Read Biete LAPUI 109 Bible Online

LAPUI 109 - Biete bible

LAPUI 109

¹Davida inpâkna lâ O ki înpâk ngai Pathian, dâirek no roh.

²Mi sual neh mi lêmsiahei khan an ne doi a, Milakin an ne sêl an ne sêl a.

³Nelna ṭongin an ne hual a, A bi om loiin an ne doi a.

⁴Keiman chu lung ki thlung a; anmanin chu an ne doi a, Kei chu an ta rangin ki ṭongṭai ngai a.

⁵Anni khan thil iṭha chu thil isualin an ne thung a, Ki lungthlungna chu nelnan an ne ithung tâk a nit.

⁶Nangman ke râl chungah roirêltu sual seh pêk inla; Â changtiang â nôtu iding riseh.

⁷A chungthu irêla a om tikin thiamno changin suak sela; A ṭongṭaina ten khom suala ringai ni riseh.

⁸A damsung sûnhei chu tôi sela; A ruaitu nitna chu mi dangin chang riseh.

⁹A naihei chu faran om sela; A nupui chu numeiin om riseh.

¹⁰A naihei chu ivâiin an kut do sela; An in rama rithokin ûmisua ni riseh.

¹¹Lâkai inritângtu khan ai nei murdi lah pêk riai sela, Mikhualhei khan a sinsôlna râ chu irok pêk riseh.

¹²A chungah khozâna inlang rang tute om no sela; A nai, farahei lunginkhamtu rang khom tute om no riseh.

¹³A chihei khom rimang riai sela, Thoithar hong iom nôk lâiah chu arming ringil pharin om riseh.

¹⁴A pa sualna chu PUMAPA khan remai sela, A nu siatna khom thâi inrimangin om no riseh.

¹⁵PUMAPA khan an sualhei chu remai sela; Anmani riatmaina khom rinêng ata inrimang riseh.

¹⁶Kha mi khan lungkhamna inlangna châng reh mak a; Mi fanra, inriang neh risamhei kha ithat itumin a nuam a lo ngai a.

¹⁷A nit, mi vâni sâm hih a nuamlam a nit a, Khasikin, vânisalna chu a chungah tlung riseh Mi ṭhativur hih a nuamlam ni mak a, Khasikin, ṭhatvurna chu dong no riseh.

¹⁸Zakua rifuala rivo angkan vânisâmnan arvo a; A vânisâmna chu tui angkan a taksa khan ithôp sela, Siriak angkan a ruhei khan ithôp riseh.

¹⁹Puana ituam angkan ani chu tuam sela, Kongkhit angkan a kongah khit mai riseh.

²⁰Hihei hih ne doituhei neh ki ringna sîrinsehtuhei, PUMAPA khan a thungna ni riseh.

²¹O PUMAPA ki Pathian, Nangma riming sikin ne ṭangpui inla; Ni lungkham ṭhatna sikin ne sanisua roh.

²²Inriang neh risam tak ki nit a; Ki lungril hih a nat tak tak a.

²³Kholoi rilîm angkan kî boi thiai tâk a nit;[58] Khâifapôl angkan sêm invuangin ki om tâk a.

²⁴Ker khûkhei hi bu ngei sikin arzal tâk a; Ki takpum hi ru neh vun bang a nit tâk.

²⁵Mi nuizabûr ki nit tâk a; Ne mu kan an lu an ithing a.

²⁶O PUMAPA, ki Pathian, Ni lungkhamlianna sikin ne saninzôk roh.

²⁷Ke râlhein amakhah ni kut a nit iti an riat thei a, O PUMAPA, nangmah ngêiin nî tho a nit iti reh riseh.

²⁸Anni khan vâni ne sâm khom seh, Nangman ṭhat ne vur roh; An nuam ne lotuhei chu an thoi kaneh mualinphoi sela, Ni bôi hi chu lôm riseh.

²⁹Ne doituhei chu mâimôkna puan insilin om sela; An mualinphoina chu zakua angkan ihâk riseh.

³⁰PUMAPA ziangah lômthu ril tak tak ki ta; Mipui lâiah amah chu inpâk ki ti.

³¹PUMAPA khan mi fanra chu a thlop a, Ani chu thiamno inchangtuhei kut ata a saninzôk ngai.