Read Biete LAPUI 140 Bible Online

LAPUI 140 - Biete bible

LAPUI 140

¹O PUMAPA, mi sualhei ata ne saninzôk inla; Mi nunterhei ata ne hoi roh.

²An lungrilah thilisual an ngaitua mai a, Nîn tin buaina an siam mai ngai a.

³An ilei chu irûl tûr angkan iṭi a om a; An thu chu sokngân tûr angkah hi a nit.

⁴O PUMAPA, mi siahei kut ata chu ne rung inla, Mi nunterhei kut ata kha ne hoi roh; Anni khan ki ke phêt ilîrna rang an phan a.

⁵Mi risonghei khan ke ôkna rang inrûkkan ruiirualin châng an kam a, Ki lam ṭhuamah lên an zar a, Lam thluanin ke ôkna rang châng an ikam a nit.

⁶PUMAPA ziangah khan, “Nang chu ki Pathian ni nit,” ki ti a. O PUMAPA, ṭangpui ki ngênna rôl hi ner ngai pêk roh.

⁷O PUMAPA, ki Pathian, ki saninzôkna det, Nangman ridoi nî-ah khan ki lu ni ne hoi pêk a.

⁸O PUMAPA, mi siahei lungdo kha lo intluk pêk non la; An ngaituana insualhei chu lo intluk pêk no roh.

⁹Ne doituhei chu ki chungah inlal rangin phal non la; An ne ṭhina ṭong khah an chungah ṭul riseh.

¹⁰An chungah mei ri-al ṭul sela; Khurmongboiah pai iṭhulin om sela, Suak nôk tlak khâi no riseh.

¹¹Dik ino takka mi nô ngaihei chu, Rinêngah hin manchang isuakin om no ni a; Mi nunterhei khom siatnân inê a ta, inrimang a ti.

¹²PUMAPA, inrianghei chu ni thlop ngai iti ki riat, Mi fânrahei rangin idik takkan roi ni rêl ngai.

¹³Inkhêl loiin mi felhei khan nangma riming inpâk an ta; Mi dikhei chu ni maah om mai an ti.