Read Biete LAPUI 136 Bible Online

LAPUI 136 - Biete bible

LAPUI 136

¹O PUMAPA ziangah lômthu ril rei, ani chu a ṭhat a; A lungkhamlianna chu kumkhuakan om a ti.

²O pathianhei Pathian ziangah lômthu ril rei; A lungkhamlianna chu kumkhuakan om a ti.

³O rênghei Rêng ziangah lômthu ril rei; A lungkhamlianna chu kumkhuakan om a ti.

⁴Amah bangin thil rikhêl roinpuihei a tho thei a; A lungkhamlianna chu kumkhuakan om a ti.

⁵A vârnaah khan rivânhei khi a siam a; A lungkhamlianna chu kumkhuakan om a ti.

⁶Rinêng hi tui chungah a siam inding a; A lungkhamlianna chu kumkhuakan om a ti.

⁷Ani khan inî neh ithla a siam a; A lungkhamlianna chu kumkhuakan om a ti.

⁸Inî khi sûna vâr rangin a siam a; A lungkhamlianna chu kumkhuakan om a ti.

⁹Ithla neh ârsihei zâna vâr rangin a siam a; A lungkhamlianna chu kumkhuakan om a ti.

¹⁰Ani khan Aigupta nai lutîrhei a that tâk a; A lungkhamlianna chu kumkhuakan om a ti.

¹¹Israel mihei chu Aigupta ata a ṭhui suak tâk a; A lungkhamlianna chu kumkhuakan om a ti.

¹²Kut irât neh ban ipharin a ṭhuisua tâk a; A lungkhamlianna chu kumkhuakan om a ti.

¹³Ani khan Tuipui Sen chu a ṭhen tâk a; A lungkhamlianna chu kumkhuakan om a ti.

¹⁴Israelhei chu a lâi takah ân kâi tâk a; A lungkhamlianna chu kumkhuakan om a ti.

¹⁵Faroa neh a sipaihei chu Tuipui Senah khan ân rinîk zoi tâk a; A lungkhamlianna chu kumkhuakan om a ti.

¹⁶Ani khan a mihei chu ramchârah a ṭhui thleng a; A lungkhamlianna chu kumkhuakan om a ti.

¹⁷Ani khan rêng roinpui tak takhei chu a that a; A lungkhamlianna chu kumkhuakan om a ti.

¹⁸Ani khan rêng riming inthang tak takhei chu a that a; A lungkham lianna chu kumkhuakan om a ti.

¹⁹Amor rêng Sihona chu a that a; A lungkhamlianna chu kumkhuakan om a ti.

²⁰Basan ram rêng Oga khom a that a; A lungkhamlianna chu kumkhuakan om a ti.

²¹An ram chu a mihei a pêk tâk a; A lungkhamlianna chu kumkhuakan om a ti.

²²A bôi Israelhei ngêi chu a pêk tâk a; A lungkhamlianna chu kumkhuakan om a ti.

²³Ani khan ei nam tlôm lâiah khan a ne riat mai a; A lungkhamlianna chu kumkhuakan om a ti.

²⁴Ani khan ei irâlhei ata a ne saninzôk tâk a; A lungkhamlianna chu kumkhuakan om a ti.

²⁵Ani khan mîring tinrêng ziangah ifarua a pêk a; A lungkhamlianna chu kumkhuakan om a ti.

²⁶O vân Pathian ziangah khan lômthu ril rei; A lungkhamlianna chu kumkhuakan om a ti.