sinthohei chu lâa sakin inpuang riseh.

²³Mi ṭhenkah chu tuikhanglianah rikuangheia chuangin, Tuipuiah khan ifâk an vai a.[56]

²⁴Khahei khan PUMAPA sinthohei chu an mu a, Tui inthûk taka a sinrikhêl thohei chu an mu ngai.

²⁵Ani khan thu a pêk a, thlipui a hong râng a, Tui rifônhei kha ân risok ngai a.

²⁶Rikuang chu chungtiang ân risâng tûng tûng a, Inthûk takah â ṭhum nôk tûng tûng ngai a; An ṭi sikin rikuangpuhei chu an rithla khan thlânbang â bên a.

²⁷Zûnrui angkan an ithlêk an ithlêk a, hong rino an rino a, Om rang dân lungindong khapkan an om ngai.

²⁸Lungzîngna an tongin PUMAPA chu an isam a, Ani khan an lungzîngna ata a sanisua ngai a.

²⁹Phâivopui chu ân ringam ruam a, Khanchu, tui risokhei khom a hong dâi a.

³⁰Khante a hong dâi tâk sikin an lôm ngai a, Ani khan an irngai tak rikuang ringam munah khan a hong ṭhui ngai.

³¹PUMAPA chu a lungkhamlianna sik neh, Miriam naihei chunga a sinrikhêl sinhei sikah hin inpâk riseh.

³²Mipui inkhômnaah khan amah chu inpâk sela, Ulianhei ribûmnaah khan inpâk riseh.

³³Ani khan tuipuihei chu ramchâr ân chang a, Tuichirhei chu rinêng iṭôl ân chang ngai.[57]

³⁴Ram iṭha tak chu a sunga omhei siatna sikin, Ram ipôn ân chang a,

³⁵Ramchâr chu dîl ân chang ngai a, Ram iṭôl chu tuinârhei ân chang ngai.

³⁶Amakhan vonṭâm ituanghei chu ân om ngai a, Omna rang khua an siam ngai.

³⁷Loihei an nei a, grep rikulhei an siam a, Fâknêk an invâng ngai.

³⁸A mihei chu ṭhat a vur a, Khanchu, iṭha takkan an hong pung a; An ranhei khom rikâi rang phal ngai mak e.

³⁹Khante, a mihei khah nuamlona hei, dengtheina hei, beidongnahei sika, An rikâi tîng tîng a, an ikhûn ṭian lâiah khan,

⁴⁰Ani khan â sirdetuhei chungah khan musitna a bun a, Ramchâr, lamtui omnonaah khan ân rivâk ân rivâk ngai.

⁴¹Nikhomsela, inrianghei chu an dengtheina ata a saninzôk ngai a, An insungkua chu bera lôm angkan ân pung nôk ngai.

⁴²Mi felhei khan amakha an mu a, an lôm ngai a, Mi siahei murdi chu ân dâirek zel ngai.

⁴³Mi vâr kan chu khahei khah vong inṭha sela; PUMAPA lungkhamlianna chu ngaitua riseh.