Read Biete LAPUI 118 Bible Online

LAPUI 118 - Biete bible

LAPUI 118

¹O, PUMAPA ziangah lômthu ril rei, ani chu a ṭhat a; A lungkhamlianna chu kumkhuantluangin om a ti.

²Israela richihei khan, “A lungkhamlianna chu kumkhuantluangin om a ti,” ti riseh.

³Arona richihei khan, “A lungkhamlianna chu kumkhuantluangin om a ti,” ti riseh.

⁴PUMAPA ṭituhei khan, “A lungkhamlianna chu kumkhuantluangin om a ti,” ti riseh.

⁵Ki lungzîngna rithokin PUMAPA chu ke sam a; PUMAPA khan a ne sâm a, a nen zôk tâk a.

⁶PUMAPA chu ki tiang a ṭang a, ṭi no ning e; Miriamin im an ne lo thei rang a?

⁷PUMAPA chu ne ṭangpui rangin ki tiang a ṭang a, Khasikin, ne neltuhei tlômna chu mûng ki ti.

⁸Miriam iiam nêkan chu, PUMAPAa iamna ringat hi ai ṭhat ual a nit.

⁹Mi lianhei iiam nêkan chu, PUMAPAa iamna ringat hi ai ṭhat ual a nit.

¹⁰Nam tinrêngin an ne hong hualvêl a; Anni chu PUMAPA rimingin ken tlôm tâk a.[62]

¹¹Anni khan kil tinah an ne hualvêl a; Anni chu PUMAPA rimingin ken rimang riai tâk a.

¹²Ikhuai angkan an ne hualvêl a; Nikhomseh, rilingbuk ikâng angkan an ram kiang kiang a, Anni chu PUMAPA rimingin ken rimang riai tâk a.

¹³Ke lîrna rangin an ne sun rak rak a, Nikhomseh, PUMAPA khan a ne ṭangpui tâk a.

¹⁴PUMAPA chu ki râtna neh ki lâ a nit a; Ani chu ne saninringtu a nit.

¹⁵Ringai rei, mi felhei puan ina irâl inê zoia lômna la rî chu; “PUMAPA kut changtiang khan â nê tâk a,

¹⁶PUMAPA kut changtiang chu chôiinrisângin a om a, PUMAPA kut changtiang khan thil roinpui tak a tho tâk,” an ti.

¹⁷Thi no ning a, ring ki ti; PUMAPA sinthohei chu inpuang ki ti.

¹⁸PUMAPA khan iṭha takkan a ne sôi a, Khanniseh, ki thi rang tak chu ne phal mak e.

¹⁹Biak In inkothei[63]hi ne ong pêk rei; Amakhan lût ki ta, PUMAPA ziangah lômthu ril ki ti.

²⁰Amahih PUMAPA inkot a nit a; Mi felhei bang kha lût an ti.

²¹Nangman ni ne sâm tâk sikin ni ziangah lômthu ril ki ti, Nang chu ne san isuatu ni nit.

²²In isintuhein lung an inôl tâk kha, Â kila lung mangrua om tak a hong nit tâk.

²³Amakhah PUMAPA itho a nit a; Ei mitmuah a irkhêl a nit.

²⁴Vuani hih PUMAPA nikhua inkung chu a nit; Râifânin lôm ei ti.

²⁵O PUMAPA, lungkhamin ne saninring inla; O PUMAPA, lungkhamin lotlukna ne peh roh.

²⁶PUMAPA riminga zuang chu hoi pêk riseh. PUMAPA Ina rithokin ṭhat nangni kin ivur a nit.

²⁷PUMAPA chu Pathian a nit a, Ei chungah a zuang vâr tâk. Nin kutah thing iṭang chôi unla, ruaiṭhe chu phut unla, Mâichâm ivêlin rizôp rei.[64]

²⁸Nang chu ki Pathian ni nit a, lômthu nang ril ki ti; Ki Pathian ni nit a, nang chôiinrisâng ki ti.

²⁹O, PUMAPA ziangah lômthu ril rei, ani chu a ṭhat a; A lungkhamlianna chu kumkhuantluangin om a ti.