Read Biete LAPUI 135 Bible Online

LAPUI 135 - Biete bible

LAPUI 135

¹PUMAPA chu inpâk rei. PUMAPA riming chu inpâk unla,

²O PUMAPA bôihei, PUMAPA Ina ding a, Ei Pathian Biak In sunga ding ngaihei, PUMAPA chu inpâk rei.

³PUMAPA chu inpâk rei. PUMAPA chu a ṭhat a; Arming inpâkin zâi rei, ani chu lungkhamna sip a nit.

⁴PUMAPA khan Jakobhei hi ama ta rangin arthlang a, Israelhei hi a dongtum bîkin arthlang a.

⁵PUMAPA chu roinpui tak a nit iti ki riat tâk a, Ei Pathian chu pathian murdi nêka ân chungtak a nit iti ki riat tâk.

⁶Rinêng neh rivân hei, tuikhanglian neh tui inthûk tak murdiheiah khom, PUMAPA chu a lungdo murdi chu a sin ngai a.

⁷Kôlkila rithokin sûm ân hong ngai a, Rua sûrna rangin khothlârhei ân rilek a, A fasiara rithokin ithli ân râng suak ngai.

⁸Ani khan Aigupta rama miriam neh sahei kha, An nai lutîrhei chu a that pêk a.

⁹Aigupta ramah, Faroa neh a bôihei murdi denginthei nan, Ani khan risinsianahei neh thil rikhêlhei tak takhei a tho pêk a.

¹⁰Ani khan nam itam takkah ân rimang a, Rêng roinpui tak takhei a that a.

¹¹Amorhei rêng Sihona neh Basan ram rêng Oga neh, Kanan rama rênghei murdi chu.

¹²An ram chu a mihei dongtum rangin a pêk a, A mi Israelhei dongtum rangin a pêk a.

¹³O PUMAPA, nangma riming chu kumkhuakan om mai a ta, O PUMAPA, suanpâr murdîn nang remai an ti.

¹⁴PUMAPA khan a mihei chu roirêl pêk a ta, A bôihei chu lunginkham a ti.

¹⁵Nam danghei pathian chu miriam kutsuak a nit a; Tangkarua neh rângkachaka siam an nit.

¹⁶Bâi an nei a, khan ṭong thei mak a, Mit an nei a, khan mu thei mak a.

¹⁷Ikuar an nei a, khan reh thei mak a, An bâiah khan rithuak rêng rêng omak e.

¹⁸Kha siamtuhei neh a iamtuhei murdi chu, An mirmil siam angkah khan om riseh.

¹⁹O Israel mihei o, PUMAPA chu inpâk rei; O Arona richihei, PUMAPA chu inpâk rei.

²⁰O Levia richihei, PUMAPA chu inpâk rei, PUMAPA ṭituhei o, PUMAPA chu inpâk rei.

²¹Zionah khan PUMAPA chu inpâk unla, Jerusalem, a In omna ngêiah khan inpâk rei. PUMAPA chu inpâk rei.