Read Biete LAPUI 139 Bible Online

LAPUI 139 - Biete bible

LAPUI 139

¹Davida inpâkna lâ O PUMAPA, nangman iṭha takkan ni ne en a, Ni ne riat tâk.

²Nangman ke ṭhung neh ke ding ni riat ngai a; Ki ngaituana hi ilah taka rithok khomin ni riatthiam ngai.

³Ki lôn neh ki zâl hi ni ne mu mai ngai a; Ki omtlia murdi hi ni riat riai ngai.

⁴Ki ṭong ma khomin, Ki ti rangtum chu ni riat riai ngai a.

⁵Nang chu ki vêlkan ni om a; Ni sinthotheinan ni ne hoi ngai a.

⁶Khangkah taka riatna kha ki rangin a irkhêl a nit; Arsâng rai a, kî riatthiam phâk ino a nit.

⁷Nangma rithla ziang ata hi taktiang im ki rot rang? Ni ma ata hi taktiang im ke tlân rimang rang?

⁸Rivânah hang lui inlang, amakhan ni lei om a; Mithi khuaah zu zâl khom inlang, amakhan khom ni lei om a.

⁹Zîng rithla pharin, Tuikhanglian pen vitah va om khom inlang,

¹⁰Amakhan khom ni kutin ne ruai a ta; Ni kut changtiangân ne tûng a ti.

¹¹“Izîngin ner khû inrimang seh, Ki kôl ivâr hi zân inthim chang riseh,” ti man inlang,

¹²Izîng khomin nangma ata chu îte rili thei mak e. Zân khom sûn angkan a vâr a, Izîng neh ivâr hi ni ta rangin thumun a nit.

¹³A nit, nangman ki takpumpui hi ni siam a; Ki nu phûng sungah nangman ni nen rifom a.

¹⁴O Chungnung tak, ni ziangah lômthu ril ki ti, Iṭiom tak neh rikhêl tak takka siam ki nit a, Ni sinthohei hih roinpui tak a nit a; Amakhah ki ringna hin ai riat infel a nit.

¹⁵Ki siang inzir lâiah khan, Ki nu phûng sungah iṭha takka inrifomin ki om a,[69] Ki ru râng hi ni maah ithupin omak a.

¹⁶Ki ruak larfom ino chu ni mitin ni mu a. Ki damsung sûn ranghei chu arphut ma viaiin, Ni lekhabuah khan ki sûnhei hi riziak riai a nit a.

¹⁷O Pathian, ni ngaituanahei chu ki rangin a lut vang na! Tep zoi zât zel ni mak na!

¹⁸Tep ngân inlang, tuipuia ṭiai nêkan tam ual a ti. Ki hang har[70] tenan khom ni ziangah ki lai om mai a nit.

¹⁹O Pathian, mi siahei chu that ngêt inla, A nit, thisen isua ngai mihei[71] khan ne mah riseh.

²⁰Anni khan ṭhano takin nang an isîrinsiat a; Ner ming chu an isîrinsiat ngai.

²¹O PUMAPA, nangma neltuhei chu ki nel vang na! Nangma chunga riheltuhei chu ke tir vang na!

²²Anni chu nel titakin ki nel a; Keima ne doituhei angkah takin kî be a nit.

²³O Pathian, iṭha takkan ne en fian la, ki lungril hi reh roh; Ne fian la, ki ngaituanahei hi reh roh.

²⁴Khanchu, keimaah hin siatna rêng rêng a om im en inla, Kumtluang lampuiah khan ne ṭhui roh.