Read Biete LAPUI 132 Bible Online

LAPUI 132 - Biete bible

LAPUI 132

¹PUMAPA, Davida hi a dengthei tuangna murdi repui roh;

²PUMAPA ziangah ṭong arkhâm a, Jakoba Pathian roinpuitak zianga ṭong ân kungzia kha:

³“Ki omna inah lût tlak no ning a, Ki zâlmunah khom lût tlak no ning e;

⁴Ringam no ning a, Ki mit khom isîng dap no ning e,

⁵PUMAPA rang mun, Jakoba Pathian Irât rang, In ki mu pêk mâkah chu” itin.

⁶Ringai ta, Bethlehemah a Thuthlung Bôm thurchi ei riat a, Jearim munah ei mu tâk.

⁷“A omnaah khan fêng ei ta, A ke bulah chubai lei ûn rei u,” kin ti a.

⁸O PUMAPA, thoi inla, Nangmah neh ni Thuthlung Bôm neh khan ni Tempilah hin lût roh. Ni râtzia inlangna Thuthlung Bôm neh amakhan kumkhuan om roh.

⁹Ni thiampuhei chu felnan rithluk sela; Ni mi rithianghei chu râifânin ikhêk riseh.

¹⁰Ni bôi Davida ziangah ṭong nen kung a; PUMAPA, ni siriak inrithu-ah hi heng khâi no roh.

¹¹PUMAPA khan Davida ziangah ṭonginkung idet ân kung a; Amakhah lah nôk khâi no ni a: “Nangma nai ngêi ni rêngṭhungmunah khan inṭhung ki ta, Ani khan nangma thûlin roirêl a ti.

¹²Ni naihei khan ki thuthlung an vong indik a, Ki thu inriseihei khom an zômin chu, An naihei khom kumkhuakan ni rêngṭhungmunah khan iṭhung mai an ti,” itin.

¹³PUMAPA khan Zion chu arthlang a; A omna mun rangin ai nuam a nit.

¹⁴“Amahih kumkhuaka ki omna rang mun a nit a; Ki om maina rangin ki nuam lam tak a nit.

¹⁵Zion chu a irsam murdi itam takkan ṭhatvur ki ta; A mi, inrianghei khom fâknêk inkhop ki ti.

¹⁶A thiampuhei chu saninringnan inrithluk ki ta, A mi rithianghei chu râifânna lâ sakin ikhêk an ti.

¹⁷Amakhan, Davida richia mi khatkah rêng roinpui takin siam ki ta; Ki rêng rithlanga ta rangin meiser ke chok tâk.

¹⁸Ama doituhei chu mualinphoina inrikhûng ki ta, Ani chu a rênglukhum chu ritle uar mai a ti” itin.