Read Biete LAPUI 119 Bible Online

LAPUI 119 - Biete bible

LAPUI 119

¹A ringnuna mi ṭha rikiphei chu an ham a ṭhat e, PUMAPA dân izômtuhei chu.

²A thupêk izômtuhei chu an ham a ṭhat e, Lungril murdia ama zongtuhei chu.

³Anni khan ṭhano rêng rêng tho ngai mak a; PUMAPA lampuiah khan an lôn ngai.

⁴PUMAPA nangman ni dânhei chu ni ne pêk a; Ṭhatnemringai takka zôm rangin ni ne be a.

⁵O, ni roisakhei chu izôm rangin, Ki omdânhei hi indetin om ta sela o!

⁶Ni thupêkhei murdi chu vong ngit ki ta; Khanchu, mualinphoiin om no ning e.

⁷Ni roirêl idikzia ki riat tikin chu, Lungril diktak riputin nang inpâk ki ti.

⁸Ni dânhei chu zôm ki ta; O ne mah tlak no roh.

⁹Vânglâiin ingkan im a omdân a vong inrithiang thei rang? Ni thupêk angkah taka omdân vong inṭhan.

¹⁰Ki lungril murdin nang ki zong a; O ni thupêkhei ki mâk rang chu phal tlak no roh.

¹¹Ni chungah ke sual nona rangin, Ni dânhei chu ki lungrilah ki phûm khap a.

¹²O PUMAPA, nang inpâk mai ki ti; Ni lampuihei chu nen risei roh.

¹³Ni bâia thu suak murdihei chu, Ki bâiin inpuang mai ki ti.

¹⁴Ni thupêk izôm hi ki lômna tak a nit a, Richon itam takkah ineia ki râifânna nêkan.

¹⁵Nangma inriseina thuhei chu ngaituang ki ta; Ni lampuihei chu ngaisak ki ti.

¹⁶Ni roisak chungah khan lôm ki ta; Ni thuhei chu ringil no ning e.

¹⁷Ki ring theina rang neh ni dân ki zôm theina rangin, Ni bôi chungah hin iṭha takkan tho roh.

¹⁸Ni dâna rithokin thudik roinpui tak ki mu theina rangin, Ki mithei nen meng pêk roh.

¹⁹Rinêngah hin khualmi ki nit a; Ni thupêkhei chu ki ziang ata thup no roh.

²⁰Tiklâi khomin ni roirêlnahei ringai sikin; Ki ringna hi beindongin a irzal ngai a nit.

²¹Mi lârripâk, vânisalhei chu ni ngo a; Ni thupêk zôm ngai inotuhei chu.

²²Sîrinsiatna neh musitna hih ki ziang ata khâi pai roh, Ni dânhei chu ki zôm ngai a.

²³Mi lianhei chu iṭhung bungin ne sêl khom sela; Ni bôi hin ni roiinrifûk chu kî ngaitua mai a nit.

²⁴Nangma inriseina thuhei chu ki lômna a nit a; Roi nen rifûk pêktu a nit.

²⁵Ki ringna hi ipilah â tâl ṭian a; Ni thu angkah takin nen har roh.

²⁶Ki omdânhei chu ni ziangah ken puang a, Nangman ni ne sâm a; Ni lampuihei chu nen risei roh.

²⁷Ni dânhei chu nen rethiam inla, Khanchu, ni sinrikhêl thuhei chu ngaituang ki ti.

²⁸Ki ringna hi beidongin a sip tâk a; Ni thu angkah takin nen rât roh.

²⁹Lam dik ino hih ki zui rang phal no roh; Lungkham takin ni dân chu nen risei roh.

³⁰Lampui dik tak chu ker thlang tâk a; Ni roirêlnahei chu ki zôm mai a.

³¹Nen riseina thuhei chu ki vong ngit a; O PUMAPA, mualinphoiin nen om no roh.

³²Ni thupêk chu rizuk takkan zôm ki ta, Riatthiamna tam ual ne pêng ni ti.

³³O PUMAPA, ni dân thuhei chu nen risei inla, Khanchu, a mong idênin zôm ki ti.

³⁴Ni dân ki vong inṭhat theina rangin riatthiamna ne peh roh; Khanchu, ki lungril murdin zôm ki ti.

³⁵Ni thupêk lampuiah ne ṭhui inla; Kha bangah khan lômna kî mu ngai a nit.

³⁶Kuatinkamna lamah ni loiin, Ni dân zômna tiang ke lung hi inthlêk roh.

³⁷Thil chanlamboi en loi rangin ki mit hi ne khâi pêk inla; Ni lampuia lôn rangin[65] ki ringna inhar roh.

³⁸Ni ṭonginkung chu ni bôi ziangah hin indet inla, Nangma ṭituhei zianga ni înkung khah.

³⁹Kî ṭi tak tak, mi ne sîrinsiatna hi khâi inrimang roh; Ni roirêlnahei chu a ṭhat vang na!

⁴⁰Ringai ta, ni thupêkhei chu â zôm kî nuam tak tak a nit. Ni felnaah khan ringna thar ne peh roh.

⁴¹O PUMAPA, ni lungkhamlianna chu, Ki chungah zuang inlang inla, Ni ṭonginkung angkah takin ne saninring roh.

⁴²Khanchu, ne sîrinsehtuhei sâmna rang nei ki ti, Ni thu chu ki iam sikin.

⁴³Tiklâi khomin thutak chu ki bâi ata hi lah suak riai no roh, Ni roirêlnahei chu ki rinpui tak a nit a.

⁴⁴Ni dan chu zôm mai ki ta, Kumkhuantluangkan.

⁴⁵Khanchu, zalen takkan lêng ki ta, Nen riseina thuhei chu kî zong tak a nit a.

⁴⁶Ni thupêkhei chu Rênghei makungah ril ki ta, Izak no ning e.

⁴⁷Ni thupêkhei izômah khan ki lôm ngai a, Lung kî thlung a nit.

⁴⁸Ni thupêkhei chu ken lut a, ki marit a; Nen riseina thuhei hih ngaituang ki ti.

⁴⁹Ni bôi zianga ni ṭonginkung chu remai roh; Amakhan sabeina liantak a ne ipêk a nit.

⁵⁰Amakhah ki dengtheinaah khan ki thlangamna a nit; Ni ṭonginkung khan ringna a ne pêk ngai.

⁵¹Mi lârripâkhei khan an ne nuiso mai a, Nikhomseh, ni dân chu mah tlak ngai mang e.

⁵²O PUMAPA, khuansianga ni roirêlhei chu ki riat mai a, Thlangam an ne sak ngai.

⁵³Mi sualhein ni dân ngaisak mak iti ki mu a, Ki ning a thik tak tak a.

⁵⁴Hi nuai rama ki dam sung itôiteah hin, Ni thupêkhei chu ki zâi lâhein mang ki ti.

⁵⁵O PUMAPA, zânah nang ki riat mai a, Ni dân chu ki ngaitua ngai a.

⁵⁶Ni thupêkhei ki vong inṭhat a, Hamṭhatna hi ki chungah ai tlung a nit.

⁵⁷PUMAPA, ki dongtum ni nit; Ni thu zôm rangin ṭong ken kung e.

⁵⁸Ki lungril murdin ni lungkhamna ki ngên a; Ni thu angkah takin lung nen kham roh.

⁵⁹Ki omdânhei ki ngaitua a, Nen riseina zôm rangin ki ke ki phêt tâk a.

⁶⁰Ni thupêkhei izôm rangin ker mot a, Ki irvuak ino a nit.

⁶¹Mi siahei khan chângin ner kul khom seh, Ni dân chu ringil ngai mang a.

⁶²Zân lâiah nang inpâk rangin ki thoi ngai a, Ni roirêlhei â dik sikin.

⁶³Nangma ṭituhei murdi neh, Ni dân izômtuhei murdi rual ki nit.

⁶⁴O PUMAPA, rinêng hih ni lungkhamliannan a sip a; Ni thupêkhei chu nen risei roh.

⁶⁵O PUMAPA, ni thu angkah takin, Ni bôi chungah hin ni ṭhat a.

⁶⁶Vârna neh riatna ṭha nen risei roh, Ni thupêkhei chu kî iam a nit a.

⁶⁷Dengintheina ki tuang maah khan ke vâi rimang ngai a, Atûn chu ni thu ki zôm tâk a.

⁶⁸Nang chu ni ṭhat a, thil iṭha ni sin a; Ni thupêkhei chu nen risei roh.

⁶⁹Mi lârripâkhei khan ki chungah milak an phua a, Nikhomseh, ki lungril murdin ni min riseina thuhei chu vong inṭhâng ki ti.

⁷⁰Hi mihei hin riatthiamna zel nei mak a, Keimah chu ni dân chungah kî lôm ngai a nit.

⁷¹Dengintheina kî tuang khah ki ta rangin ai ṭhat a nit. Ni thupêkhei chu ki irsei thei tâk a nit.

⁷²Rângkachak neh tangka sâng itam takka nêkan khom, Ni bâia dân isuak chu ki ta rangin ai ṭhat ual a nit.

⁷³Ni kuta ne siamin, ni nen ding a; Ni thupêkhei chu ker sei theina rangin riatthiamna ne peh roh.

⁷⁴Nangma ṭituhei khan ne mûng an ta, lôm an ti, Ni thupêkheiah khan ker ngat ngai a.

⁷⁵O PUMAPA, ni roirêlhei chu â dik iti ki riat a, Ni iamom sikin ni ne îsôi a nit iti ki riat tâk.

⁷⁶Ni bôi zianga ni ṭonginkung angkah takin, Ni lungkhamlianna khan thlangam ne sak riseh.

⁷⁷Lung nen kham inla; khanchu, ring ki ti; Ni dân chu ki lômna a nit a.

⁷⁸Dikino takkan an ne sêl sikin, Mi lârripâkhei chu mualinphoiin om riseh, Keiman chu ni min riseina thuhei ngaituang ki ti.

⁷⁹Nangma ṭituhei chu ki tiang ma song sela, Ni thupêk iretuhei chu.

⁸⁰Ni dânhei chu iṭha takkan zôm riai inlang, Mualinphoiin om tlak no ning e.

⁸¹Ki ringna hi ni saninringna ringaiin arzal tâk a; Nikhomsela, ni thu chu ker ngatna a nit.

⁸²Ni thu thlîrnan ki mit â vâi zoi tâk a; “Nangman tikin im thlangam ni ne sak rang o,” ki ti ngai.

⁸³Meikhû iur savun peng angkah ki nit tâk a, Nikhomsela, ni thupêkhei chu ringil mang e.

⁸⁴Ni bôi hin itena sôt im ki lai ngâk rang? An nuam ne lotuhei chungah hin tikin im roi nî rêl rang?

⁸⁵Mi lârripâk, ni dân zôm inotuhei khan, Ki tlâkna rang dîp an choih a.

⁸⁶Ni thupêkhei murdi chu iiam a om a, Miriamhei khan milakin an nuam an ne ilo hi, O ne ṭangpui roh.

⁸⁷Anni khan rinêngah hin an nen rimang lôk lôk tâk a, Nikhomsela, ni thupêkhei chu nungsong mang a.

⁸⁸Ni lungkhamlianna khan ki ringna zua roh, Khanchu, ni dânhei chu zôm thei ki ti.

⁸⁹O PUMAPA, kumkhuaka rangin, Ni thu chu rivânah idet takkan a om a.

⁹⁰Ni iamomna chu suanpâr tin tin idênin om a ta; Rinêng hih nen ding a, idet takkan a om mai a.

⁹¹Nangma thupêk angkan atûn tenah hin, thil tinrêng an om mai a; An rêngkan ni bôi an nit.

⁹²Ni dân khah ki lômna tak nino sela chu, Ki dengthei tuangnaah khan ki irmang rang tâk a nit.

⁹³Ni thupêkhei chu ringil tlak mang a, Nangman amakhan ni nen ring ngai.

⁹⁴Ni ta ki nit hih, ne saninring roh; Ni thupêkhei izôm ngaitu ki nit.

⁹⁵Mi siahei khan nen rimang itumin an ne ruang ngai a, Nikhomsela, ni dân chu ngaituang ki ti.

⁹⁶Thil tinrêng mongna ten iom a nit iti ki riat tâk a; Nikhomsela, ni thupêk chu ai ṭhat rikip a nit.

⁹⁷O, ni dân chu ker ngaiinnat vang na! Sûn isôtkah kî ngaitua ngai a nit.

⁹⁸Ni thupêkhei khan ne doituhei nêka vâr ualin a ne siam a, Kumkhuakan ki ziangah a om mai sikin.

⁹⁹Nen riseitu murdi nêkan riatthiamna kî nei ual a nit, Ni min riseina ki ngaitua ngai sikin.

¹⁰⁰Itarhei nêkan kî vâr ual a nit, Ni thupêkhei ki zôm ngai sikin.

¹⁰¹Ni thupêkhei ki zôm theina rangin, Lam no-ah rêng rêng ki kehei phêt ngai mang e.

¹⁰²Ni roirêlna ata pêt ngai mang a, Nangman ni nen risei sikin.

¹⁰³Ni thuhei hi ki bâi rangin a thlum vang na! A nit, ki bâi rangin chu khuaitui nêkan a thlum ual a.

¹⁰⁴Ni dânhei sikin vârna ki nei a, Khasikin, omdân dikino tinrêng hi kî nel a nit.

¹⁰⁵Ni thu hi ki ke rangin meiser a nit a, Ki lampui rangin ivâr a nit.

¹⁰⁶Ni roirêl idiktakhei chu izôm rangin, Ṭong idet tak ken kung a.

¹⁰⁷Natinsat takkan denginthein ki om a; O PUMAPA, ni thu angkah takin nen ring roh.

¹⁰⁸O PUMAPA, nang ki chôiinrisângna thilpêk hi iham roh, Ni thupêkhei chu nen risei roh.

¹⁰⁹Ki ringna hi ki kutin ke tûk mai a, Nikhomsela, ni dân chu ringil ngai mang e.

¹¹⁰Mi siahei khan ke ôkna rang châng an kam a, Nikhomsela, ni thupêkhei chu nung song mang e.

¹¹¹Ni thupêkhei chu kumkhuakan ki dongtum a nit a; A nit, ki lungril lômna tak a nit.

¹¹²Kumkhuaka ni dân izôm rangin, Ki lungril ki siam infel tâk.

¹¹³Lungril mumal nei ino mihei chu ki nel a; Ni dân chu ki irngai innat a nit.

¹¹⁴Nang chu ker bîkna mun neh ke pho ni nit a; Ni thu chu ki tûngna a nit.

¹¹⁵Thil ṭhano thotuhei, ki ziang ata ro pai rei. Ki Pathian thupêkhei kî zôm rang a nit.

¹¹⁶Ni ṭonginkung angka takin nen rât inla, Khanchu, ring ki ti; Ki tûngna hi chanlamboi nen chang pêk tlak no roh.

¹¹⁷Ne kâi inla, khanchu, zôk ki ti, Ni thupêkhei chu uksak mai ki ti.

¹¹⁸Ni dân zôm inotuhei murdi chu ni heng a, An milak thiltumhei chu chanlamboi a nit.

¹¹⁹Rinênga mi siahei murdi chu nimnok angkan ni be a, Khasikin, ni mîn riseina thu chu ki înlut a nit.

¹²⁰Ki takpum hi nangma ṭin ân thing a; Ni roirêlnahei chu kî ṭi a nit.

¹²¹Thil idik neh thil iṭha ki tho ngai a, Ne ngêpsetuhei ziangah ne thla rak no roh.

¹²²Ni bôi chu ṭangpui ni ti iti inkung inla; Mi lârripâkhein ne ngêpsia rang phal no roh.

¹²³Ni saninringna thlîrnan ki mit â vâi zoi tâk a, Ne saninring ranga ni ṭonginkung ithlîr nan.

¹²⁴Ni lungkhamlianna angkah takin ni bôi chungah hin thon la, Ni thupêkhei chu nen risei roh.

¹²⁵Ni bôi ki nit a, riatthiamna ne peh roh, Nen riseina thu ki riattheina rangin.

¹²⁶PUMAPA, ni châng rang zoro a nit tâk, Ni dân hi chanlamboiin an siam tâk a.

¹²⁷Ni dânhei chu rângkachak nêkan ken lut a, A nit, rângkachak rithiangtak nêkan khom.

¹²⁸Khasikin, ki kal tinrêng ni thupêkhei tiang ki phêt a, Omdân dik ino tinrêng kî nel a nit.

¹²⁹Nen riseina thuhei chu a irkhêl a nit; Khasikin, ki lungril murdin ki zôm ngai.

¹³⁰Ni thu rilfiana hin mihei riatthiamna a pêk a, Mi inmôlhei chu vârna a pêk ngai.

¹³¹Ni thupêkhei ringai sikin ki bâi ki âng a, Ker thuak huan huan a.

¹³²Ki tiang mâi ngat inla, lung nen kham roh, Nangmah lungithlungtuhei lung nî thlung mai ngai angkah khan.

¹³³Ni ṭonginkung angkah takin ki kalbihei indet inla, Sualna rêng rêng ki chungah thu innei no roh.

¹³⁴Mihei ngêpsiana ata chu ne sanisuan la, Khanchu, ni thupêkhei hi zôm thei ki ti.

¹³⁵Ni bôi chungah hin ni mêl invâr inla; Ni dânhei chu nen risei roh.

¹³⁶Mihein ni dân an zôm nuam no sikin, Vadung tui angkan ki mitrithli a luang mai ngai.

¹³⁷O PUMAPA, nang chu mi fel ni nit a, Ni roirêlna khom a îdik a nit.

¹³⁸Ni dân pêkhei chu â dik a, Iiam ai om tak tak a nit.

¹³⁹Ki ṭhatnem ringaina hin a ne fâk zoi tâk a, Ne doituhein ni dân an marit no sikin.

¹⁴⁰Ni ṭonginkung hi â dik vang na! Ni bôi hin ki înlut a nit.

¹⁴¹Mi chîn neh musit iom ki nit a, Nikhomsela, nen riseina thuhei chu ringil ngai mang a.

¹⁴²Ni felna chu kumkhuan om mai a ta, Tiklâi khomin ni dân chu a îdik a nit.

¹⁴³Lungzîngna neh thlavâina khan a ne bô tâk a, Nikhomsela, ni thupêkhei chu ki lômna a nit.

¹⁴⁴Ni min riseinahei chu kumkhuakan ai fel a nit; Riatthiamna ne peh roh; khanchu, ring mai ki ti.

¹⁴⁵Ki lungril murdin nang ke sam a; O PUMAPA, ne sâm roh. Khanchu, ni thupêkhei zôm ki ti.

¹⁴⁶Nang ke sam mai; ne saninzôk roh, Khanchu, ni dânhei chu zôm ki ti.

¹⁴⁷Kôlrisam kaneh ne ṭangpui rangin nang ke sam a; Ni ṭonginkungah khan ki tûngna ki sia ngai.

¹⁴⁸Ni thu lungrila ngaituan, Zân thluanin ki rak ngai a.

¹⁴⁹Ni lungkhamlianna sikin ki rôl hi ringai inla; O PUMAPA, lungkhamin ki ringna ihoi roh.

¹⁵⁰Mi nunter, an nuam ne lotuhei khan an ne hong nâi a; Anni chu ni dân zôm ino an nit.

¹⁵¹O PUMAPA, nang chu ki kôlah ni om mai a; Ni thupêkhei murdi chu thutak a nit.

¹⁵²Ni min riseina kha kumkhuaka rangin ni îndet tâk a nit iti, Tianlâia rithokin ki lei iriat tâk a nit.

¹⁵³Ki dengtheizia hi en inla, ne saninzôk roh. Ni dân chu ringil tlak ngai mang e.

¹⁵⁴Ki chungchâng thu ne sîrpuiin, ner tlan inla; Ni thu angkah takin nen ring roh.

¹⁵⁵Mi sualhei chu saninzôkin om tlak no nih, Ni dân izôm an inuam ino a nit.

¹⁵⁶O PUMAPA, ni lungkhamna chu ân thûk vang na! Lungkhamin ne saninzôk roh.

¹⁵⁷Ne ngêpsiatuhei neh ne doituhei chu itam takkah an nit a, Nikhomsela, ni dân chu lôi ngai mang e.

¹⁵⁸Vârrilethei chu lunghoi ino takkan ki en a, Ni thu an zôm nuam no sikin.

¹⁵⁹Ni min riseina thuhei ken luttlia hi ringaitua ta! O PUMAPA, ni lungkhamlianna sikin ki ringna hi ihoi roh.

¹⁶⁰Ni thu murdi chu thutak a nit a; Ni roirêl idiktak murdi khom hi kumkhuakan om mai a ti.

¹⁶¹Mi lianhein a bi boiin an nuam an ne lo a, Nikhomsela, ki lungril khan ni thuhei a nit, ai ṭi chu.

¹⁶²Ni thu-ah hin kî lôm tak tak ngai a nit, Richon itam takka mu angkan.

¹⁶³Milak hi ki nelin ke tir a, Ni dân chu ki înlut a nit.

¹⁶⁴Sûnka tah voi sarikah nang ki înpâk ngai a nit; Ni roirêl chu â dik tak tak sikin.

¹⁶⁵Ni dân lungithlunghei chu thlangamna lian tak an nei ngai a; Îten inlîr thei ngai mak.

¹⁶⁶O PUMAPA, ni saninringna ki ngâk mai a, Ni thupêkhei ki sin mai ngai.

¹⁶⁷Ki ringna hin ni mîn riseina chu a zôm ngai a; Ki înlut tak tak a nit.

¹⁶⁸Ni thupêkhei neh ni min riseina thuhei chu ki zôm ngai, Ki omdân murdi hi nî mu riai a nit.

¹⁶⁹O PUMAPA, ke khêk irî hi ni ziang hong tlung riseh; Ni thu angkah takin riatthiamna ne peh roh.

¹⁷⁰Ki ngênna hi ni makung tlung sela; Ni thu angkah takin ne saninzôk roh.

¹⁷¹Ki bâi hin ni thu inpâkin zâi riseh; Nangman ni dânhei ni nen risei tâk a.

¹⁷²Ke lei hin ni thu inpâkin zâi riseh, Ni thupêk murdi chu â dik a nit a.

¹⁷³Ni kut chu ne ṭangpui rangin rifo diamin om riseh, Ni thupêkhei chu ker thlang tâk a.

¹⁷⁴O PUMAPA, ni saninringna chu ker ngai vang na! Ni dân chu ki lômna tak a nit.

¹⁷⁵Nen ring inla; khanchu, nang inpâk ki ti, Ni roirêl khan ne ṭangpui riseh.

¹⁷⁶Bera rimang angkan ke vâi rimang a; Ni bôi hi ne zuang zong roh, Ni thupêkhei chu ki irngil tlak ngai ino a nit.